അബൂദബി: മലയാളത്തിലെ സര്‍ഗധനരായ എഴുത്തുകാരെ ആദരിക്കാനായി ശക്തി തിയറ്റേഴ്‌സ് അബൂദബി ഏര്‍പ്പെടുത്തിയ 39ാമത് അബൂദബി ശക്തി അവാര്‍ഡ് പ്രഖ്യാപിച്ചു. നാടോടി വിജ്ഞാനീയം, സാഹിത്യ നിരൂപണം, പുരോഗമന സാംസ്‌കാരിക മണ്ഡലം എന്നീ മേഖലകളിടെ സമഗ്ര സംഭാവനകള്‍ പരിഗണിച്ചുള്ള ശക്തി ടി.കെ രാമകൃഷ്ണന്‍ പുരസ്‌കാരത്തിന് ഡോ. എ.കെ നമ്പ്യാരെ തെരഞ്ഞെടുത്തു.

മികച്ച നിരൂപണത്തിനുള്ള അബൂദബി ശക്തി തായാട്ട് പുരസ്‌കാരം ഡോ. ടി.കെ സന്തോഷ് കുമാറിന്റെ 'കവിതയുടെ രാഗപൂര്‍ണിമ' എന്ന കൃതിക്കാണ് ലഭിച്ചത്. ഇതര സാഹിത്യത്തിനുള്ള ശക്തി എരുമേലി പുരസ്‌കാരം കെ.എസ് രവികുമാര്‍ (കടമ്മനിട്ട), കെ.വി സുധാകരന്‍ (ഒരു സമര നൂറ്റാണ്ട്) പങ്കിട്ടെടുത്തു.

കഥ: എം.മഞ്ജു (തലപ്പന്ത്), കവിത: എം.ഡി രാജേന്ദ്രന്‍ (ശ്രാവണ ബളഗോള), നാടകം: അനില്‍ കുമാര്‍ ആലത്തുപറമ്പ് (മഹായാനം), റഫീഖ് മംഗലശ്ശേരി (കിത്താബ്), ബാലസാഹിത്യം: ജി.ശ്രീകണ്ഠന്‍ (മുതലക്കെട്ട്), പായിപ്ര രാധാകൃഷ്ണന്‍ (സല്‍ക്കഥകള്‍), വിജ്ഞാന സാഹിത്യം: എം.ജയരാജ് (വൈക്കം സത്യഗ്രഹ രേഖകള്‍), എം.കെ പീതാംബരന്‍ (മതം, മാനവികത, മാര്‍ക്‌സിസം) എന്നിവര്‍ക്കാണ് പുരസ്‌കാരങ്ങള്‍.

എം.വി ജനാര്‍ദനന്റെ 'പെരുമലയന്‍', കെ.ആര്‍ അജയന്റെ 'സൂക്കോ കടന്ന് വടക്ക്കിഴക്ക്', ഗിരിജ പ്രദീപിന്റെ 'നക്ഷത്രങ്ങള്‍ക്കിടയില്‍ മിന്നാമിനുങ്ങ്' എന്നീ കൃതികള്‍ പ്രത്യേക പുരസ്‌കാരങ്ങള്‍ക്കായി തെരഞ്ഞെടുത്തു.

1987 മുതലാണ് അബൂദബി ശക്തി അവാര്‍ഡ് നല്‍കിത്തുടങ്ങിയത്. കവിത, നോവല്‍, ചെറുകഥ, വൈജ്ഞാനിക സാഹിത്യം, ബാലസാഹിത്യം, നാടകം എന്നീ ശാഖകളില്‍ പെടുന്ന കൃതികള്‍ക്കാണ് അവാര്‍ഡ് നല്‍കി വരുന്നത്. കേരള സാഹിത്യ അക്കാദമി അവാര്‍ഡ് കഴിഞ്ഞാല്‍ എല്ലാ വര്‍ഷവും മലയാളത്തിലെ എല്ലാ സാഹിത്യ ശാഖകള്‍ക്കും നല്‍കി വരുന്ന ഒരേയൊരു പുരസ്‌കാരമാണ് അബൂദബി ശക്തി അവാര്‍ഡ്.

അബൂദബി ശക്തി അവാര്‍ഡ് കമ്മിറ്റി ചെയര്‍മാന്‍ പി.കരുണാകരന്‍, കണ്‍വീനര്‍ എ.കെ മൂസ മാസ്റ്റര്‍, കമ്മിറ്റി അംഗം എന്‍.പ്രഭാവര്‍മ്മ എന്നിവരാണ് അവാര്‍ഡ് പ്രഖ്യാപിച്ചത്.

50,00 രൂപയും പ്രശസ്തി ഫലകവും അടങ്ങുന്നതാണ് ശക്തി ടി.കെ രാമകൃഷ്ണന്‍ അവാര്‍ഡ്. മറ്റു ജേതാക്കള്‍ക്ക് 25,000 രൂപയും പ്രശസ്തി പത്രവുമാണ് പുരസ്‌കാരം.

Abu Dhabi Shakti Award announced; TK Ramakrishnan Award to Dr. AK Nambiar