സഊദി പ്രോ ലീഗിന്റെ പുതിയ സീസണിന് മുന്നോടിയായി സഊദി സൂപ്പർ കപ്പാണ് അൽ നസറിന്റെ മുന്നിലുള്ളത്. നാളെ നടക്കുന്ന സെമി ഫൈനൽ പോരാട്ടത്തിൽ അൽ ഇത്തിഹാദിനെയാണ് അൽ നസർ നേരിടുന്നത്. 2024 സീസണിൽ അൽ ഇത്തിഹാദ് മികച്ച പ്രകടനമാണ് പുറത്തെടുത്തത്. സഊദി പ്രോ ലീഗ് കിരീടം, കിങ്‌സ് കപ്പ് എന്നീ കിരീടങ്ങളാണ് അൽ ഇത്തിഹാദ് സ്വന്തമാക്കിയത്.

എന്നാൽ അൽ നസറിന് ഒരു കിരീടം പോലും സ്വന്തമാക്കാൻ സാധിച്ചിട്ടില്ല. അതുകൊണ്ട് തന്നെ കഴിഞ്ഞ സീസണിൽ നേരിട്ട തിരിച്ചടികളിൽ നിന്നും കരകയറാനായിരിക്കും അൽ നസർ കളത്തിൽ ഇറങ്ങുന്നത്. എന്നാൽ മറുഭാഗത്ത് അൽ ഇത്തിഹാദ് തങ്ങളുടെ കിരീട വേട്ട തുടരാനായിരിക്കും ലക്ഷ്യം വെക്കുക. 

ഇപ്പോൾ ഈ ആവേശകരമായ മത്സരത്തിന് മുന്നോടിയായി അൽ നസർ നായകൻ ക്രിസ്റ്റ്യാനോ റൊണാൾഡോയെ നേരിടാൻ പോവുന്നതിനെക്കുറിച്ച് സംസാരിക്കുകയാണ് അൽ ഇത്തിഹാദിന്റെ ഫ്രഞ്ച് താരം കരിം ബെൻസിമ. റൊണാൾഡോ മികച്ച താരമായിരിക്കുമെന്നും എന്നാൽ നാളെ ഫൈനലിൽ വിജയിക്കുന്നവർ ആയിരിക്കും മികച്ചതെന്നുമാണ് ബെൻസിമ പറഞ്ഞത്. 

''വരാനിരിക്കുന്ന മത്സരം റൊണാൾഡോയുമായുള്ള ഒരു ഒറ്റയാൾ പോരാട്ടമാക്കി ചുരുക്കരുത്. ഞാൻ ഇതിന് മുമ്പും റൊണാൾഡോക്കൊപ്പം കളിച്ചിട്ടുണ്ട്. അദ്ദേഹം ഒരു മികച്ച താരമാണ്. എന്നാൽ നാളത്തെ മത്സരം അൽ ഇത്തിഹാദും അൽ നസറും തമ്മിലാണ്. ഇതിൽ ഏറ്റവും മികച്ച ടീം ഏതാണോ അവർ വിജയിക്കും'' കരിം ബെൻസിമ മത്സരത്തിന് മുന്നോടിയായി നടന്ന പത്രസമ്മേളനത്തിൽ പറഞ്ഞു. 

സ്പാനിഷ് വമ്പന്മാരായ റയൽ മാഡ്രിഡിനായി ബെൻസിമയും റൊണാൾഡോയും ഒരുമിച്ച് കളിച്ചിട്ടുണ്ട്. 2009 മുതൽ 2018 വരെയാണ് ഇരുവരും റയലിനായി കളിച്ചത്. ഇരുവരും റയലിന്റെ എക്കാലത്തെയും മികച്ച ഗോൾ വേട്ടക്കാരാണ്. ലോസ് ബ്ലാങ്കോസിനൊപ്പം 15 കിരീടങ്ങളാണ് ഇരുവരും ഒരുമിച്ച് നേടിയത്. ഇതിൽ നാല് യുവേഫ ചാമ്പ്യൻസ് ലീഗ് കിരീടവും ഉൾപ്പെടുന്നുണ്ട്. 

Al Ittihads French star Karim Benzema is talking about facing Al Nasr captain Cristiano Ronaldo ahead of the Saudi Super Cup match