മലപ്പുറം: മലപ്പുറം ജില്ലയിലെ അരീക്കോട്, വഴിക്കടവ് എന്നിവിടങ്ങളിൽ നിന്നായി രണ്ട് യുവാക്കൾ മെത്താഫിറ്റമിനുമായി പൊലിസിന്റെ പിടിയിലായി. വഴിക്കടവിലെ ചെക്ക്പോസ്റ്റിൽ നടത്തിയ പരിശോധനയിലും അരീക്കോട് ടൗണിലെ ഒരു സ്വകാര്യ ലോഡ്‌ജിൽ നടത്തിയ പരിശോധനയിലുമാണ് പ്രതികൾ പിടിയിലായത്. ഇവരിൽ നിന്നായി 26 ഗ്രാമിലേറെ മെത്താഫിറ്റമിൻ കണ്ടെടുത്തു.

അരീക്കോട് നടത്തിയ പരിശോധനയിൽ എടവണ്ണപ്പാറ പുതിയതൊടി ചീടിക്കുഴി സ്വദേശി ഷാക്കിർ ജമാൽ (28) അറസ്റ്റിലായത്. അരീക്കോട് ടൗണിലെ ഒരു സ്വകാര്യ ലോഡ്‌ജിന്റെ വാഷ്‌റൂമിൽ ഒളിച്ചിരുന്ന ഇയാളിൽ നിന്ന് 22.21 ഗ്രാം മെത്താഫിറ്റമിൻ പിടിച്ചെടുത്തു. മലപ്പുറം ജില്ലാ എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷൽ സ്ക്വാഡാണ് ഈ പരിശോധന നടത്തിയത്.

പിടിയിലായ പ്രതിയെ മഞ്ചേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷൽ സ്ക്വാഡ് സി.ഐ. എൻ. നൗഫൽ, ഉത്തരമേഖല കമീഷണർ സ്ക്വാഡ് ഇൻസ്പെക്ടർ ടി. ഷിജുമോൻ എന്നിവരുടെ നേതൃത്വത്തിലാണ് പരിശോധന നടന്നത്. എക്സൈസ് ഇൻസ്പെക്ടർ പി. ഹരിദാസൻ, അസിസ്റ്റന്റ് ഇൻസ്പെക്ടർ ആസിഫ് ഇക്ബാൽ, സിവിൽ എക്സൈസ് ഓഫീസർമാരായ അനീസ് ബാബു, അഖിൽദാസ്, ഡ്രൈവർ മുഹമ്മദ് നിസാർ എന്നിവരും പരിശോധനയിൽ പങ്കാളികളായി.

വഴിക്കടവിൽ യുവാവ് മെത്താഫിറ്റമിനുമായി അറസ്റ്റിൽ

വഴിക്കടവിൽ നടത്തിയ പരിശോധനയിൽ നാല് ഗ്രാം മെത്താഫിറ്റമിനുമായി യുവാവ് പൊലിസിന്റെ പിടിയിലായി. താനൂർ ചാപ്പപ്പടി സ്വദേശി പാണാച്ചിന്റെ പുരക്കൽ അൻസാർ (28) ആണ് അറസ്റ്റിലായത്. ഓണാഘോഷത്തോടനുബന്ധിച്ച് ആനമറിയിൽ സ്ഥാപിച്ച പ്രത്യേക പൊലിസ് ചെക്ക്പോസ്റ്റിൽ നടത്തിയ പരിശോധനയിലാണ് അൻസാർ പിടിയിലായത്.

ചെക്ക്പോസ്റ്റ് പരിശോധനാ സംഘവും ഡാൻസാഫ് അംഗങ്ങളും ഡോഗ് സ്ക്വാഡും ചേർന്നാണ് മെത്താഫിറ്റമിൻ പിടിച്ചെടുത്തത്. ഡാൻസാഫ് എസ്.ഐ. കെ.ആർ. ജസ്റ്റിൻ, എ.എസ്.ഐ. അബ്ദുൾ ബഷീർ, ഡാൻസാഫ് അംഗങ്ങളായ സുനിൽ മമ്പാട്, അഭിലാഷ് കൈപ്പിനി, ആഷിഫ് അലി, ജിയോ ജേക്കബ് എന്നിവർ അടങ്ങിയ സംഘമാണ് പരിശോധനയ്ക്ക് നേതൃത്വം നൽകിയത്.

ഓണാഘോഷ വേളയിൽ തമിഴ്നാട്, കർണാടക, ആന്ധ്ര തുടങ്ങിയ സംസ്ഥാനങ്ങളിൽ നിന്ന് നാടുകാണിചുരം വഴി മലപ്പുറം ജില്ലയിലേക്ക് ലഹരിവസ്തുക്കൾ കടത്തുന്നത് തടയാൻ ആനമറിയിൽ പൊലിസ് പ്രത്യേക ചെക്ക്പോസ്റ്റ് സ്ഥാപിച്ചിട്ടുണ്ട്. ഈ പരിശോധനകൾ ജില്ലയിൽ ലഹരിമരുന്ന് കടത്തിനെതിരെ നടത്തുന്ന ശക്തമായ നടപടികളുടെ ഭാഗമാണ്.