കൊണ്ടോട്ടി: വിമാനത്താവള പരിസരത്തു നിന്ന് ഒന്നരക്കിലോ കഞ്ചാവുമായി ഒരാളെ കരിപ്പൂര്‍ പൊലിസ് പിടികൂടി. മൊറയൂരില്‍ ലോഡ്ജില്‍ താമസിക്കാരനായ തച്ചങ്ങോടന്‍ മുസ്തഫ(54)യാണു കഞ്ചാവുമായി പിടിയിലായത്. വിമാനത്താവള പരിസരത്തു കഞ്ചാവു വിതരണത്തിന് ഒരുങ്ങുന്നതിനിടയിലാണ്  ഇയാള്‍ പിടിയിലായതെന്നു പൊലിസ് പറഞ്ഞു. ബാഗില്‍ കഞ്ചാവ് ഒളിപ്പിച്ച നിലയിലായിരുന്നു.
    ചാവക്കാട്, കോഴിക്കോട് കസബ, ഫറോക്ക് ഉള്‍പ്പെടെ സ്റ്റേഷനുകളില്‍ ഇയാള്‍ക്കെതിരേ കഞ്ചാവു കേസ് നിലവിലുണ്ട്. വയനാട് സ്വദേശിയായ പ്രതി ഏറെക്കാലമായി മൊറയൂരിലും പരിസരത്തുമായി താമസിച്ചുവരികയാണ്. അന്യസംസ്ഥാന തൊഴിലാളികളെയും മറ്റും ഉപയോഗിച്ചു കര്‍ണാടകമടക്കമുള്ള സംസ്ഥാനങ്ങളില്‍ നിന്നു കഞ്ചാവ് എത്തിക്കുന്ന കണ്ണിയില്‍പ്പെട്ടയാളാണ് ഇയാളെന്നു പൊലിസ് പറഞ്ഞു. പിടിച്ച കഞ്ചാവിന് 20000 രൂപ വില വരും. മൊത്തമായും, ചില്ലറയായും ഇയാള്‍ കഞ്ചാവു വില്‍ക്കാറുണ്ടന്നു പൊലിസ് പറഞ്ഞു. 10 ഗ്രാം പൊതിക്കു 500രൂപ വരെ ഈടാക്കുന്നുണ്ട്. പ്രതിയെ കോടതി റിമാന്‍ഡ് ചെയ്തു.