കൊല്ലം: കൊല്ലത്ത് എം. മുകേഷ് എം.എല്‍.എക്ക് സി.പി.എം ജില്ലാ സെക്രട്ടേറിയറ്റ് സീറ്റ് നിഷേധിച്ചു. ഇന്നലെ സി.പി.എം സംസ്ഥാന സെക്രട്ടറി എം.വി.ഗോവിന്ദന്റെ സാന്നിധ്യത്തില്‍ ചേര്‍ന്ന ജില്ലാ സെക്രട്ടേറിയറ്റില്‍ കൊല്ലത്ത് മൂന്ന് സിറ്റിങ് എം.എല്‍.എമാരെ മത്സരിപ്പിക്കാനും കൊല്ലത്ത് മുകേഷിന് പകരം സി.പി.എം ആക്ടിങ് സെക്രട്ടറിയും കശുവണ്ടി കോര്‍പറേഷന്‍ ചെയര്‍മാനുമായ എസ്. ജയമോഹനെ മത്സരിപ്പിക്കാനും തീരുമാനിച്ചു. 

അതേസമയം, പാര്‍ട്ടി എന്ത് തീരുമാനിക്കുന്നുവോ അത് അനുസരിച്ച് നടക്കുമെന്ന് മുകേഷ് പ്രതികരിച്ചു. അതാണ് രീതി. സിനിമയിലും ഒരു ചാന്‍സ് ഞാന്‍ ചോദിച്ചിട്ടില്ല. രാഷ്ട്രീയത്തിലും ഒരു ചാന്‍സ് ഞാന്‍ ചോദിച്ചിട്ടില്ല. എല്ലാം വ്യക്തമായി തന്നെ പറഞ്ഞതാണ്. ജയമോഹനെയാണ് പാര്‍ട്ടി സ്ഥാനാര്‍ഥിയായി തീരുമാനിക്കുന്നതെങ്കില്‍ പൂര്‍ണമായി അദ്ദേഹത്തിനൊപ്പം പ്രവര്‍ത്തിക്കും. എനിക്ക് ഇഷ്ടപ്പെട്ട നേതാവാണ്. തീര്‍ച്ചയായും അദ്ദേഹം ജയിക്കുകയും ചെയ്യുമെന്നും അദ്ദേഹം പറഞ്ഞു. 

ജില്ലയിലെ സി.പി.എം സിറ്റിങ് എം.എല്‍.എമാരില്‍ മുകേഷിന് മാത്രമാണ് സീറ്റില്ലാത്തത്. 2016ല്‍ അന്നത്തെ സിറ്റിങ് എം.എല്‍.എ.യും മുതിര്‍ന്ന നേതാവുമായ പി.കെ. ഗുരുദാസനെ ഒഴിവാക്കി സംസ്ഥാന നേതൃത്വമാണ് മുകേഷിനെ സ്ഥാനാര്‍ഥിയാക്കിയത്. 2021-ലും മുകേഷ് ഇവിടെ മത്സരിച്ച് ജയിച്ചു. 

കൊട്ടാരക്കരയില്‍ കെ.എന്‍. ബാലഗോപാല്‍, ഇരവിപുരം എം. നൗഷാദ്, ചവറയില്‍ ഡോ. സുജിത്ത് വിജയന്‍പിള്ള എന്നിവരാണ് മത്സരിക്കുന്ന സിറ്റിങ് എം.എല്‍.എമാര്‍. കുണ്ടറയില്‍ പുതുമുഖ സ്ഥാനാര്‍ഥിയായി എസ്.എല്‍.സജിമോനെ മത്സരിപ്പിക്കും.

In a significant development ahead of the Kerala Assembly elections, the Communist Party of India (Marxist) (CPM) has decided not to field sitting MLA Mukesh from the Kollam constituency.