മലപ്പുറം: 'സ്നേഹ പ്രവാചകരുടെ ഒന്നര സഹസ്രാബ്ദം' എന്ന പ്രമേയത്തിൽ എസ്.വൈ.എസ് സംസ്ഥാന കമ്മിറ്റി ആചരിച്ചു വരുന്ന മീലാദ് കാംപയിനിന് പ്രൗഢ തുടക്കം. പാണക്കാട് സയ്യിദ് സാദിഖലി ശിഹാബ് തങ്ങളുടെ വസതിയിൽ നടന്ന ചടങ്ങ് പ്രവാചക പ്രകീർത്തനങ്ങൾ കൊണ്ട് ശ്രദ്ധേയമായി. സംസ്ഥാന പ്രസിഡൻ്റ് സയ്യിദ് സാദിഖലി ശിഹാബ് തങ്ങൾ ഉദ്ഘാടനം ചെയ്തു.

നബിദിനം മുസ് ലിംകളുടെ മാത്രം ആഘോഷമല്ലെന്നും ലോക ജനത തന്നെ പ്രവാചക ജന്മദിനത്തിൽ സന്തോഷം പങ്കിടുന്നുണ്ടെന്നും അദ്ദേഹം പറഞ്ഞു. ലോകത്തിന് കരുണയായിട്ടാണ് പ്രവാചകൻ മുഹമ്മദ് നബി (സ) യെ നിയോഗിച്ചിരിക്കുന്നത്. ആ അർഥത്തിൽ മാനവരാശിക്ക് മാത്രമല്ല മുഴുവൻ ചരാചരങ്ങൾക്കും അവകാശപ്പെട്ടതാണ് പ്രവാചകനെന്നും അദ്ദേഹം പറഞ്ഞു.

സമസ്ത കേരളാ ജംഇയ്യത്തുൽ ഉലമാ വൈസ് പ്രസിഡൻ്റ് കോട്ടുമല മൊയ്തീൻ കുട്ടി മുസ്‌ലിയാർ അധ്യക്ഷനായി.സംസ്ഥാന ജനറൽ സെക്രട്ടറി സയ്യിദ് മുഹമ്മദ് കോയ തങ്ങൾ ജമലുല്ലൈലി ആമുഖ പ്രഭാഷണം നടത്തി. പി.കെ കുഞ്ഞാലിക്കുട്ടി, അബ്ദുൽ ഹമീദ് ഫൈസി അമ്പലക്കടവ്, അബ്ദുസ്സമദ് പൂക്കോട്ടൂർ പ്രഭാഷണം നടത്തി. പാണക്കാട് അബ്ബാസലി ശിഹാബ് തങ്ങൾ, പാണക്കാട് ബഷീറലി ശിഹാബ് തങ്ങൾ അനുഗ്രഹ സാന്നിദ്ധ്യങ്ങളായി. കെ.കെ.എസ് തങ്ങൾ വെട്ടിച്ചിറ, കെ.എ റഹ്മാൻ ഫൈസി, പുത്തനഴി മൊയ്തീൻ ഫൈസി, മലയമ്മ അബൂബക്കർ ബാഖവി, ആനമങ്ങാട് മുഹമ്മദ് കുട്ടി ഫൈസി, ഹസൻ സഖാഫി പൂക്കോട്ടൂർ മൗലിദ് പാരായണത്തിന് നേതൃത്വം നൽകി. 

കോഴിക്കോട് വലിയ ഖാസി നാസർ അബ്ദുൽഹയ്യ് ശിഹാബ് തങ്ങൾ സമാപന പ്രാർത്ഥന നടത്തി. യു. ശാഫി ഹാജി, നാസർ ഫൈസി കൂടത്തായി, ഹസൻ ആലംകോട്, കാടാമ്പുഴ മൂസ ഹാജി , അബ്ദുല്ല കുണ്ടറ, സി.എച്ച് ത്വയ്യിബ് ഫൈസി, മുഹമ്മദ് കുട്ടി ഹസനി, നാസർ മൗലവി വയനാട്, ളിയാഉദ്ദീൻ ഫൈസി, അബ്ദുറഹ്മാൻ ഫൈസി പാതിരമണ്ണ പങ്കെടുത്തു. ഹംസ റഹ്മാനി കൊണ്ടിപറമ്പ് സ്വാഗതവും സലിം എടക്കര നന്ദിയും പറഞ്ഞു.