പട്‌ന: പ്രധാനമന്ത്രി നരേന്ദ്ര മോദി കോര്‍പ്പറേറ്റുകളുടെ കളിപ്പാവയെന്ന് ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി. യുഎസ് പ്രസിഡന്റ് ഡൊണാള്‍ഡ് ട്രംപിനെ മോദിക്ക് പേടിയാണെന്നും, വലിയ നെഞ്ച് ഉണ്ടായത് കൊണ്ടുമാത്രം ശക്തനാകില്ലെന്നും രാഹുല്‍ ഗാന്ധി പറഞ്ഞു. ബിഹാറില്‍ ഇന്‍ഡ്യ മുന്നണിയുടെ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം. 

56 ഇഞ്ച് നെഞ്ചളവുള്ള മോദി ഓപ്പറേഷന്‍ സിന്ദൂറിനിടെ ട്രംപ് വിളിച്ചപ്പോള്‍ പേടിച്ചു. പാകിസ്താനുമായുള്ള സൈനിക നടപടി രണ്ടു ദിവസത്തിനുള്ളില്‍ അവസാനിപ്പിച്ചു. ട്രംപിനെ പേടിക്കുന്ന മോദിയുടെ റിമോര്‍ട്ട് അംബാനിയുടെയും, അദാനിയുടെയും കൈകളിലാണ്. 1971 ല്‍ അന്നത്തെ പ്രധാനമന്ത്രി ഇന്ദിരാഗാന്ധിയെയും അമേരിക്ക ഭീഷണിപ്പെടുത്തിയിരുന്നു. എന്നിട്ടും അവര്‍ ഭയപ്പെടാതെ കാര്യങ്ങള്‍ ചെയ്തു,' രാഹുല്‍ പറഞ്ഞു. 

ALSO READ: 'എസ്ഐആർ' ജനാധിപത്യ വിരുദ്ധം, പ്രമേയം പാസാക്കി തമിഴ്നാട്; 46 പാർട്ടികൾ സുപ്രീം കോടതിയിലേക്ക് 

വലിയ നെഞ്ച് ശക്താനാക്കില്ല, ദുര്‍ബല ശരീരഘടനയുള്ള മഹാത്മാഗാന്ധി ലോകത്തെ സൂപ്പര്‍ പവറുകളായ ബ്രിട്ടീഷുകാരെ നേരിട്ടിട്ടുണ്ട്. ജി.എസ്.ടി, നോട്ട് നിരോധനം തുടങ്ങിയ മോദി സര്‍ക്കാരിന്റെ എല്ലാ തീരുമാനങ്ങളും ചെറുകിട കച്ചവടക്കാരെ നശിപ്പിക്കാനും വന്‍കിടക്കാര്‍ക്ക് നേട്ടമുണ്ടാക്കാനും ലക്ഷ്യമിട്ടുള്ളതായിരുന്നു,' രാഹുല്‍ കൂട്ടിച്ചേര്‍ത്തു. കൂടാതെ ബിഹാറില്‍ ഇന്‍ഡ്യ സഖ്യം അധികാരത്തിലെത്തിയാല്‍ ഏതെങ്കിലും പ്രത്യേക ജാതിക്കല്ല, എല്ലാ വിഭാഗത്തിനും വേണ്ടിയുള്ള സര്‍ക്കാര്‍ രൂപീകരിക്കുമെന്നും രാഹുല്‍ ഉറപ്പ് നല്‍കി.