പൂച്ചാക്കല്‍ (ആലപ്പുഴ): മാതാവിന്റെ മൃതദേഹം ആരുമറിയാതെ വീട്ടിനകത്ത് കുഴിച്ചുമൂടിയ സംഭവം കൊലപാതകമല്ലെന്ന് പൊലിസ്. തുറവൂര്‍ പഞ്ചായത്ത് 18-ാം വാര്‍ഡില്‍ പള്ളിത്തോട് കാട് നികര്‍ത്തില്‍ രാധയുടെ (75) മൃതദേഹമാണ് മകന്‍ ഗിരീഷ് (49 മറ്റാരെയും അറിയിക്കാതെ വീടിനകത്ത് കുഴിച്ചിട്ടത്. രാധയുടേത് സ്വാഭാവിക മരണമാണെന്നാണ് പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നത്. 

പൊലിസ് കസ്റ്റഡിയിലെടുത്ത മകനെ സംഭവത്തില്‍ അസ്വാഭാവികതയില്ലെന്ന് കണ്ടതോടെ വിട്ടയച്ചു. മൃതദേഹം പുറത്തെടുത്ത് ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ നടത്തിയ പോസ്റ്റുമോര്‍ട്ടത്തില്‍ സ്വാഭാവിക മരണമാണെന്ന് തെളിഞ്ഞതോടെയാണ് ഇയാളെ കുത്തിയതോട് പൊലിസ് വിട്ടയച്ചത്. 

മാതാവ് രാധ മരിച്ചതായി ചൊവ്വാഴ്ച രാവിലെയാണ് ഗിരീഷ് മറ്റുള്ളവരോട് പറയുന്നത്. മരണ വിവരം ബന്ധുക്കളെയോ നാട്ടുകാരെയോ അറിയിക്കാതെ, വീടിന്റെ അടുക്കള ഭാഗത്ത് കുഴിയെടുത്ത് സംസ്‌കരിച്ചതാണ് സംശയത്തിനിടയാക്കിയത്. മദ്യപാനിയായിരുന്ന ഗിരീഷ് മാതാവുമായി ഇടയ്ക്കിടെ വഴക്കിടാറുണ്ടായിരുന്നതും നാട്ടുകാരില്‍ സംശയമുണ്ടാക്കി. ഇതോടെ രാധയുടെ മരണത്തില്‍ ദുരൂഹതയുണ്ടെന്ന സംശയത്തെ തുടര്‍ന്ന് പൊലിസിനെ വിവരം അറിയിക്കുകയായിരുന്നു. 

ALSO READ: പത്തനംതിട്ട ജനറല്‍ ആശുപത്രിയില്‍ രോഗിയുടെ തലയില്‍ ചക്ക വീണു, സംഭവം മരുന്ന് വാങ്ങാന്‍ ക്യൂ നില്‍ക്കുന്നതിനിടെ

പൊലിസ് സ്ഥലത്തെത്തിയപ്പോഴും ഗിരീഷ് മദ്യലഹരിയിലായിരുന്നു. രാധയുടെ മരണം സ്വാഭാവികമാണെന്നും താന്‍ കൊലപ്പെടുത്തിയിട്ടില്ലെന്നും ഗിരീഷ് പൊലിസിനോടും പറഞ്ഞു. ചോദ്യം ചെയ്യലിലും അസ്വാഭാവികതയുള്ള കാര്യങ്ങള്‍ കണ്ടെത്താനായില്ലെന്ന് പൊലിസും അറിയിച്ചു.

വെള്ളത്താല്‍ ചുറ്റപ്പെട്ട ഒറ്റപ്പെട്ട പ്രദേശത്താണ് ഗിരീഷും രാധയും താമസിച്ചിരുന്നത്. വേലിയേറ്റ സമയങ്ങളില്‍ വീട് മുഴുവന്‍ വെള്ളത്തില്‍ മുങ്ങിപ്പോകുന്ന അവസ്ഥയിലാണ്. ജീര്‍ണാവസ്ഥയിലുള്ള വീടിന്റെ മുറ്റത്തും മുറികളിലും വെള്ളം കെട്ടിനില്‍ക്കുന്നത് പതിവാണ്. സംസ്‌കാരത്തിനുള്ള സൗകര്യങ്ങളും സാമ്പത്തിക ശേഷിയും ഇല്ലാത്തതിനാലാണ് ഇങ്ങനെ ചെയ്തതെന്നാണ് ഗിരീഷ് പൊലിസിനോട് പറഞ്ഞത്.

Police have confirmed that the death of a 75-year-old woman in Poochakkal, Alappuzha, was due to natural causes, ruling out any foul play. The incident came to light after her son secretly buried her body inside their house without informing relatives or neighbors.