തിരുവനന്തപുരം: സമരവും കലഹവും നിറഞ്ഞ സംഭവബഹുലമായ പൊതുജീവിതത്തിനിടയിൽ രാഷ്ട്രീയ റെക്കോഡുകളും തീർത്താണ് വി.എസ് മടങ്ങുന്നത്. കേരള ചരിത്രത്തിൽ പൊതുവായും സി.പി.എമ്മിന്റെ രാഷ്ട്രീയ ചരിത്രത്തിൽ പ്രത്യേകമായും നിരവധി റെക്കോഡുകൾ വി.എസിന്റെ പേരിലായുണ്ട്. സംസ്ഥാനത്തിന്റെ ഇതുവരെയുള്ള ചരിത്രത്തിൽ ഏറ്റവും പ്രായം കൂടിയ മുഖ്യമന്ത്രി എന്ന റെക്കോഡ് വി.എസിന്റെ പേരിലാണ്. 2006 മെയ് 18ന് കേരളത്തിന്റെ പതിനൊന്നാമത് മുഖ്യമന്ത്രിയായി സത്യപ്രതിജ്ഞ ചെയ്യുമ്പോൾ 83 വയസായിരുന്നു പ്രായം. കേരള നിയമസഭാ ചരിത്രത്തിൽ ഏറ്റവും കൂടുതൽ കാലം പ്രതിപക്ഷ നേതാവായിരുന്ന സി.പി.എം നേതാവും വി.എസാണ്. 

മൂന്ന് നിയമസഭാ കാലയളവുകളിലായി ആകെ 5150 ദിവസമാണ് പ്രതിപക്ഷ സ്ഥാനത്തിരുന്നത്. പതിനാലാം കേരള നിയമസഭയിലെ ഏറ്റവും പ്രായം കൂടിയ നിയമസഭാംഗവും വി.എസായിരുന്നു. കഴിഞ്ഞ നിയമസഭാ കാലയളവ് അവസാനിച്ച 2021ൽ 97 വയസായിരുന്നു പ്രായം. 

ALSO READ: വി.എസിനെ ഒരുനോക്കുകാണാന്‍ ഒഴുകിയെത്തി ജനസാഗരം

ഏറ്റവും കൂടുതൽ തവണ മലമ്പുഴയിൽ നിന്ന് നിയമസഭാംഗമായ സി.പി.എം നേതാവും വി.എസാണ്. 2001 മുതൽ തുടർച്ചയായി 20 വർഷമാണ് മലമ്പുഴയിൽ നിന്ന് നിയമസഭയിലെത്തിയത്. ഭരണപരിഷ്‌കാര കമ്മിഷന്റെ ഇതുവരെയുള്ള ചരിത്രത്തിലെ ഏറ്റവും പ്രായം കൂടിയ ചെയർമാനും വി.എസാണ്. 

2016 മെയ് 25ൽ ചുമതലയേൽക്കുമ്പോൾ 93 വയസായിരുന്നു പ്രായം. പിണറായി വിജയനും (17 വർഷം) ഇ.കെ നായനാർക്കും (13 വർഷം) ശേഷം ഏറ്റവും കൂടുതൽ കാലം കേരളത്തിൽ സി.പി.എം സംസ്ഥാന സെക്രട്ടറി പദവി വഹിച്ചതും വി.എസാണ്. 1980 മുതൽ 1991 വരെ 11 വർഷമാണ് വി.എസ് പാർട്ടി സെക്രട്ടറി ആയത്.