തിരൂര്‍: കാറും പണവും തട്ടിയെടുത്ത കേസില്‍ യുവാവ് അറസ്റ്റില്‍. തിരൂരങ്ങാടി മൂന്നിയൂര്‍ സ്വദേശി കല്ലാക്കല്‍ ഫൈസലി (32) നെയാണ് താനൂര്‍ പൊലിസ് അറസ്റ്റ് ചെയ്തത്. നിരവധി പേരുടെ വാഹനവും പണവും കവര്‍ന്നെന്ന പരാതിയില്‍ നാലു കേസുകളും മൈസൂര്‍ സ്വദേശിയില്‍നിന്നു 15 ലക്ഷം രൂപ തട്ടിപ്പ് നടത്തിയെന്ന പരാതിയില്‍ ഒരു കേസും രജിസ്റ്റര്‍ ചെയ്തിട്ടുണ്ട്.
തിങ്കളാഴ്ച രാത്രി മൂന്നിയൂരില്‍വച്ചാണ് പ്രതിയെ കസ്റ്റഡിയിലെടുത്തത്. ഇരിങ്ങല്ലൂര്‍ പുത്തന്‍പറമ്പത്ത് ചുരാല പിലാക്കല്‍ മുഹമ്മദ് ഫൈസലിന്റെ  പരാതിയിലാണ് അറസ്റ്റ്. ഇയാളുടെ ഭാര്യാ പിതാവില്‍നിന്നു കാര്‍ താല്‍ക്കാലികമായി വാങ്ങിയ ശേഷം വാഹനവുമായി മുങ്ങിയെന്നാണ് കേസ്.
കാര്‍ തിരിച്ച് ആവശ്യപെട്ടപ്പോള്‍ ഭീഷണിപ്പെടുത്തിയതായും പരാതിയില്‍ പറയുന്നു. തുടര്‍ന്നു നടത്തിയ അന്വേഷണത്തിലാണ് പ്രതി പിടിയിലായത്.
ഇയാളെ അറസ്റ്റ് ചെയ്ത വിവരത്തെ തുടര്‍ന്നാണ് മൈസൂര്‍ സ്വദേശി ചെവ്വാഴ്ച പൊലിസ് സ്റ്റേഷനില്‍ എത്തി പരാതി നല്‍കിയത്.
ഇയാളില്‍നിന്നു ബിസിനസില്‍ പങ്കാളിത്തം നല്‍കാമെന്നു പറഞ്ഞ് വിശ്വസിപ്പിച്ച് 15 ലക്ഷം രൂപ തട്ടിയെന്നാണ് കേസ്.
പ്രതിയുടെ അറസ്റ്റ് വിവരം അറിഞ്ഞ് തട്ടിപ്പിനിരയായ കൂടുതല്‍ ആളുകള്‍ പരാതിയുമായി സ്റ്റേഷനില്‍ വരുന്നുണ്ടന്ന് പൊലിസ് പറഞ്ഞു.