അർജന്റൈൻ ഇതിഹാസം ലയണൽ മെസിയെക്കുറിച്ച് സംസാരിക്കുകയാണ് മുൻ ബാഴ്സലോണ താരം ഇവാൻ റാക്കിറ്റിച്ച്. ഫുട്ബോളിൽ 20 വർഷത്തോളം സ്ഥിരതയാർന്ന പ്രകടനം നടത്തിയ താരം മെസി മാത്രമാണെന്നാണ് ഇവാൻ റാക്കിറ്റിച്ച് അഭിപ്രായപ്പെട്ടത്. ബാഴ്സ യൂണിവേഴ്സലിന് നൽകിയ അഭിമുഖത്തിലാണ് മുൻ ബാഴ്സലോണ താരം ഇക്കാര്യം പറഞ്ഞത്. 

''തീർച്ചയായും ഫുട്ബോളിൽ ഞാൻ കണ്ടതും കാണാത്തതുമായ ഒരുപാട് കാര്യങ്ങളുണ്ട്. മറഡോണ, പെലെ തുടങ്ങിയ മറ്റ് ഇതിഹാസ താരങ്ങളുടെ കളികൾ ഞാൻ കണ്ടിട്ടില്ല. എന്നാൽ ചെറുപ്പത്തിൽ തന്നെ കളിച്ചുകൊണ്ട്  20 വർഷത്തിലേറെയായി ഒരേ കാര്യങ്ങൾ ചെയ്തുകൊണ്ടിരിക്കുന്ന ഒരാൾ മാത്രമേ ഫുട്ബോളിൽ ഉള്ളൂ. അത് മെസിയാണ്'' ഇവാൻ റാക്കിറ്റിച്ച് പറഞ്ഞു.

ഫുട്ബോളിൽ ലയണൽ മെസിക്കൊപ്പം ഏറ്റവും കൂടുതൽ തവണ ഒരുമിച്ച് കളിച്ച താരങ്ങളിൽ ഒരാളാണ് റാക്കിറ്റിച്ച്.  ബാഴ്‌സലോണയിൽ മെസിക്കൊപ്പം 277 മത്സരങ്ങളിലാണ് റാക്കിറ്റിച്ച് ഒരുമിച്ച് കളിച്ചത്. ഇതിൽ 27 ഗോളുകളാണ് ഇരുവരും ചേർന്ന് നേടിയത്. ഓരോ മത്സരങ്ങളിലും ശരാശരി 2.35 പോയിന്റുകൾ ആണ് ഇരുവരും സ്വന്തമാക്കിയത്. 

അതേസമയം മെസി ഇപ്പോഴും ഫുട്ബോളിൽ മിന്നും പ്രകടനങ്ങളാണ് തന്റെ ടീമിന് വേണ്ടി നടത്തിക്കൊണ്ടിരിക്കുന്നത്. മെസി നിലവിൽ മേജർ ലീഗ് സോക്കർ ക്ലബായ ഇന്റർ മയാമിക്ക് വേണ്ടിയാണ് കളിക്കുന്നത്. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. 

Former Barcelona star Ivan Rakitic is talking about Argentine legend Lionel Messi Ivan Rakitic has said that Messi is the only player in football who has performed consistently for 20 years