തൃശ്ശൂർ: പെരുമ്പടപ്പ് ചെറവല്ലൂരിൽ പ്ലസ് ടു വിദ്യാർഥിനിയെ വീടിനുള്ളിൽ തീപ്പൊള്ളലേറ്റ നിലയിൽ കണ്ടെത്തി. ഗുരുതരമായി പൊള്ളലേറ്റ വിദ്യാർഥിനി ആശുപത്രിയിൽ ചികിത്സയിലിരിക്കെ മരണപ്പെട്ടു. ചെറവല്ലൂർ താണ്ടവളപ്പിൽ സജീവിന്റെ മകൾ സോന (17) യാണ് മരിച്ചത്. സംഭവത്തിൽ പെരുമ്പടപ്പ് പൊലിസ് കേസെടുത്ത് അന്വേഷണം ആരംഭിച്ചു.

പൂക്കരത്തറ ദാറുൽ ഹിദായ സ്കൂളിലെ പ്ലസ് ടു വിദ്യാർഥിനിയാണ് സോന. ഇന്നലെ വീട്ടിൽ മാതാപിതാക്കളും സഹോദരങ്ങളും ഇല്ലാതിരുന്ന സമയത്താണ് സംഭവം. വീടിന്റെ മുകളിലത്തെ നിലയിലെ മുറിയിൽ വെച്ചാണ് സോനയ്ക്ക് പൊള്ളലേറ്റത്.

ALSO READ: തീരാക്കടം; ഒരു ലക്ഷം രൂപ 74 ലക്ഷമായി, ഒടുവിൽ കിഡ്‌നി വിറ്റു: നീതി തേടി അധികൃതരെ സമീപിച്ച് കർഷകൻ

ബഹളം കേട്ട് ഓടിയെത്തിയ നാട്ടുകാരും ബന്ധുക്കളും ചേർന്ന് ഉടൻ തന്നെ സോനയെ ചങ്ങരംകുളത്തെ സ്വകാര്യ ആശുപത്രിയിൽ എത്തിച്ചെങ്കിലും നില ഗുരുതരമായതിനെ തുടർന്ന് തൃശ്ശൂർ മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. എന്നാൽ, ജീവൻ രക്ഷിക്കാനായില്ല.

സംഭവസ്ഥലത്തെത്തിയ പെരുമ്പടപ്പ് പൊലിസ് പ്രാഥമികമായി ആത്മഹത്യയെന്നാണ് വിലയിരുത്തുന്നത്. എങ്കിലും, മരണകാരണം ഉൾപ്പെടെയുള്ള കാര്യങ്ങൾ വിശദമായി അന്വേഷിക്കുമെന്ന് പൊലിസ് അറിയിച്ചു. മരിച്ച സോനയുടെ അമ്മ ഷേർളി, സഹോദരങ്ങൾ ഷംന, സജ്‌ന എന്നിവരാണ്. സംഭവത്തിന്റെ ദുരൂഹത നീക്കാനുള്ള ശ്രമത്തിലാണ് പൊലിസ്.

മരണത്തിന് പിന്നിലെ യഥാർത്ഥ കാരണം കണ്ടെത്താൻ പൊലിസ് വിശദമായ അന്വേഷണം ആരംഭിച്ചിട്ടുണ്ട്. വീട്ടുകാരിൽ നിന്നും അടുത്ത ബന്ധുക്കളിൽ നിന്നും മൊഴിയെടുക്കുകയും സാഹചര്യത്തെളിവുകൾ പരിശോധിക്കുകയും ചെയ്യും.

A high school student in Thrissur, Kerala, was discovered dead with severe burn injuries, leading police to investigate the circumstances as suspicious.