പയ്യന്നൂര്‍: പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി പീഡിപ്പിച്ച കേസില്‍ യുവാവിനെ അറസ്റ്റുചെയ്തു. ചീമേനി പൊലിസ് സ്റ്റേഷന് സമീപം താമസിക്കുന്ന പെയിന്റിങ് തൊഴിലാളി എം ഷിജു(22)വിനെയാണ് സി.ഐ എം.പി ആസാദ് അറസ്റ്റുചെയ്തത്. ഇക്കഴിഞ്ഞ മൂന്നിനായിരുന്നു പെണ്‍കുട്ടിയെ കാണാതായത്. കടയിലേക്ക് സാധനം വാങ്ങാന്‍ പോയ കരിവെള്ളൂര്‍ കൂക്കാനത്തെ പതിനേഴുകാരിയായ പ്ലസ്ടു വിദ്യാര്‍ഥിനിയെ കാണാതാവുകയായിരുന്നു.
ഇതിനെ തുടര്‍ന്ന് ബന്ധുക്കള്‍ നല്‍കിയ പരാതിയില്‍ പൊലിസ് അന്വേഷണം നടത്തുന്നതിനിടെ പെണ്‍കുട്ടിയും യുവാവും കര്‍ണാടകയിലുണ്ടെന്ന് വിവരം ലഭിക്കുകയായിരുന്നു. ഇരുവരെയും പിന്നീട് സ്റ്റേഷനിലെത്തിച്ചു. അറസ്റ്റിലായ പ്രതിയെ തലശ്ശേരി കോടതി റിമാന്‍ഡ് ചെയ്തു.