അബൂദബി: യുഎഇയിൽ 2026 കുടുംബ വർഷമായി ആചരിക്കുമെന്ന് പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ. രാജ്യത്തിന്റെ ശക്തിയുടെയും സമൃദ്ധിയുടെയും അടിസ്ഥാന സ്തംഭമാണ് കുടുംബമെന്ന് അദ്ദേഹം അടിവരയിട്ടു. അബൂദബിയിൽ നടന്ന 2025-ലെ വാർഷിക ഗവൺമെന്റ് മീറ്റിംഗുകളുടെ ഭാഗമായി നടന്ന സെഷനിലാണ് തീരുമാനം. യുഎഇയുടെ ഭാവി കുടുംബത്തിൽ നിന്നാണ് ആരംഭിക്കുന്നതെന്നും, തലമുറകളെ വാർത്തെടുക്കുന്നതും സംസ്കാരവും മൂല്യങ്ങളും ദേശീയ സ്വത്വവും സംരക്ഷിക്കുന്നതും കുടുംബത്തിലൂടെയാണെന്നും ഷെയ്ഖ് മുഹമ്മദ് അഭിപ്രായപ്പെട്ടു.

"ഇന്ന് നടന്ന യുഎഇ ഗവൺമെന്റ് വാർഷിക യോഗങ്ങളിൽ ഞാൻ പങ്കെടുക്കുകയുണ്ടായി. യോ​ഗത്തിൽ ഞങ്ങൾ 'ദേശീയ കുടുംബ വളർച്ചാ അജണ്ട 2031' ദീർഘകാല ദർശനമായി അംഗീകരിച്ചു," എക്സ് പ്ലാറ്റ്‌ഫോമിലെ തന്റെ അക്കൗണ്ടിൽ ഷെയ്ഖ് മുഹമ്മദ് കുറിച്ചു.

ALSO READ: മനുഷ്യത്വത്തിന് വേണ്ടി യുഎഇ: ആഗോള സഹായമായി നൽകിയത് 370 ബില്യൺ ദിർഹം 

കുടുംബത്തിന്റെ വളർച്ചയും സ്ഥിരതയും സമൂഹത്തിന്റെ സുസ്ഥിരത ഉറപ്പാക്കുന്നതിനുള്ള അടിയന്തിര മുൻഗണനയും പൊതുവായ ഉത്തരവാദിത്തവുമാണെന്നും അദ്ദേഹം കൂട്ടിച്ചേർത്തു. ഫെഡറൽ, തദ്ദേശ സ്ഥാപനങ്ങളിൽ നിന്നുള്ള മുതിർന്ന ഉദ്യോഗസ്ഥരും നേതാക്കളും യോഗത്തിൽ പങ്കെടുത്തു.

2031-ലെ ദേശീയ കുടുംബ വളർച്ചാ അജണ്ടയുടെ ലക്ഷ്യങ്ങൾ മുന്നോട്ട് കൊണ്ടുപോകുന്നതിനായാണ് 2026-നെ കുടുംബ വർഷമായി പ്രഖ്യാപിച്ചത്. യുഎഇയിലെ പൗരന്മാർക്കും താമസക്കാർക്കുമിടയിൽ ശക്തമായ കുടുംബബന്ധങ്ങൾ നിലനിർത്തേണ്ടതിന്റെ പ്രാധാന്യത്തെക്കുറിച്ച് അവബോധം സൃഷ്ടിക്കുകയാണ് സംരംഭത്തിന്റെ പ്രധാന ലക്ഷ്യം. ഇമാറാത്തി സമൂഹത്തിന്റെ ഐക്യം, സഹാനുഭൂതി, സഹകരണം തുടങ്ങിയ ആഴത്തിൽ വേരൂന്നിയ മൂല്യങ്ങൾ പ്രോത്സാഹിപ്പിക്കാനും ഈ മൂല്യങ്ങൾ ഭാവി തലമുറകളിലേക്ക് കൈമാറാനുമാണ് ഇതുവഴി ലക്ഷ്യമിടുന്നത്.

uae president has announced that 2026 will be celebrated as the ‘family year’, highlighting initiatives to strengthen family values, social cohesion, and community well-being across the country.