പത്തനംതിട്ട: കോന്നി പയ്യനാമൺ ചെങ്കുളത്ത് പാറമടയിലെത്തിയ ഹിറ്റാച്ചിക്ക് മുകളിൽ കൂറ്റൻ പാറ വീണ അപകടത്തിൽ ഒരാളുടെ മൃതദേഹം കണ്ടെത്തിയതായി ഫയർ ഫോഴ്സ് സ്ഥിരീകരിച്ചു. രണ്ട് തൊഴിലാളികളാണ് കുടുങ്ങിയത്. ഒഡീഷ സ്വദേശികളായ മഹാദേവ്, അജയ് റായ് എന്നിവരാണ് കുടുങ്ങിയവരിൽ ഉൾപ്പെടുന്നത്. മറ്റ് തൊഴിലാളികളും കുടുങ്ങിയിട്ടുണ്ടോ എന്ന് പരിശോധന തുടരുന്നതിനിടെയാണ് ഒരാളുടെ മൃതദേഹം കണ്ടെത്തിയത്. മൃതദേഹം ആരുടെതാണെന്ന് തിരിച്ചറിഞ്ഞിട്ടില്ല. മറ്റൊരാൾക്കായുള്ള തിരച്ചിൽ തുടരുകയാണ്.  നീണ്ട രക്ഷാ പ്രവർത്തനത്തിലൊടുവിലാണ് മൃത​ദേഹം കണ്ടെത്തിയത്. പ്രദേശത്ത് രക്ഷാ പ്രവർത്തനം നടത്തുന്നത് ദുഷ്കരമായി തുടരുകയാണ്. 

ഉച്ചഭക്ഷണത്തിന് ശേഷം ഷിഫ്റ്റ് പ്രകാരം ജോലിക്ക് കയറിയവരാണ് അപകടത്തിൽപ്പെട്ടത്. പാറമടയുടെ ദുർഘടമായ ഭൂപ്രദേശം രക്ഷാപ്രവർത്തനത്തിന് വലിയ വെല്ലുവിളിയാണ്. തിരുവല്ലയിൽ നിന്ന് എൻഡിആർഎഫ് സംഘം (27 അംഗങ്ങൾ) രക്ഷാപ്രവർത്തനത്തിനായി തിരിച്ചിട്ടുണ്ട്. കൊല്ലം, കോട്ടയം ജില്ലകളിൽ നിന്ന് കൂടുതൽ ഫയർ ഫോഴ്സ് സംഘവും സ്ഥലത്തേക്ക് എത്തുന്നു. പാറമടയിൽ മുകളിൽ നിന്ന് കല്ലുകൾ അടർന്നു വീഴുന്നത് രക്ഷാപ്രവർത്തനത്തെ സങ്കീർണമാക്കുന്നു. റോപ്പ് റെസ്ക്യൂ ലക്ഷ്യമിട്ടെങ്കിലും, ഫയർ ഫോഴ്സിന് ഹിറ്റാച്ചിക്ക് സമീപത്തേക്ക് എത്താനാകാത്ത സ്ഥിതിയാണ്. "മാൻപവർ കൊണ്ട് മാത്രം രക്ഷാപ്രവർത്തനം സാധ്യമല്ല. കൂടുതൽ യന്ത്രസാമഗ്രികൾ എത്തിക്കേണ്ടതുണ്ട്. പാറ അടർന്നു വീഴുന്ന ഭാഗം പൊട്ടിച്ചു മാറ്റേണ്ടി വരും," ജില്ലാ ഫയർ ഓഫീസർ പ്രതാപചന്ദ്രൻ വ്യക്തമാക്കി.

ALSO READ: സർക്കാർ ആശുപത്രിയിലെ ചികിത്സയിൽ മരണത്തിന്റെ വക്കിലെത്തിയ എന്നെ രക്ഷിച്ചത് സ്വകാര്യ ആശുപത്രി; വീണ്ടും വിവാദ പരാമർശവുമായി മന്ത്രി സജി ചെറിയാൻ

120 ഏക്കർ വിസ്തൃതിയിൽ പ്രവർത്തിക്കുന്ന ഈ പാറമടയ്ക്കെതിരെ നേരത്തെ പരാതികൾ ഉയർന്നിരുന്നു. പാറമടയിലെ ക്രഷറിന്റെ ലൈസൻസ് കഴിഞ്ഞ ജൂൺ 30-ന് അവസാനിച്ചതാണ്. കോന്നി പഞ്ചായത്തിൽ മുൻ അംഗം ബിജി കെ. വർഗീസ് പാറമടയ്ക്കെതിരെ പരാതി നൽകിയിരുന്നതായി വിവരമുണ്ട്. കോന്നി എംഎൽഎ കെ.യു. ജനീഷ് കുമാർ രക്ഷാപ്രവർത്തനത്തിന്റെ പുരോഗതി നിരീക്ഷിക്കുന്നുണ്ട്. ഫയർ ഫോഴ്സിന്റെ സ്പെഷൽ ടാസ്ക് ഫോഴ്സിനോട് തയ്യാറാകാൻ നിർദേശം നൽകിയിട്ടുണ്ട്. അപകടത്തിന്റെ കൂടുതൽ വിവരങ്ങൾ ലഭ്യമാകുന്നതിനായി കാത്തിരിക്കുകയാണ്.

A massive rock fell on a Hitachi vehicle at a quarry in Chengulath, Payyanamon, Konni, Pathanamthitta, trapping two workers, Mahadev and Ajay Rai from Odisha. One body has been recovered, but rescue operations are extremely challenging due to the rugged terrain and falling rocks. NDRF and additional fire force teams from Kollam and Kottayam are assisting, but reaching the site remains difficult. The quarry, previously under scrutiny for violations, faces renewed concerns as rescue efforts continue