കൊച്ചി: കൊച്ചിയിൽ ഹണിട്രാപ് വഴി പണം തട്ടാൻ ശ്രമിച്ചെന്ന പ്രമുഖ ഐടി വ്യവസായിയുടെ പരാതിയിൽ അറസ്റ്റിലായ ദമ്പതികളുടെ കേസിൽ അപ്രതീക്ഷിത വഴിത്തിരിവ്. തൃശൂർ സ്വദേശിനിയായ യുവതിയെയും ഭർത്താവിനെയുമാണ് കൊച്ചി സെൻട്രൽ പൊലിസ് വ്യവസായിയുടെ പരാതിയിൽ കസ്റ്റഡിയിലെടുത്തത്. എന്നാൽ, ഹണിട്രാപ് ആരോപണം വ്യാജമാണെന്നും, വ്യവസായി തന്നെ ലൈംഗികമായി പീഡിപ്പിച്ചുവെന്നും യുവതി പൊലിസിന് മൊഴി നൽകി. കൈമാറിയ 50,000 രൂപ തന്റെ ശമ്പള കുടിശ്ശികയാണെന്നും യുവതി വ്യക്തമാക്കി. ഹണിട്രാപ് കേസിൽ പ്രതിയായ യുവതി ഇപ്പോൾ വ്യവസായിക്കെതിരെ ലൈംഗിക പീഡന പരാതി നൽകാൻ ഒരുങ്ങുകയാണ്.

ALSO READ: ഹണി ട്രാപ്പിലൂടെ പണം തട്ടാൻ ശ്രമം; കൊച്ചിയിൽ യുവതിയും ഭർത്താവും അറസ്റ്റിൽ

യുവതി വ്യവസായിയുടെ പ്രൈവറ്റ് സെക്രട്ടറിയായി ജോലി ചെയ്തിരുന്നു. വ്യവസായിയുടെ ലൈംഗിക അതിക്രമത്തെ എതിർത്തതിനെ തുടർന്ന് തന്നെ കള്ളക്കേസിൽ കുടുക്കുകയായിരുന്നുവെന്ന് യുവതിയുടെ അഭിഭാഷകൻ അഡ്വ. പ്രമോദ് മാധ്യമങ്ങളോട് പറഞ്ഞു. ലൈംഗിക പീഡനം കാരണം വിവാഹശേഷം യുവതി ജോലി രാജിവെച്ചിരുന്നു. ഇക്കാര്യം അറിഞ്ഞ യുവതിയുടെ ഭർത്താവ് വ്യവസായിക്കെതിരെ പൊലിസ് പരാതി നൽകാൻ തയ്യാറെടുത്തു. ഇതോടെയാണ് വ്യവസായി ദമ്പതിമാർക്കെതിരെ ഹണിട്രാപ് ആരോപണവുമായിപൊലിസിനെ സമീപിച്ചതെന്ന് അഭിഭാഷകൻ വെളിപ്പെടുത്തി.

ALSO READ: 20 കോടി രൂപയുടെ ഹണി ട്രാപ്പ് കേസ്; കൊച്ചിയിൽ ദമ്പതികൾ അറസ്റ്റിൽ

യുവതി ഭർത്താവിനൊപ്പം ഹോട്ടലിൽ എത്തിയത് തന്റെ സർട്ടിഫിക്കറ്റ് തിരികെ വാങ്ങാൻ വേണ്ടിയായിരുന്നുവെന്നും 20 കോടി രൂപയുടെ ചെക്ക് കൈമാറ്റം നടന്നിട്ടില്ലെന്നും അഭിഭാഷകൻ ആരോപിച്ചു. ഹോട്ടലിലെ സിസിടിവി ദൃശ്യങ്ങൾ പരിശോധിക്കാൻ പൊലിസ് തയ്യാറായില്ലെന്നും അദ്ദേഹം കുറ്റപ്പെടുത്തി. യുവതിയും ഭർത്താവും ഹോട്ടലിൽ എത്തിയ ഉടൻ പൊലിസ് ഇവരെ അറസ്റ്റ് ചെയ്യുകയായിരുന്നുവെന്നും അഡ്വ. പ്രമോദ് വ്യക്തമാക്കി. കേസിൽ യുവതിക്കും ഭർത്താവിനും എറണാകുളം ചീഫ് ജുഡീഷ്യൽ മജിസ്ട്രേറ്റ് കോടതി ജാമ്യം അനുവദിച്ചു.

കഴിഞ്ഞ ദിവസം കൊച്ചിയിലെ ഒരു ഹോട്ടലിൽ വെച്ചാണ് യുവതിയും ഭർത്താവും പൊലിസിന്റെ പിടിയിലായത്. രഹസ്യ ചാറ്റുകൾ പുറത്തുവിടുമെന്ന് ഭീഷണിപ്പെടുത്തി പണം തട്ടാൻ ശ്രമിച്ചുവെന്ന വ്യവസായിയുടെ പരാതിയിൽ പൊലിസ് ഇവരെ അറസ്റ്റ് ചെയ്തു. 30 കോടി രൂപ ആവശ്യപ്പെട്ടുവെന്നും, 50,000 രൂപ കൈമാറിയെന്നും, 10 കോടി രൂപയുടെ രണ്ട് ചെക്കുകൾ നൽകിയെന്നും ബാക്കി 10 കോടി ബാങ്ക് വഴി അയക്കാമെന്ന് പറഞ്ഞുവെന്നുമാണ് വ്യവസായിയുടെ പരാതി. എന്നാൽ, ഇവയെല്ലാം പീഡന പരാതി ഉയർന്നേക്കുമെന്ന് മനസ്സിലായതോടെ വ്യവസായി കെട്ടിച്ചമച്ച ആരോപണങ്ങളാണെന്ന് യുവതിയുടെ അഭിഭാഷകൻ വാദിക്കുന്നു.

In Kochi, a couple was arrested following an IT businessman's complaint of a honeytrap attempt to extort money. The woman, a former private secretary to the businessman, alleges the accusations are false and claims he sexually harassed her. She says the ₹50,000 received was her pending salary and denies any cheque transactions. The woman resigned after marriage due to the alleged harassment, and her husband planned to file a police complaint, prompting the businessman’s counter-claim. The couple was granted bail by the Ernakulam court. Police allegedly ignored hotel CCTV footage.