ന്യൂയോര്‍ക്ക്: ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുറഹ്മാന്‍ ബിന്‍ ജാസിം ആല്‍ ഥാനി യു.എസ് പ്രസിഡന്റ് ഡൊണാള്‍ഡ് ട്രംപുമായി ന്യൂയോര്‍ക്കില്‍ കൂടിക്കാഴ്ച നടത്തി. ഖത്തര്‍ വിദേശകാര്യമന്ത്രി ഷെയ്ഖ് മുഹമ്മദും യു.എസ് വൈസ് പ്രസിഡന്റ് ജെ.ഡി വാന്‍സും സ്റ്റേറ്റ് സെക്രട്ടറി മാര്‍കോ റൂബിയോയും കൂടിക്കാഴ്ചയില്‍ പങ്കെടുത്തു. 

യു.എസ് പ്രസിഡന്റ് ഡൊണാള്‍ഡ് ട്രംപ് പിന്നീട് ഖത്തര്‍ പ്രധാനമന്ത്രിക്കും സംഘത്തിനും അത്താഴ വിരുന്നു നല്‍കി. വിരുന്നുനല്‍കിയ വിവരം വൈറ്റ് ഹൗസ് സ്ഥിരീകരിച്ചു. ഖത്തര്‍ ഡെപ്യൂട്ടി ചീഫ് ഓഫ് മിഷന്‍ ഹമദ് അല്‍ മുഫ്താഹും മികച്ച അത്താഴവിരുന്നാണ് പ്രസിഡന്റ് ട്രംപ് നല്‍കിയതെന്ന് എക്‌സില്‍ കുറിച്ചു.

ഖത്തറില്‍ ഇസ്‌റാഈല്‍ യു.എസിന്റെ അറിവോടെ ആക്രമണം നടത്തി അഞ്ചുപേരെ കൊലപ്പെടുത്തിയതിന് ഏതാനും ദിവസത്തിനകമാണ് ഖത്തര്‍ പ്രധാനമന്ത്രി യു.എസിലെത്തി ട്രംപിനെ കണ്ടത്. ഖത്തര്‍ യു.എസിന്റെ സഖ്യകക്ഷിയാണ്. ഗള്‍ഫിലെ യു.എസിന്റെ ഏറ്റവും വലിയ വ്യോമതാവളം പ്രവര്‍ത്തിക്കുന്നത് ഖത്തറിലാണ്. 

അത്താഴ വിരുന്നിനു മുമ്പാണ് ഖത്തര്‍ പ്രധാനമന്ത്രി യു.എസ് വൈസ് പ്രസിഡന്റ് ജെ.ഡി വാന്‍സിനെയും സ്റ്റേറ്റ് സെക്രട്ടറി മാര്‍കോ റൂബിയോയെയും വൈറ്റ്ഹൗസില്‍ കണ്ടത്. ഇസ്‌റാഈല്‍ ആക്രമണത്തെ കുറിച്ച് ഈ യോഗത്തില്‍ ചര്‍ച്ചയുണ്ടായി. യു.എസ്- ഖത്തര്‍ സുരക്ഷാ കരാറിനെ കുറിച്ചും ചര്‍ച്ച നടന്നു. ഇസ്‌റാഈല്‍ ഖത്തറിനെ ആക്രമിച്ചതില്‍ തങ്ങള്‍ നിരാശരാണെന്ന് ട്രംപ് പറഞ്ഞിരുന്നു. ഇസ്‌റാഈലും ഹമാസും തമ്മില്‍ നടക്കുന്ന വെടിനിര്‍ത്തല്‍ ചര്‍ച്ചയെ ഇത് പ്രതികൂലമായി ബാധിക്കുമെന്നും ട്രംപ് പറഞ്ഞു.