ഷിംല: ആദ്യമായി ചന്ദ്രനില്‍ കാലുകുത്തിയത് ഹനുമാന്‍ ആണെന്നാണ് മുന്‍ കേന്ദ്രമന്ത്രിയും ബിജെപി എംപിയുമായ അനുരാഗ് താക്കൂര്‍ പറയുന്നത്. ഇന്ത്യന്‍ പാരമ്പര്യങ്ങളെ കുറിച്ചറിയണമെങ്കില്‍ പാഠപുസ്തകങ്ങള്‍ക്കപ്പുറം നോക്കണമെന്നും അദ്ദേഹം പറഞ്ഞു. ഹിമാചല്‍ പ്രദേശിലെ ഒരു സ്‌കൂളില്‍ നടന്ന പരിപാടിയില്‍ വിദ്യാര്‍ഥികളോട് സംസാരിക്കുകയായിരുന്നു താക്കൂര്‍.

ഹനുമാന്‍ ജിയാണ് ആദ്യത്തെ ബഹിരാകാശ യാത്രികന്‍, എന്ന അടിക്കുറിപ്പോടെ തന്റെ പ്രസംഗത്തിന്റെ വിഡിയോയും അദ്ദേഹം എക്‌സില്‍ പങ്കുവച്ചു. ആദ്യമായി ബഹിരാകാശത്ത് സഞ്ചരിച്ചത് ആരാണെന്ന് അറിയുമോ' എന്ന ചോദ്യത്തിന് വിദ്യാര്‍ഥികള്‍ വ്യക്തമായ മറുപടി നല്‍കാതെ വന്നപ്പോഴാണ് ഹനുമാനെ കുറിച്ച് എംപി സംസാരിച്ചത്.

ഇന്ത്യയുടെ ആയിരക്കണക്കിന് വര്‍ഷത്തെ പാരമ്പര്യം, അറിവ്, സംസ്‌കാരം, എന്നിവ അറിയാത്തിടത്തോളം കാലം നമ്മള്‍ ബ്രിട്ടീഷുകാര്‍ കാണിച്ചുതന്ന വര്‍ത്തമാനകാലത്ത് തന്നെ തുടരുമെന്നുമാണ് വിദ്യാര്‍ഥികളോട് താക്കൂര്‍ പറഞ്ഞത്. 

ALSO READ: ഭിന്നശേഷിക്കാരനാണ്;  പക്ഷേ, പട്ടാളത്തിലായിരുന്നു...! വ്യാജ ഭിന്നശേഷി സർട്ടിഫിക്കറ്റിൽ നിയമനം നേടിയവരിൽ വിമുക്തഭടന്മാരും; മുഖ്യമന്ത്രിക്ക് പരാതി

എന്നാല്‍ വിദ്യാര്‍ത്ഥികളെ തെറ്റിദ്ധരിപ്പിക്കുന്നതിലൂടെ വിജ്ഞാനത്തേയും യുക്തിചിന്തയെയും അപമാനിക്കുകയാണെന്ന് ഡിഎംകെ. കുട്ടികളെ തെറ്റിദ്ധരിപ്പിക്കുന്നത് ഭരണഘടനയോടുള്ള അവഹേളനമാണ്. ശാസ്ത്രീയ മനോഭാവം വളര്‍ത്തണമെന്ന ഭരണഘടനാ തത്വത്തെ അവഹേളിക്കുകയാണെന്നും കനിമൊഴി എംപി വിമര്‍ശിച്ചു.

 ആദ്യം ചന്ദ്രനില്‍ കാലുകുത്തിയത് അമേരിക്കന്‍ ബഹിരാകാശ സഞ്ചാരിയായ നീല്‍ ആംസ്‌ട്രോങ് അല്ല, ഹനുമാന്‍ ആണെന്നാണ് ബഹിരാകാശ ദിനത്തില്‍ അനുരാഗ് താക്കൂര്‍ പറഞ്ഞത്. കുട്ടികളോടുള്ള പ്രതികരണം അസ്വസ്ഥപ്പെടുത്തുന്നതാണെന്നും കനിമൊഴി വിമര്‍ശിച്ചു.

ചരിത്രപരമായ വസ്തുതകളും ഐതിഹ്യങ്ങളും തമ്മില്‍ വേര്‍തിരിച്ചറിയുന്നതില്‍ നിന്ന് വിദ്യാര്‍ത്ഥികളെ തടയുന്ന പരാമര്‍ശങ്ങള്‍ ശരിയല്ലെന്നും കനിമൊഴി പ്രതികരിച്ചു. പുരാണങ്ങള്‍ക്ക് സാംസ്‌കാരികവും സാഹിത്യപരവുമായ സ്ഥാനമുണ്ടെങ്കിലും അത് വസ്തുതയായി ക്ലാസ് മുറികളില്‍ അവതരിപ്പിക്കുന്നത് ശാസ്ത്ര പഠനത്തിന്റെ അടിത്തറയെ ദുര്‍ബലപ്പെടുത്തുമെന്നും ഇതിന് മുന്‍പും വിദ്യാഭ്യാസ രംഗത്തെ വിദഗ്ധര്‍ അഭിപ്രായപ്പെട്ടിട്ടുണ്ട്.

In a school event in Himachal Pradesh, BJP MP and former Union Minister Anurag Thakur claimed that Hanuman was the first to set foot on the moon. He urged students to look beyond textbooks to understand India’s heritage. Sharing a video captioned "Hanuman ji is the first astronaut", he made the statement after students failed to answer who first travelled to space.