പി. മുഹമ്മദ് സ്വാലിഹ് 

മലപ്പുറം: ചികിത്സയിലെ  രണ്ട് വിഭാഗങ്ങൾ... പക്ഷേ, പലപ്പോഴും ഉണ്ടാവുക ഏതെങ്കിലും ഒന്നിലെ  ഒരു ഡോക്ടർ മാത്രം. ഓങ്കോളജിക്കും റേഡിയോളജിക്കുമായി  ഒരു ഡോക്ടർ മാത്രം എന്നതാണ്  സംസ്ഥാനത്തെ സർക്കാർ ആശുപത്രികളിലെ നിലവിലെ അവസ്ഥ. രോഗ നിർണയത്തിനുള്ള റോഡിയോളജി വിഭാഗവും റേഡിയേഷൻ ഉപയോഗിച്ചുള്ള കാൻസർ ചികിത്സാ വിഭാഗമായ റേഡിയേഷൻ ഓങ്കോളജിക്കും ഇതിൽ ഏതെങ്കിലും ഒന്നിൻ്റെ ഡോക്ടർ ആയിരിക്കും  ഉണ്ടാവുന്നത്. 

രണ്ട് വിഭാഗങ്ങളെയും വേർതിരിച്ച് ഉത്തരവിറക്കിയിട്ടുണ്ടെങ്കിലും നടപ്പാക്കാത്തതാണ് സംസ്ഥാനത്തെ പല സർക്കാർ ആശുപത്രികളിലും  ഇത്തരമൊരു സാഹചര്യം സംജാതമാക്കിയത്.  2010ൽ ഹെൽത്ത് സർവിസിന് കീഴിലെ ആശുപത്രികളിൽ ഡോക്ടർമാരുടെ സ്‌പെഷാലിറ്റി കേഡർ രൂപീകരിച്ച ശേഷം റേഡിയോളജി സ്‌പെഷാലിറ്റിയും റേഡിയേഷൻ ഓങ്കോളജി സ്‌പെഷാലിറ്റിയും ഒന്നായാണ് പരിഗണിക്കുന്നത്. അൾട്രാ സൗണ്ട്, എം.ആർ.ഐ തുടങ്ങിയ സ്‌കാനിങ് രീതികളുപയോഗിച്ചാണ് റേഡിയോ ഡയഗ്നോസിസ് വിഭാഗം രോഗനിർണയം നടത്തുന്നത്.  ജില്ലാ ആശുപത്രികൾ ഉൾപ്പെടെയുള്ളവയിൽ നിന്നും നിലവിലുള്ള ഡോക്ടർ സ്ഥലം മാറിപ്പോവുകയോ വിരമിക്കുകയോ ചെയ്താൽ പകരം വരുന്നത് ഇരു വിഭാഗങ്ങളിൽ ഏതെങ്കിലുമൊന്നിൽ വൈദഗ്ധ്യമുള്ളവരാകും.   ആരോഗ്യ വകുപ്പിൽ റേഡിയോ ഡയഗ്നോസിസ് വിഭാഗത്തിൽ വിദഗ്ധർ താരതമ്യേന കുറവാണ്. ഇരു വിഭാഗങ്ങളും എടുത്താൽ റേഡിയോ തെറാപ്പി അഥവാ ഓങ്കോളജി വിദഗ്ധരാണ് എണ്ണത്തിൽ കൂടുതൽ. ഇക്കാരണത്താൽ തന്നെ പലപ്പോഴും റേഡിയോളജി ഡോക്ടർക്ക് പകരം വരുന്നത് ഓങ്കോളജി ഡോക്ടറാണ്. ഇത്  ആശുപത്രികളിൽ ഒരു വിഭാഗത്തിൽ  ആളില്ലാത്ത സ്ഥിതിവിശേഷമുണ്ടാക്കുന്നു. 

ALSO READ: വാഴൂര്‍ സോമന് വിട; രാവിലെ 11ന് വണ്ടിപ്പെരിയാര്‍ ടൗണ്‍ഹാളില്‍ പൊതുദര്‍ശനം; വൈകീട്ട് നാലുമണിക്ക് സംസ്‌കാരം 

2021 ഫൈബ്രുവരി 14 ലെ ഉത്തരവ് പ്രകാരം 2010 ലെ  നിയമത്തിൽ ഭേദഗതി വരുത്തി,  റേഡിയോ ഡയഗ്‌നോസിസ് വിഭാഗവും റേഡിയേഷൻ ഓങ്കോളജിയും വേർതിരിച്ചിട്ടുണ്ട്. പക്ഷേ നാല് വർഷം പിന്നിട്ടിട്ടും ആ ഉത്തരവ് ഇതുവരെ നടപ്പാക്കിയിട്ടില്ല. ഉത്തരവ് പ്രാബല്യത്തിൽ വരാത്തതിനാൽ പല സർക്കാർ ആശുപത്രികളിലുമെത്തുന്ന കാൻസർ രോഗികളുൾപ്പെടെ പ്രയാസമനുഭവിക്കുകയാണ്. ഇത് സംബന്ധിച്ച് നിരവധി തവണ പരാതികൾ ഉയർന്നിരുന്നുവെങ്കിലും ആരോഗ്യവകുപ്പ് ഇപ്പോഴും ഉറക്കം നടിക്കുകയാണെന്നാണ് പരാതി.

തസ്തികകൾ വേർതിരിക്കണം 
റേഡിയോ ഡയഗ്‌നോസിസ്, റേഡിയേഷൻ ഓങ്കോളജി വിഭാഗങ്ങളെ വേർതിരിച്ചുകൊണ്ടുള്ള സർക്കാർ ഉത്തരവ് ഉടൻ പ്രാബല്യത്തിൽ വരുത്തണമെന്ന് ആവശ്യം പല സർക്കാർ ആശുപത്രികളിൽ നിന്നും  ഉയരുന്നുണ്ട്. ഏതെങ്കിലും ഒരു വിഭാഗത്തിൽ ഡോക്ടർ ഉണ്ടാകില്ലെന്നുള്ളത് തന്നെയാണ് ഇതിന് കാരണവും.  തിരൂർ ജില്ലാ ആശുപത്രിയിൽ വിരമിച്ച റേഡിയോളജി ഡോക്ടർക്ക് പകരം നിയമനം നടത്തിയിട്ടില്ല.  റേഡിയോളജി, റേഡിയോ തെറാപ്പി വിഭാഗങ്ങൾക്കായി കൺസൾട്ടന്റ്, ജുനിയർ കൺസൾട്ടന്റ് തസ്തികകളുള്ള ഇവിടെ നിലവിൽ ജൂനിയർ കൺസൾട്ടന്റ് തസ്തികയിലുള്ളത് റേഡിയോ തെറാപ്പി ഡോക്ടറാണ്.

മലപ്പുറം ജില്ലയിൽ ഏറ്റവും കൂടുതൽ കാൻസർ രോഗികളെത്തുന്ന ആശുപത്രിയിൽ സ്‌കാനിങ്, സ്തനാർബുദ പരിശോധനക്കായുള്ള മാമോഗ്രാം, എക്‌സ്‌റേ തുടങ്ങിയവ സജ്ജീകരിച്ചിട്ടുണ്ടെങ്കിലും നിലവിൽ റോഡിയോളജിയിൽ ഡോക്ടറില്ലാത്തതിനാൽ അവ പ്രവർത്തനക്ഷമമല്ല. ഇക്കാരണത്താൽ രോഗികളാണ് ബുദ്ധിമുട്ടനുഭവിക്കുന്നത്.  2021 ലെ ഉത്തരവ് നടപ്പാക്കി,  തിരൂർ ജില്ലാ ആശുപത്രിയിൽ റേഡിയോളജി വിഭാഗത്തിൽ ജൂനിയർ കൺസൾട്ടൻ്റ് തസ്തിക അധികം അനുവദിച്ച് പ്രശ്‌നം പിരഹരിക്കണമെന്ന് ആവശ്യപ്പെട്ട്  മലപ്പുറം ജില്ലാ പഞ്ചായത്ത് പ്രസിഡന്റ് എം.കെ റഫീഖ ആരോഗ്യ മന്ത്രി വീണാ ജോർജിന് കത്തയച്ചിട്ടുണ്ട്.