ആലപ്പുഴ: അരൂർ-തുറവൂർ ഉയരപ്പാത നിർമ്മാണ മേഖലയിൽ ഗർഡർ തകർന്ന് വീണുണ്ടായ അപകടത്തെ തുടർന്ന് ദേശീയപാതയിൽ (NH 66) കർശന ഗതാഗത നിയന്ത്രണം ഏർപ്പെടുത്തി. അപകടത്തെ തുടർന്നുള്ള രക്ഷാപ്രവർത്തനങ്ങൾക്കായി ആലപ്പുഴ ഭാഗത്ത് നിന്ന് എറണാകുളം ഭാഗത്തേക്കുള്ള വാഹനങ്ങൾ വഴി തിരിച്ചുവിട്ട് തുടങ്ങി.

ഗതാഗത ക്രമീകരണം ഇങ്ങനെ:

• എറണാകുളം ഭാഗത്തേക്ക് പോകുന്ന വാഹനങ്ങൾ ചേർത്തല എക്സ്-റേ ജംഗ്ഷനിൽ നിന്ന് പൂച്ചാക്കൽ വഴി തിരിഞ്ഞ് പോകണം.
• ആലപ്പുഴ ഭാഗത്തേക്ക് വരുന്ന വാഹനങ്ങൾ അരൂക്കുറ്റി വഴി തിരിഞ്ഞുപോകാൻ നിർദ്ദേശം നൽകിയിട്ടുണ്ട്.

ഇന്ന് പുലർച്ചെ രണ്ടരയോടെയാണ് ചന്തിരൂരിൽ വെച്ച് അപകടം സംഭവിച്ചത്. നിർമ്മാണത്തിനായി സ്ഥാപിക്കുന്നതിനിടെ രണ്ട് ഭീമൻ ഗർഡറുകളാണ് താഴേക്ക് പതിച്ചത്. മുട്ടയുമായി പോവുകയായിരുന്ന പിക്കപ്പ് വാനിന് മുകളിലേക്കാണ് ഗർഡറുകൾ വീണത്.ഗർഡറുകളിൽ ഒന്ന് വാഹനത്തിന് മുകളിൽ പൂർണ്ണമായും പതിച്ചു, മറ്റൊന്ന് ഭാഗികമായി വീഴുകയായിരുന്നു.സംഭവത്തിൽ വാൻ ഡ്രൈവറായ ആലപ്പുഴ ഹരിപ്പാട് സ്വദേശി രാജേഷ് (45) മരിച്ചു.

വാഹനം ഗർഡറിനടിയിൽ ഞെരിഞ്ഞമർന്ന നിലയിലാണ്. മൃതദേഹം പുറത്തെടുക്കുന്നതിനും ഗർഡറുകൾ നീക്കം ചെയ്യുന്നതിനുമുള്ള ശ്രമങ്ങൾ തുടരുകയാണ്.ദേശീയപാതയിലെ ഗതാഗത തടസ്സത്തെത്തുടർന്ന് യാത്രക്കാർക്ക് മുന്നറിയിപ്പ് നൽകിയിട്ടുണ്ട്.