ഇന്ത്യൻ സ്റ്റാർ പേസർ മുഹമ്മദ് സിറാജിനെ പ്രശംസിച്ചുകൊണ്ട് സംസാരിക്കുകയാണ് ഇന്ത്യൻ ടീം അസിസ്റ്റന്റ് കോച്ച് റയാൻ ടെൻ ഡോഷേറ്റ്. സിറാജിനെ പോലെയൊരു താരത്തെ ഇന്ത്യക്ക് ലഭിച്ചത് ഭാഗ്യമാണെന്നാണ് റയാൻ ടെൻ ഡോഷേറ്റ് പറഞ്ഞത്. ഇതിന് പുറമെ സിറാജിനെ 'സിംഹം' എന്നും ഇന്ത്യൻ അസിസ്റ്റന്റ് കോച്ച് വിശേഷിപ്പിച്ചു.

''ബുംറയെക്കുറിച്ച് സംസാരിക്കുന്നതിന് മുമ്പ് നമുക്ക് ആദ്യം സിറാജിൽ നിന്ന് തുടങ്ങാം. സിറാജിനെ പോലുള്ള ഒരു താരത്തെ ലഭിച്ചത് എത്ര ഭാഗ്യമാണെന്ന് ഒരു പരിധിവരെ ഞാൻ കരുതുന്നു. ഒരു ഫാസ്റ്റ് ബൗളറിൽ നിന്ന് പ്രതീക്ഷിക്കുന്ന റിസൾട്ട് അദ്ദേഹത്തിന് എല്ലായ്പ്പോഴും ലഭിക്കില്ലെന്ന് എനിക്കറിയാം. എന്നാൽ ഹൃദയത്തിന്റെ കാര്യത്തിൽ സിറാജ് ഒരു സിംഹത്തെപ്പോലെയാണ്. പന്ത് സിറാജിന്റെ കയ്യിൽ ഉള്ളപ്പോഴെല്ലാം എന്തെങ്കിലും സംഭവിക്കാൻ പോകുന്നതുപോലെ എല്ലായ്പ്പോഴും തോന്നും" ടെൻ ഡോഷേറ്റ് പറഞ്ഞു. 

നിലവിൽ നടന്നുകൊണ്ടിരിക്കുന്ന ഇംഗ്ലണ്ടിനെതിരെയുള്ള ടെസ്റ്റിൽ സിറാജ് മികച്ച ഫോമിലാണ് കളിക്കുന്നത്. ബിർമിങ്ഹാമിൽ നടന്ന രണ്ടാം ടെസ്റ്റിൽ ഒന്നാം ഇന്നിങ്സിൽ ആറ് വിക്കറ്റുകൾ നേടിയാണ് സിറാജ് തിളങ്ങിയിരുന്നത്.  19.3 ഓവറിൽ മൂന്ന് മെയ്ഡൻ ഓവറുകൾ ഉൾപ്പെടെ 70 റൺസ് വിട്ടു നൽകിയാണ് സിറാജ് 6 വിക്കറ്റുകൾ സ്വന്തമാക്കിയത്.

ഇതോടെ ടെസ്റ്റ് ക്രിക്കറ്റിൽ ഒരു മത്സരത്തിൽ ബിർമിങ്ഹാമിൽ 5+ വിക്കറ്റുകൾ സ്വന്തമാക്കുന്ന നാലാമത്തെ ഇന്ത്യൻ താരമായി മാറാനും സിറാജിന് സാധിച്ചു. ഇഷാന്ത് ശർമ, ചേതൻ ശർമ, കപിൽ ദേവ് എന്നിവർ മാത്രമാണ് ഈ വേദിയിൽ അഞ്ച് വിക്കറ്റുകൾ നേടിയിട്ടുള്ളൂ. ഇഷാന്ത്‌ ശർമ 2018ലും ചേതൻ ശർമ 1986ലും കപിൽദേവ് 1979ലുമാണ്‌ ഫൈഫർ നേടിയത്. മത്സരത്തിൽ സിറാജിനു പുറമേ ഇന്ത്യയ്ക്ക് വേണ്ടി ആകാശ് ദീപ്  നാല് വിക്കറ്റുകളും സ്വന്തമാക്കി.

നിലവിൽ പരമ്പരയിൽ ഇംഗ്ലണ്ട് 2-1ന് മുന്നിലാണ്. ആദ്യ മത്സരത്തിൽ ഇംഗ്ലണ്ട് വിജയിച്ചപ്പോൾ രണ്ടാം മത്സരത്തിൽ ഇന്ത്യ വിജയിച്ചുകൊണ്ട് പരമ്പരയിൽ ഒപ്പം പിടിക്കുകയായിരുന്നു. മൂന്നാം മത്സരത്തിൽ ബെൻ സ്റ്റോക്‌സും സംഘവും വീണ്ടും വിജയിച്ചുകൊണ്ട് പരമ്പരയിൽ മുന്നിലെത്തുകയായിരുന്നു. ജൂലൈ 23 മുതൽ 27 വരെയാണ് നാലാം ടെസ്റ്റ് നടക്കുന്നത്. മാഞ്ചെസ്റ്ററിലാണ് മത്സരം നടക്കുക. 

Indian team assistant coach Ryan ten Dochette is speaking in praise of Indian star pacer Mohammed Siraj Ryan ten Dochette said that India is lucky to have a player like Siraj