പത്തനംതിട്ട: ഹണിട്രാപ്പില്‍ കുടുക്കി യുവാക്കളെ അതിക്രൂരമായി മര്‍ദ്ദിച്ച സംഭവത്തില്‍ പത്തനംതിട്ട ചരല്‍കുന്ന് സ്വദേശികളായ ദമ്പതികള്‍ അറസ്റ്റില്‍. ആലപ്പുഴ, റാന്നി സ്വദേശികളായ യുവാക്കളെ ക്രൂരമായി പീഡിപ്പിച്ച സംഭവത്തിലാണ് ദമ്പതികളായ ജയേഷും ഭാര്യ രശ്മിയും അറസ്റ്റിലായത്. 

സമാനതകളില്ലാത്ത പീഡനമാണ് യുവാക്കള്‍ നേരിട്ടതെന്നാണ് ലഭിക്കുന്ന വിവരം. രശ്മിയുമായി സൗഹൃദത്തിലുള്ള യുവാക്കളെ പ്രണയം നടിച്ച് വീട്ടിലേക്ക് ക്ഷണിക്കുകയായിരുന്നു. പിന്നാലെ വിവസ്ത്രരാക്കി യുവതിയുമായി ലൈംഗികബന്ധത്തിലേര്‍പ്പെടുന്ന തരത്തില്‍ അഭിനയിപ്പിച്ച് ദൃശ്യങ്ങള്‍ പകര്‍ത്തി. ഇതിനു പിന്നാലെയാണ് ക്രൂരമര്‍ദ്ദനത്തിനിരയാക്കിയത്. 

യുവാവിനെ കെട്ടിത്തൂക്കിയായിരുന്നു മര്‍ദ്ദനം. ജനനേന്ദ്രിയത്തില്‍ മുളക് സ്േ്രപ അടിച്ചുവെന്നും സ്റ്റേപ്ലയര്‍ അടിച്ചുവെന്നും യുവാവ് പറഞ്ഞു. 23 സ്റ്റേപ്ലയര്‍ പിന്നുകളാണ് യുവാവിന്റെ ജനനേന്ദ്രിയത്തില്‍ അടിച്ചത്. നഖം പ്ലയര്‍ ഉപയോഗിച്ച് അമര്‍ത്തി. കമ്പിവടികൊണ്ട് പുറത്തും കൈമുട്ടിനും കാലിനും ശക്തിയായി അടിച്ചുവേദനിപ്പിച്ചുവെന്നും കരഞ്ഞാല്‍ കൊന്ന് കുഴിച്ചുമൂടുമെന്നും ഭീഷണിപ്പെടുത്തി. യുവാവിന്റെ കയ്യിലുണ്ടായിരുന്ന രണ്ട് മൊബൈല്‍ ഫോണും 17,000 രൂപയും ഇവര്‍ തട്ടിയെടുക്കുകയും ചെയ്തു.

പിന്നീട് യുവാവിനെ റോഡില്‍ ഉപേക്ഷിച്ചു. ഓട്ടോറിക്ഷ തൊഴിലാളികളാണ് ആശുപത്രിയിലെത്തിച്ചത്. 

ആശുപത്രി അധികൃതര്‍ പൊലിസില്‍ വിവരമറിയിക്കുകയായിരുന്നു. എന്താണ് സംഭവിച്ചതെന്ന്  നാണക്കേട് കാരണം യുവാവ് കൃത്യമായി പൊലിസിനോട് പറഞ്ഞിരുന്നില്ല. സംശയം തോന്നി നടത്തിയ അന്വേഷണത്തിലാണ് ദമ്പതികള്‍ പിടിയിലായത്. പ്രതികള്‍ സൈക്കോ മനോനിലയുള്ളവരെന്നാണ് പൊലിസ് പറയുന്നത്. ആലപ്പുഴ ജില്ലയില്‍ നിന്നുള്ള മറ്റൊരു യുവാവിനും സമാന അനുഭവം നേരിട്ടിരുന്നു.

യുവാവിന്റെ ദേഹമാസകലം ഗുരുതര പരുക്കുകളാണുള്ളത്. മര്‍ദനത്തില്‍ ആലപ്പുഴ സ്വദേശിയുടെ ഒരു കണ്ണിന്റെ കാഴ്ച ഭാഗികമായി നഷ്ടപ്പെട്ടു. നട്ടെല്ലിന് പൊട്ടലുണ്ട്. വാരിയെല്ലിനും പൊട്ടലുണ്ട്.