ചെന്നൈ: തമിഴക രാഷ്ട്രീയത്തില്‍ പുതിയ താരയുദ്ധത്തിന് കളമൊരുങ്ങുന്നുവോ? 2026ലെ നിയമസഭാ തെരഞ്ഞെടുപ്പിന് മുന്നോടിയായി കളം പിടിക്കാന്‍ ടിവികെ നേതാവും നടനുമായ വിജയ് തമിഴ്‌നാട് പര്യടനം ആരംഭിച്ച ദിവസം തന്നെ മുഖ്യമന്ത്രി സ്റ്റാലിനെ പുകഴ്ത്തി രംഗത്തെത്തിയിരിക്കുകയാണ് സൂപ്പര്‍സ്റ്റാര്‍ രജനികാന്ത്. ഇന്ത്യന്‍ രാഷ്ട്രീയത്തിലെ നക്ഷത്രമാണ് സ്റ്റാലിനെന്നും, പഴയതും പുതിയതുമായ എതിരാളികള്‍ക്ക് അദ്ദേഹം വെല്ലുവിളിയാണെന്നും രജനീകാന്ത് പറഞ്ഞു. 

സംഗീത പ്രതിഭ ഇളയരാജയെ ആദരിക്കുന്ന ചടങ്ങിലാണ് സ്റ്റാലിനെ വാനോളം പുകഴ്ത്തി രജിനീകാന്ത് രംഗത്തെത്തിയത്. 'എന്റെ പ്രിയ സുഹൃത്താണ് സ്റ്റാലിന്‍. ഇന്ത്യന്‍ രാഷ്ട്രീയത്തിലെ നക്ഷത്രമാണ് അദ്ദേഹം. പഴയ-പുതിയ എതിരാളികള്‍ക്ക് എന്നും വെല്ലുവിളി ഉയര്‍ന്നുന്ന ആള്‍. വരൂ 2026ല്‍ കാണാം എന്ന് ചിരിച്ചുകൊണ്ട് പറയുന്ന ആളാണ് സ്റ്റാലിന്‍,' രജനി പറഞ്ഞു. 

പ്രസംഗത്തിലെ പുതിയ എതിരാളികള്‍ പരാമര്‍ശം വിജയിയെയാണ് ഉദ്ദേശിച്ചതെന്ന് ആരാധകര്‍ പറയുന്നു. നേരത്തെ തന്നെ വിജയ്-രജനി ആരാധകര്‍ക്കിടയില്‍ പോര്‍വിളികളും, മത്സരങ്ങളും നടക്കുന്നുണ്ട്. തമിഴ്‌നാട്ടില്‍ ദ്രാവിഡ പാര്‍ട്ടികളെയും, ബിജെപിയെയും ഒരുപോലെ കടന്നാക്രമിച്ച് രാഷ്ട്രീയത്തില്‍ കളം നിറയാനുള്ള ശ്രമത്തിലാണ് വിജയ്. മൂന്ന് ആഴ്ച്ചകള്‍ക്ക് മുന്‍പ് തമിഴക വെട്രി കഴകത്തിന്റെ രണ്ടാം സംസ്ഥാന സമ്മേളനത്തില്‍ മൂവരെയും കനത്ത ഭാഷയില്‍ തന്നെ വിജയ് വിമര്‍ശിച്ചിരുന്നു. 

ALSO READ: കത്തിയെരിച്ചത് ഹിൽട്ടണും ഹയാത്ത് റീജൻസിയുമുൾപ്പെടെയുള്ള പഞ്ചനക്ഷത്ര ഹോട്ടലുകൾ; 'ജെൻ സി' വരുത്തിവച്ചത് 25 ബില്യൺ രൂപയുടെ നാശനഷ്ടം

2026ലെ തെരഞ്ഞെടുപ്പ് വിജയ്ക്കും, സ്റ്റാലിനും ഒരുപോലെ നിര്‍ണായകമാണ്. കമല്‍ ഹാസന്‍, ശരത് കുമാര്‍ അടക്കമുള്ള മറ്റ് താരങ്ങളെ പോലെ രാഷ്ട്രീയത്തില്‍ ആളിക്കത്താന്‍ സാധിക്കാതെ വിജയ് തോറ്റുമടങ്ങുമെന്നാണ് ഡിഎംകെ കണക്ക് കൂട്ടുന്നത്. എന്നാല്‍ ഒന്ന്, രണ്ട് സമ്മേളനങ്ങളിലൂടെ തമിഴ് മക്കള്‍ക്കിടയില്‍ തന്റെ സ്ഥാനം എന്താണെന്ന് ആരാധകരുടെ ദളപതി ലോകത്തിന് കാണിച്ച് കൊടുത്തു. ഇതോടെ വിജയ് യെ പ്രതിരോധിക്കാനുള്ള ശ്രമങ്ങളിലേക്ക് ഡിഎംകെ, അണ്ണാ ഡിഎംകെ, ബിജെപി അടക്കമുള്ള കക്ഷികള്‍ കടന്നു. 

ഇതിന്റെ ഭാഗമാണ് രജനീകാന്തിനെ മുന്‍ നിര്‍ത്തിയുള്ള കളിയെന്നാണ് വിമര്‍ശനമുയരുന്നത്. മോദി സ്തുതിയുടെ പേരിലും, കേന്ദ്ര സര്‍ക്കാര്‍ വിധേയത്തത്തിന്റെ പേരിലും ഏറെ പഴി കേട്ട ആളാണ് രജനി. അദ്ദേഹം നേരിട്ട് സ്റ്റാലിനെ പുകഴ്ത്തിയതാണ് വിവാദം ചൂടുപിടിപ്പിച്ചത്. 

actor rajinikanth has praised tamil nadu chief minister mk stalin