കാഫ നേഷൻസ് കപ്പിലെ ആദ്യ മത്സരത്തിൽ ഇന്ത്യക്ക് വിജയം. താജിക്കിസ്ഥാനെ ഒന്നിനെതിരെ രണ്ട് ഗോളുകൾക്കാണ് ഇന്ത്യ കീഴടക്കിയത്. പുതിയ പരിശീലകൻ ഖാലിദ് ജമീലിന്റെ കീഴിലുള്ള ഇന്ത്യൻ ടീമിന്റെ ആദ്യ വിജയം കൂടിയാണിത്. താജിക്കിസ്ഥാനൈൽ ഹിസോർ സെൻട്രൽ സ്റ്റേഡിയത്തിൽ നടന്ന മത്സരത്തിൽ തുടക്കത്തിൽ തന്നെ ഇന്ത്യ ലീഡ് നേടി.

മത്സരം തുടങ്ങി അഞ്ചാം മിനിറ്റിൽ തന്നെ അൻവർ അലിയിലൂടെ ഇന്ത്യ ആദ്യ ഗോൾ നേടി. ആദ്യ ഗോളിന്റെ ആവേശം അവസാനിക്കുന്നതിന് മുമ്പ് തന്നെ ഇന്ത്യ രണ്ടാം ഗോളും നേടി. ഒമ്പതാം മിനിറ്റിൽ സന്ദേശ് ജിങ്കനിലൂടെയാണ് ഇന്ത്യ രണ്ടാം ഗോൾ നേടിയത്. എന്നാൽ 22ാം മിനിറ്റിൽ താജിക്കിസ്ഥാൻ ഗോൾ തിരിച്ചടിക്കുകയായിരുന്നു. സമീവിലൂടെയാണ് താജിക്കിസ്ഥാൻ ഗോൾ നേടിയത്. 

ഒന്നാം പകുതിയിൽ ഇന്ത്യ ഒരു ഗോളിന്റെ പിൻബലത്തിൽ രണ്ടാം പകുതിയിലും ആത്മവിശ്വാസത്തോടെ കളിക്കുകയായിരുന്നു. രണ്ടാം പകുതിയിൽ സമനില ഗോളിനായി താജിക്കിസ്ഥാൻ മികച്ച നീക്കങ്ങൾ നടത്തിയെങ്കിലും ഇന്ത്യൻ പ്രതിരോധം ശക്തമായി നിലയുറപ്പിക്കുകയായിരുന്നു. ഒടുവിൽ ഫൈനൽ വിസിൽ മുഴങ്ങിയപ്പോൾ ഇന്ത്യ ആവേശമായ വിജയം സ്വന്തമാക്കുകയായിരുന്നു. 

ടൂർണമെന്റിലെ രണ്ടാം മത്സരത്തിൽ സെപ്റ്റംബർ ഒന്നിന് ഇറാനെയാണ് ഖാലിദ് ജമീലും സംഘവും നേരിടുക. അന്നേദിവസം തന്നെ നടക്കുന്ന മത്സരത്തിൽ അഫ്ഗാനിസ്ഥാനാണ് താജിക്കിസ്ഥാന്റെ എതിരാളികൾ. 

India won their first match of the CAF Nations Cup. India defeated Tajikistan by 2 goals to 1. This was also the first victory for the Indian team under new coach Khalid Jameel.