തിരുവനന്തപുരം: വിവാദമായ ഫോൺ സംഭാഷണത്തിൽ അകപ്പെട്ട് പാലോട് രവി രാജിവെച്ചതിന് പിന്നാലെ തിരുവനന്തപുരം ജില്ലാ കോൺഗ്രസ് അധ്യക്ഷ സ്ഥാനത്തേക്ക് താൽക്കാലിക അധ്യക്ഷനെ നിയമിക്കാൻ കോൺഗ്രസ് നേതൃത്വം തീരുമാനിച്ചു. ഒരു മാസത്തിനുള്ളിൽ പുനഃസംഘടന പൂർത്തിയാകുമ്പോൾ പുതിയ അധ്യക്ഷനെ തീരുമാനിക്കും. അതുവരെ ജില്ലാ കോൺഗ്രസിനെ നയിക്കാൻ താൽക്കാലിക അധ്യക്ഷനെ തെരഞ്ഞെടുക്കും.

തദ്ദേശ തെരഞ്ഞെടുപ്പ് അടുത്തിരിക്കെ, പാലോട് രവിയുടെ ഫോൺ സംഭാഷണം പാർട്ടിക്ക് വലിയ തലവേദന സൃഷ്ടിച്ചിരുന്നു. പഞ്ചായത്ത് തെരഞ്ഞെടുപ്പിൽ കോൺഗ്രസ് മൂന്നാം സ്ഥാനത്താകുമെന്നും ചില മേഖലകളിൽ ബിജെപി രണ്ടാമതെത്തുമെന്നും പാലോട് രവി ഫോൺ സംഭാഷണത്തിൽ പറഞ്ഞതാണ് വിവാദമായത്. ഇതേത്തുടർന്ന് പാർട്ടിക്കുള്ളിൽ തന്നെ രവിക്കെതിരെ ശക്തമായ വിമർശനം ഉയർന്നു. പ്രവർത്തകരുടെ വികാരം കണക്കിലെടുത്താണ് രാജി ആവശ്യപ്പെട്ടതെന്ന് നേതൃത്വം വ്യക്തമാക്കി.

കെപിസിസി അധ്യക്ഷൻ സണ്ണി ജോസഫിന്റെ നേതൃത്വത്തിലാണ് രാജി ആവശ്യപ്പെട്ടത്. സംസ്ഥാനത്തെ പ്രമുഖ കോൺഗ്രസ് നേതാക്കളുമായി ചർച്ച നടത്തിയ ശേഷം ഹൈക്കമാൻഡിന്റെ അനുമതിയോടെയാണ് തീരുമാനം. രാജിവെച്ചില്ലെങ്കിൽ സംഘടനാ നടപടി ഉണ്ടാകുമെന്ന് പാലോട് രവിയെ അറിയിച്ചിരുന്നു. രവി സ്വമേധയാ രാജി സമർപ്പിക്കുകയായിരുന്നു. എന്നാൽ, സംഭാഷണത്തിൽ ദുരുദ്ദേശം ഉണ്ടായിരുന്നില്ലെന്നും പ്രവർത്തകനെ ഉത്തേജിപ്പിക്കാൻ വേണ്ടി പറഞ്ഞതാണെന്നും സണ്ണി ജോസഫ് മാധ്യമങ്ങളോട് വിശദീകരിച്ചു. "പാലോട് രവിക്ക് ശ്രദ്ധക്കുറവ് സംഭവിച്ചു, പക്ഷേ ദുരുദ്ദേശം ഇല്ലായിരുന്നു," അദ്ദേഹം കൂട്ടിച്ചേർത്തു.

ALSO READ: ഓഗസ്റ്റ് 15-ന് ജയിൽചാടാൻ പദ്ധതിയിട്ടു: തമിഴ്നാട്ടിലേക്ക് രക്ഷപ്പെട്ടാൽ പിടികൂടാനാകില്ലെന്നും ഗോവിന്ദച്ചാമിയുടെ വെളിപ്പെടുത്തൽ

ഫോൺ സംഭാഷണം പുറത്തുവിട്ട വാമനപുരം ബ്ലോക്ക് ജനറൽ സെക്രട്ടറി എ. ജലീലിനെ പാർട്ടിയുടെ പ്രാഥമിക അംഗത്വത്തിൽ നിന്ന് പുറത്താക്കി. രാജി ആവശ്യപ്പെട്ടതിൽ പാർട്ടിക്കുള്ളിൽ രണ്ട് അഭിപ്രായങ്ങൾ ഉയർന്നിട്ടുണ്ട്. നടപടി പാർട്ടിക്ക് ഗുണകരമാണെന്നാണ് ഭൂരിപക്ഷാഭിപ്രായം. എന്നാൽ, സദുദ്ദേശത്തോടെ നടത്തിയ സംഭാഷണം തെറ്റായി വ്യാഖ്യാനിക്കപ്പെട്ടുവെന്ന് പാലോട് രവിയെ അനുകൂലിക്കുന്നവർ വാദിക്കുന്നു. താൽക്കാലിക അധ്യക്ഷനായി എം. വിൻസെന്റിന്റെ പേര് ഉയർന്നു കേൾക്കുന്നു. മണക്കാട് സുരേഷ്, ചെമ്പഴന്തി അനിൽ എന്നിവരുടെ പേരുകളും പരിഗണനയിലുണ്ട്. ഇതുമായി ബന്ധപ്പെട്ട് നേതൃത്വം ഉടൻ തീരുമാനമെടുക്കും.

ALSO READ: യുവതലമുറയെ വലിയ സ്വപ്നങ്ങൾ കാണാൻ പ്രചോദിപ്പിച്ച, ഇന്ത്യയുടെ 'മിസൈൽ മാൻ' ഡോ. എ.പി.ജെ അബ്ദുൾ കലാം ഓർമ്മയായിട്ട് 10 വർഷം

Following Palode Ravi's resignation due to a controversial phone conversation, the Congress party has decided to appoint an interim president for its Thiruvananthapuram district unit. A new president will be chosen within a month during the reorganization, amid internal debates and upcoming local elections