ന്യൂയോർക്ക്: അമേരിക്കയിലെ അലാസ്‌കയിൽ ശക്തമായ ഭൂചലനം. 7.3 തീവ്രത രേഖപ്പെടുത്തിയ ഭൂകമ്പം ഉണ്ടായതായി യുഎസ് ജിയോളജിക്കൽ സർവേ (യുഎസ്ജിഎസ്) അറിയിച്ചു. ഭൂചലനത്തിന്റെ പശ്ചാത്തലത്തിന്റെ അലാസ്ക ഉപദ്വീപിന്റെ ഭൂരിഭാഗ പ്രദേശത്തും സുനാമി മുന്നറിയിപ്പ് നൽകി. നാഷണൽ ഓഷ്യാനിക് ആൻഡ് അറ്റ്മോസ്ഫെറിക് അഡ്മിനിസ്ട്രേഷൻ (എൻഒഎഎ) ആണ് സുനാമി മുന്നറിയിപ്പ് നൽകിയത്.

പ്രാദേശിക സമയം ബുധനാഴ്ച ഉച്ചയ്ക്ക് 12:30 ന് ആണ് അലാസ്ക ഉപദ്വീപിലെ പോപ്പോഫ് ദ്വീപിലെ സാൻഡ് പോയിന്റിന് തെക്ക് 87 കിലോമീറ്റർ (54 മൈൽ) അകലെ ഭൂചലനം ഉണ്ടായത്. കെന്നഡി എൻട്രൻസ് മുതൽ യൂണിമാക് പാസ് വരെയുള്ള കോൾഡ് ബേ, സാൻഡ് പോയിന്റ്, കൊഡിയാക് എന്നിവയുൾപ്പെടെയുള്ള പ്രദേശങ്ങളിൽ സുനാമി മുന്നറിയിപ്പ് ബാധകമാണെന്ന് ആങ്കറേജിലെ നാഷണൽ വെതർ സർവീസ് എക്‌സിൽ പോസ്റ്റ് ചെയ്തു. അതേസമയം കെനായ് പെനിൻസുല ബറോയെ ബാധിക്കില്ലെന്ന് പ്രതീക്ഷിക്കുന്നതായി എൻഒഎഎ അറിയിച്ചു.

ALSO READ: ഐസ്‌ലാൻഡിൽ വീണ്ടും അഗ്നിപർവ്വത സ്ഫോടനം; ലാവ പ്രവാഹം, ബ്ലൂ ലഗൂൺ, ഗ്രിൻഡാവിക് എന്നിവിടങ്ങളിൽനിന്ന് ആളുകളെ ഒഴിപ്പിക്കുന്നു

സാൻഡ് പോയിന്റിലെ താമസക്കാരോട് "ഇപ്പോൾ തന്നെ മാറിത്താമസിക്കാൻ" ഉത്തരവിട്ടിട്ടുണ്ട്. അധികം വൈകാതെ സുനാമി ഈ പ്രദേശത്ത് എത്തുമെന്നാണ് കണക്കാക്കുന്നത്. അടിയന്തര സേവനങ്ങൾ സ്ഥിതിഗതികൾ സജീവമായി നിരീക്ഷിച്ചുകൊണ്ടിരിക്കുകയാണ്. തീരദേശളിലെ താമസക്കാർ ജാഗ്രത പാലിക്കാനും, ആവശ്യമായ മുൻകരുതൽ എടുക്കാനും നിർദേശം നൽകിയിട്ടുണ്ട്.