മുംബൈ: എഡ്യൂടെക് പ്ലാറ്റ്‌ഫോമായ ബ്രൈറ്റ് ചാംപ്‌സ് (BrightCHAMPS) വിദ്യാര്‍ഥികളുടെ എഐ ഉപയോഗത്തെ കുറിച്ച് നടത്തിയ സര്‍വേയുടെ റിപ്പോര്‍ട്ട് പുറത്തുവന്നു. ഇന്ത്യ, വിയറ്റ്‌നാം, ഇന്തോനേഷ്യ, യുഎഇ, യുഎസ് എന്നിവ ഉള്‍പ്പെടെ 29 രാജ്യങ്ങളിലായി 1,425 വിദ്യാര്‍ഥികളാണ് സര്‍വേയില്‍ പങ്കെടുത്തത്. സര്‍വേയില്‍ പങ്കെടുത്ത വിദ്യാര്‍ഥികളുടെ എണ്ണം വളരെ കുറവാണെങ്കിലും വിദ്യാഭ്യാസ രംഗത്ത് എഐ ഉപയോഗിക്കുന്നതില്‍ പുതിയ തലമുറയ്ക്കുള്ള താത്പര്യം ഈ പഠനം അടിവരയിടുന്നുണ്ട്. ചില ന്യൂനതകളും വിദ്യാര്‍ഥികളുടെ എഐ ഉപയോഗത്തിനുണ്ടെന്നും എന്ന് റിപ്പോര്‍ട്ടില്‍ കാണാം.

ബ്രൈറ്റ് ചാംപ്‌സ് സര്‍വേ ഫലങ്ങള്‍ വിശദമായി

 ആഗോളതലത്തില്‍ 58 ശതമാനം വിദ്യാര്‍ഥികളും വിദ്യാഭ്യാസ ആവശ്യങ്ങള്‍ക്കായി (പ്രത്യേകിച്ച് ഹോം വര്‍ക്കുകള്‍ ചെയ്യാന്‍, അസൈന്‍മെന്റുകള്‍ പൂര്‍ത്തിയാക്കാന്‍, അറിവ് വര്‍ധിപ്പിക്കാന്‍) എന്നിവയ്ക്ക് എഐ ഉപയോഗിക്കുന്നു.

ഇന്ത്യന്‍ വിദ്യാര്‍ഥികളില്‍ 95 ശതമാനം പേരും പറയുന്നത് വിദ്യാഭ്യാസ കാര്യത്തില്‍ തട്ടിപ്പ് നടത്താന്‍ ഒരിക്കല്‍പ്പോലും എഐ ഉപയോഗിച്ചിട്ടില്ല എന്നാണ്. ലോകമെമ്പാടുമുള്ള 86 ശതമാനം വിദ്യാര്‍ഥികളും ഇതേ കാര്യം ആവര്‍ത്തിക്കുന്നുണ്ട്.

 ഇന്ത്യന്‍ വിദ്യാര്‍ഥികളില്‍ 38 ശതമാനവും എഐ കാരണം ജോലി സാധ്യത, ഭാവിയെക്കുറിച്ച് ആശങ്കാകുലരാണ്. ആഗോളതലത്തില്‍ ഇതേ ഭയം 36 ശതമാനം പേരും പങ്കുവയ്ക്കുന്നുണ്ട്.

 മൂന്നിലൊന്ന് പേര്‍ പതിവായി എഐ ഉപയോഗിക്കുന്നുണ്ടെങ്കിലും ആഗോളതലത്തില്‍ 34 ശതമാനം വിദ്യാര്‍ഥികള്‍ക്ക് മാത്രമേ എഐ എങ്ങനെ പ്രവര്‍ത്തിക്കാമെന്ന് അറിയുകയുള്ളൂ.

വിദ്യാര്‍ഥികളില്‍ 56 ശതമാനം പേരും പറയുന്നത് എഐ തരംഗത്തില്‍ വഴികാട്ടാന്‍ മറ്റുള്ളവരുടെ സഹായം ആവശ്യമാണെന്നാണ്.

 ഒരു ദ്രുത പരിഹാരമായോ കുറുക്കുവഴിയായോ അല്ല, മറിച്ച് ഒരു പഠന സഹായി എന്ന നിലയിലാണ് വിദ്യാര്‍ഥികള്‍ എഐയെ പ്രയോജനപ്പെടുത്തുന്നത്.

ഹോംവര്‍ക്കുകള്‍ ചെയ്യാനാണ് വിദ്യാര്‍ഥികള്‍ ഏറ്റവും കൂടുതല്‍ എഐ ഉപയോഗിക്കുന്നത.്

 ഇന്ത്യയില്‍ 63 ശതമാനം വിദ്യാര്‍ഥികള്‍ പതിവായി എഐ ഉപയോഗിക്കുന്നുണ്ട്. ഏറ്റവും കൂടുതല്‍ ഉപയോഗിക്കുന്ന എഐ ടൂള്‍ ചാറ്റ് ജിപിടിയാണ്.

 എഐ ഉപയോഗം വര്‍ധിക്കുമ്പോഴും ലോകമെമ്പാടുമുള്ള 29 ശതമാനം വിദ്യാര്‍ഥികള്‍ എഐ നല്‍കുന്ന ഉത്തരങ്ങള്‍ ക്രോസ്‌ചെക്ക് ചെയ്യുന്നില്ല. 20 ശതമാനം പേര്‍ എഐ ടൂളുകളില്‍ നിന്നുള്ള തെറ്റായ ഉത്തരങ്ങള്‍ വിശ്വസിക്കുന്നതായി സമ്മതിക്കുന്നു.

 ഇന്ത്യയില്‍ 50 ശതമാനം വിദ്യാര്‍ഥികളും എഐ ജനറേറ്റഡ് ഉള്ളടക്കവും യഥാര്‍ഥ വിവരങ്ങളും തമ്മില്‍ വേര്‍തിരിച്ചറിയാന്‍ പാടുപെടുന്നു.

വിദ്യാര്‍ഥികള്‍ക്ക് വേണ്ടത് എന്താണ് ?

75 ശതമാനം ഇന്ത്യന്‍ വിദ്യാര്‍ഥികളും സ്‌കൂള്‍ പാഠ്യപദ്ധതിയുടെ ഭാഗമായി കൃത്രിമ ബുദ്ധി (ആര്‍ട്ടിഫിഷ്യല്‍ ഇന്റലിജന്‍സ്) ഉള്‍പ്പെടുത്തണമെന്ന് വിശ്വസിക്കുന്നു. 10 ശതമാനം പേര്‍ക്ക് മാത്രമേ തങ്ങളുടെ എഐ പരിജ്ഞാനത്തില്‍ ആത്മവിശ്വാസമുള്ളൂ. വിദ്യാര്‍ഥികള്‍ കൂടുതല്‍ മെച്ചപ്പെട്ട എഐ ഉപകരണങ്ങള്‍ മാത്രമല്ല ആവശ്യപ്പെടുന്നതെന്നും മികച്ച സപ്പോര്‍ട്ട് സിസ്റ്റം അവര്‍ തേടുന്നതായും റിപോര്‍ട്ട് പറയുന്നു.