കോഴിക്കോട്: പരാതി നൽകാനെത്തിയ സഹോദരങ്ങളെ പൊലിസ് സ്റ്റേഷനിൽ ക്രൂരമായി മർദിച്ച സംഭവവുമായി ബന്ധപ്പെട്ട് വിവരാവകാശ നിയമപ്രകാരം അപേക്ഷ സമർപ്പിച്ചിട്ടും സി.സി.ടി.വി ദൃശ്യങ്ങൾ നൽകിയില്ല. കഴിഞ്ഞ വർഷം ഒക്‌ടോബർ ഏഴിനാണ് കോഴിക്കോട് പന്നിയങ്കര പൊലിസ് സ്റ്റേഷനിൽ വേങ്ങേരി കാട്ടിൽപറമ്പത്ത് കെ.പി സെയ്ദ് മുഹമ്മദ് മുസ്തഫയ്ക്കും സഹോദരൻ കെ.പി മുഹമ്മദ് മുനീഫയ്ക്കും മർദനമേറ്റത്.

സി.സി.ടി.വി ദൃശ്യങ്ങൾ ആവശ്യപ്പെട്ട് ഒരാഴ്ചയ്ക്കുള്ളിൽ വിവരാവകാശ നിയമപ്രകാരം അപേക്ഷ സമർപ്പിച്ചെങ്കിലും വിവിധ കേസുകളുടെയും പരാതികളുടെയും ഉത്ഭവവും നൽകിയ ആളുകളുടെ വിവരങ്ങളും പുറത്താകാൻ സാധ്യതയുണ്ടെന്ന് വ്യക്തമാക്കി നൽകിയില്ല. സ്ത്രീസുരക്ഷയുമായി ബന്ധപ്പെട്ട കേസുകളുടെ വിവരങ്ങളും മറ്റും പുറത്താകാൻ സാധ്യതയുണ്ടെന്നും  ദൃശ്യങ്ങൾ നിയമപ്രകാരം അനുവദിക്കാൻ നിർവാഹമില്ലെന്നുമാണ് വിവരാവകാശ അപേക്ഷയിൽ മറുപടിയായി ലഭിച്ചത്.

അതേസമയം, ആറുപേർ ചേർന്ന് സ്റ്റേഷനുള്ളിൽ വച്ച് ക്രൂരമായി മർദിക്കുകയും അസഭ്യം പറയുകയും വസ്ത്രം അഴിച്ചുമാറ്റാൻ ആവശ്യപ്പെടുകയും ചെയ്ത സംഭവത്തിൽ രണ്ടുപേർക്കെതിരേ മാത്രം നടപടി സ്വീകരിച്ച് അന്വേഷണം അവസാനിപ്പിച്ചു. മുഖ്യമന്ത്രിക്ക് വരെ പരാതി നൽകിയെങ്കിലും പൊലിസുകാർക്കെതിരേ മറ്റു നടപടികളൊന്നുമുണ്ടായില്ല. 

കാറിൽ സഞ്ചരിക്കവെ കല്ലായി റെയിൽവേ സ്റ്റേഷന് സമീപത്ത് വച്ച് സ്‌കൂട്ടറിനെ മറികടക്കാൻ ശ്രമിച്ചപ്പോൾ ഉണ്ടായ അപകടത്തെ സംബന്ധിച്ചാണ് പരാതി നൽകാൻ സഹോദരങ്ങൾ പന്നിയങ്കര സ്റ്റേഷനിലെത്തിയത്. പരാതി രേഖാമൂലം നൽകിയെങ്കിലും രസീതി നൽകിയില്ല. പരാതി സ്വീകരിച്ച ഉദ്യോഗസ്ഥൻ വാഹനം പരിശോധിച്ചശേഷം സ്‌കൂട്ടർ ഓടിച്ചയാളുടെ ഭാഗം ചേർന്ന് സംസാരിക്കുകയും മദ്യപിച്ച് വാഹനമോടിക്കുന്നുവെന്ന് പറഞ്ഞ് പരസ്യമായി ആക്ഷേപിക്കുകയും ചെയ്തു.

ഇതോടെ മൊബൈൽ ഫോണിൽ വിഡിയോ എടുക്കാൻ ശ്രമിച്ചപ്പോൾ ബലമായി സ്റ്റേഷനിലേക്ക് കൊണ്ടുപോയി സെല്ലിന് മുന്നിൽ രണ്ടുവശങ്ങളിലായി നിർത്തി സ്റ്റേഷൻ ഹൗസ് ഓഫിസർ സുഭാഷ് ചന്ദ്രൻ ഉൾപ്പെടെ കണ്ടാലറിയാവുന്ന ആറോളം പൊലിസുകാർ മർദിക്കുകയായിരുന്നുവെന്നാണ് ഇവർ പറയുന്നത്. സംഭവത്തിൽ സിറ്റി പൊലിസ് കമ്മിഷണർക്ക് പരാതി നൽകിയതിനെ തുടർന്ന് എസ്.ഐ സുഭാഷ്, സീനിയർ സിവിൽ പൊലിസ് ഓഫിസറും ജി.ഡി ചാർജുമായ പത്മരാജൻ എന്നിവരെ ഡി.എച്ച്.ക്യുവിലേക്ക് മാറ്റുക മാത്രമാണ് ചെയ്തത്.