ബാങ്കോക്ക്: കംബോഡിയയുടെ മുൻ നേതാവ് ഹുൻ സെന്നുമായുള്ള വിവാദപരമായ ഫോൺ സംഭാഷണത്തിന്റെ പേരിൽ തായ്‌ലൻഡ് ഭരണഘടനാ കോടതി സസ്‌പെൻഡ് ചെയ്ത പ്രധാനമന്ത്രി പയേതുങ്താൻ ഷിനവത്രയെ (Paetongtarn Shinawatra) സ്ഥാനത്തുനിന്ന് നീക്കി. 2008 ന് ശേഷം തായ് ജഡ്ജിമാർ സ്ഥാനഭ്രഷ്ടനാക്കുന്ന അഞ്ചാമത്തെ പ്രധാനമന്ത്രിയാണ് പയേതുങ്താൻ ഷിനവത്ര. തായ്‌ലൻഡിന്റെ ഏറ്റവും പ്രായം കുറഞ്ഞ പ്രധാനമന്ത്രിയായിരുന്നു ഷിനവത്ര.

ഹുൻ സെന്നുമായുള്ള സംഭാഷണത്തിനിടെ, 39 കാരിയായ പയേതുങ്താൻ ഷിനവത്ര രാജ്യത്തിന്റെ താൽപ്പര്യങ്ങൾക്ക് മുകളിൽ തന്റെ വ്യക്തിപരമായ താൽപ്പര്യങ്ങൾ പ്രതിഷ്ഠിച്ചുവെന്നും ഇത് അവരുടെ നേതൃത്വത്തിലുള്ള പൊതുജന വിശ്വാസം നഷ്ടപ്പെടാൻ കാരണമായെന്നും കോടതി വ്യക്തമാക്കി. ഒരു പ്രധാനമന്ത്രിക്ക് ആവശ്യമായ ധാർമ്മിക മാനദണ്ഡങ്ങൾ ഗുരുതരമായി ലംഘിച്ചു എന്നും കോടതി വിധിയിൽ പറഞ്ഞു.

കംബോഡിയയുടെ മുൻ നേതാവും സെനറ്റ് പ്രസിഡൻറുമായ ഹുൻ സെന്നിനെ അങ്കിൾ (അമ്മാവൻ) എന്ന് വിളിക്കുന്നതും, തായ് ആർമിയിലെ ഒരു മുതിർന്ന കമാൻഡറെ എതിരാളി എന്ന് വിമർശിച്ചതുമാണ് പയേതുങ്താൻ ഷിനവത്രയ്ക്ക് വിനയായത്. ഇരുവരും തമ്മിലുള്ള സംഭാഷണം ഹുൻ സെൻ പുറത്തുവിട്ടതോടെ സംഭവം തായ്‌ലൻഡിൽ ഏറെ വിവാദമായി.

ALSO READ: ഇസ്‌റാഈൽ ആക്രമണത്തിൽ ഹൂതി പ്രധാനമന്ത്രി അഹമ്മദ് അൽ റഹാവി കൊല്ലപ്പെട്ടെന്ന് റിപ്പോർട്ട്; സ്ഥിരീകരിക്കാതെ ഇസ്‌റാഈലും ഹൂതികളും

തായ്‌ലാൻഡും കംബോഡിയയും തമ്മിൽ അതിർത്തി തർക്കം രൂക്ഷമായ സാഹചര്യത്തിൽ ഉണ്ടായ വിവാദം സർക്കാരിനെ പിടിച്ചുകുലുക്കി. സ്വന്തം രാജ്യത്തിന്റെ താല്പര്യങ്ങൾക്ക് വിരുദ്ധമായാണ് പ്രധാനമന്ത്രി പ്രവർത്തിക്കുന്നതെന്ന് വിമർശനം ഉയർന്നു. ഘടക കക്ഷികൾ സർക്കാർ വിട്ടതോടെ ഭരണം പ്രതിസന്ധിയിലായിരുന്നു.

ഇതിനിടെ ഇരു രാജ്യങ്ങളും തമ്മിലുണ്ടായ അതിർത്തി തർക്കം പിന്നീട് സായുധ ഏറ്റുമുട്ടലുകളിലേക്ക് നീങ്ങി. ഇരുവശത്തുനിന്നും ഡസൻ കണക്കിന് ആളുകൾ കൊല്ലപ്പെടുകയും പതിനായിരക്കണക്കിന് ആളുകൾ കുടിയിറക്കപ്പെടുകയും ചെയ്തു.

അതേസമയം, വിധിന്യായത്തിന് ശേഷം മാധ്യമപ്രവർത്തകരോട് സംസാരിച്ച പയേതുങ്താൻ ഷിനവത്ര, രാജ്യത്തിന്റെ താൽപ്പര്യങ്ങൾ സംരക്ഷിക്കാൻ ശ്രമിച്ചിട്ടുണ്ടെന്നും രാഷ്ട്രീയ ഐക്യത്തിന് ആഹ്വാനം ചെയ്തിട്ടുണ്ടെന്നും വ്യക്തമാക്കി. തന്റെ ഉദ്ദേശ്യങ്ങൾ രാജ്യത്തിന്റെ നേട്ടത്തിനുവേണ്ടിയായിരുന്നു. വ്യക്തിപരമായ നേട്ടത്തിനുവേണ്ടിയല്ല. മറിച്ച് സാധാരണക്കാരും സൈനികരും ഉൾപ്പെടെയുള്ള ജനങ്ങളുടെ ജീവിതത്തിനുവേണ്ടിയായിരുന്നു എന്നും അവർ കൂട്ടിച്ചേർത്തു.