കാസർകോട്: പ്രായപൂർത്തിയാകാത്ത ആദിവാസി പെൺകുട്ടികളുടെ തിരോധാന കേസുകളിൽ സിബിഐ അന്വേഷണം ആവശ്യപ്പെട്ട് കേരള പട്ടികജാതി ജനസമാജവും പെൺകുട്ടികളുടെ കുടുംബങ്ങളും രംഗത്തെത്തി. ബലാത്സംഗ കേസുകളിൽ വിചാരണക്കിടെ പെൺകുട്ടികൾ കാണാതാകുന്നത് ഗൗരവമായി കാണണമെന്ന് കുടുംബങ്ങൾ ആവശ്യപ്പെട്ടു. കാസർകോട് ജില്ലയിൽ കഴിഞ്ഞ 15 വർഷത്തിനിടെ 163 പേരെ കാണാതായതായി കേരള പട്ടികജാതി ജനസമാജം സംസ്ഥാന ജനറൽ സെക്രട്ടറി തെക്കൻ സുനിൽകുമാർ ആരോപിച്ചു.

2005-ലെ ഓടയംചാൽ കേസ്

2005-ൽ ഓടയംചാലിൽ പ്രായപൂർത്തിയാകാത്ത ഒരു ആദിവാസി പെൺകുട്ടിയെ മൂന്നുപേർ ചേർന്ന് കൂട്ടബലാത്സംഗം ചെയ്ത സംഭവമാണ് കേസിനാസ്പദം. രാജപുരം പൊലfസ് മൂന്ന് പ്രതികൾക്കെതിരെ കേസെടുക്കുകയും അവരെ റിമാൻഡ് ചെയ്യുകയും ചെയ്തു. എന്നാൽ, വിചാരണക്കിടെ പെൺകുട്ടി കോടതിയിൽ ഹാജരാകാത്തതിനാൽ കേസ് തള്ളപ്പെട്ടു, ഇത് പ്രതികൾക്ക് രക്ഷപ്പെടാൻ അവസരമൊരുക്കിയെന്ന് സുനിൽകുമാർ ആരോപിച്ചു.

പെൺകുട്ടിക്ക് ചെറുപ്രായത്തിൽ മാതാപിതാക്കളെ നഷ്ടപ്പെട്ടിരുന്നു. ബന്ധുക്കളുടെ സംരക്ഷണത്തിൽ വളർന്ന കുട്ടി ജോർജ് എന്ന വ്യക്തിയുടെ വീട്ടിൽ ജോലി ചെയ്തിരുന്ന സമയത്താണ് ബലാത്സംഗത്തിന് ഇരയായത്. 2012-ൽ വിചാരണക്കിടെ പെൺകുട്ടിയെ കാണാതാവുകയായിരുന്നു. അമ്പലത്തറ പൊലിസ് രജിസ്റ്റർ ചെയ്ത ക്രൈം നമ്പർ 61/12 (2012) കേസ് ഇപ്പോൾ ക്രൈം ബ്രാഞ്ച് അന്വേഷിക്കുന്നുണ്ടെങ്കിലും, 15 വർഷമായിട്ടും പെൺകുട്ടിയെ കണ്ടെത്താനായിട്ടില്ല.

മറ്റ് കേസുകൾ

ക്രൈം നമ്പർ 44/11 (2010)

2010-ൽ കാഞ്ഞങ്ങാട് ടീച്ചേഴ്‌സ് ട്രെയിനിങ് സെന്ററിൽ പഠിക്കാനെത്തിയ ഒരു ആദിവാസി പെൺകുട്ടിയെ പ്രണയം നടിച്ച് വശത്താക്കി തട്ടിക്കൊണ്ടുപോയി കൂട്ടബലാത്സംഗത്തിന് ഇരയാക്കിയ ശേഷം കൊലപ്പെടുത്തിയ കേസാണിത്. മൃതദേഹവും തെളിവുകളും നശിപ്പിക്കപ്പെട്ടു. 2025 മേയ് 16-നാണ് പ്രധാന പ്രതിയായ കരാറുകാരൻ ബിജു പൗലോസ് അറസ്റ്റിലായത്. ബിജുവിന് ഉന്നതരുടെ പിന്തുണ ലഭിച്ചതായും അന്വേഷണ ഉദ്യോഗസ്ഥർ കോടതിയെ തെറ്റിദ്ധരിപ്പിച്ചതായും കുടുംബവും ആദിവാസി സംഘടനയും ആരോപിക്കുന്നു.

ക്രൈം നമ്പർ 61/12 (2012)

2005-ലെ ഓടയംചാൽ കൂട്ടബലാത്സംഗ കേസിൽ, വിചാരണക്കിടെ ഇരയായ പെൺകുട്ടിയെ കാണാതായി. കുട്ടിയെ തട്ടിക്കൊണ്ടുപോയി കൊലപ്പെടുത്തിയതായി കുടുംബവും സംഘടനയും ആരോപിക്കുന്നു. പെൺകുട്ടിയെ കോടതിയിൽ ഹാജരാക്കാൻ പൊലിസിന് കഴിയാത്തതിനാൽ പ്രതികളെ വിട്ടയച്ചു.

സിബിഐ അന്വേഷണം ആവശ്യം

വിചാരണക്കിടെ ഇരകൾ കാണാതാകുന്നത് ആവർത്തിക്കപ്പെടുന്നതിനാൽ, കേസുകൾ സിബിഐക്ക് വിടണമെന്ന് കേരള പട്ടികജാതി ജനസമാജം ആവശ്യപ്പെട്ടു. സംസ്ഥാന പൊലിസിന്റെ അന്വേഷണം പരാജയപ്പെട്ടതായും, ഉന്നതരുടെ ഇടപെടലുകൾ കേസുകളെ ദുർബലപ്പെടുത്തിയതായും സംഘടന ആരോപിക്കുന്നു.