ന്യൂഡല്‍ഹി: ഡല്‍ഹി സ്‌ഫോടനവുമായി ബന്ധമുള്ളതായി പൊലിസ് പറയുന്ന ഡോക്ടര്‍മാരുള്‍പ്പെടെയുള്ള സംഘം പിടിയിലായതിന് പിന്നാലെ, വിശദീകരണവുമായി ഫരീദാബാദിലെ അല്‍ഫലാഹ് സര്‍വകലാശാല. ആരോപണവിധേയരായ വ്യക്തികള്‍ സര്‍വകലാശാലയുമായി ബന്ധപ്പെട്ട് പ്രവര്‍ത്തിക്കുന്നു എന്നതൊഴിച്ചാല്‍ അവരുമായി ഡ്യൂട്ടിക്ക് പുറത്തുള്ള ബന്ധമില്ലെന്നും കേസുമായി ബന്ധിപ്പിക്കുന്ന റിപ്പോര്‍ട്ടുകള്‍ അടിസ്ഥാനരഹിതവും അപകീര്‍ത്തികരവുമാണെന്നും വ്യക്തമാക്കി. സര്‍വകലാശാലയിലെ ജീവനക്കാരായ ഡോക്ടര്‍മാര്‍ അറസ്റ്റിലായതിന് പിന്നാലെയാണ് സ്ഥപനം ഔദ്യോഗികമായി വിശദീകരണക്കുറിപ്പ് ഇറക്കിയത്. ആക്രമണത്തിനുപയോഗിച്ച കാര്‍ ഡ്രൈവറായിരുന്ന ഡോ. ഉമര്‍ നബി സര്‍വകലാശാലയിലെ അസിസ്റ്റന്റ് പ്രൊഫസറും മറ്റൊരു പ്രതി ഡോ. മുസമ്മില്‍ ഷക്കീല്‍ ഫാക്വല്‍റ്റിയുമായിരുന്നു.

നടന്ന നിര്‍ഭാഗ്യകരമായ സംഭവവികാസങ്ങളില്‍ ഞങ്ങള്‍ അതീവ ദുഖിതരാണ്. അതിനെയും അപലപിക്കുന്നു. ഞങ്ങളുടെ ചിന്തകളും പ്രാര്‍ത്ഥനകളും ഈ ദാരുണമായ സംഭവങ്ങളാല്‍ ദുരിതമനുഭവിക്കുന്ന എല്ലാ നിരപരാധികള്‍ക്കൊപ്പവുമാണെന്ന് വൈസ് ചാന്‍സലര്‍ പ്രൊഫ. ഭൂപീന്ദര്‍ കൗര്‍ ആനന്ദ് പറഞ്ഞു.

സര്‍വകലാശാലയുടെ ഔദ്യോഗിക പദവിയില്‍ പ്രവര്‍ത്തിക്കുകയല്ലാതെ ഈ വ്യക്തികളുടെ ചെയ്തികളുമായി സര്‍വകലാശാലയ്ക്ക് യാതൊരു ബന്ധവുമില്ലെന്ന് വ്യക്തമാക്കാന്‍ ആഗ്രഹിക്കുന്നു സര്‍വകലാശാലയുടെ പ്രശസ്തിയെയും സല്‍പ്പേരിനേയും മനപ്പൂര്‍വം അപകീര്‍ത്തിപ്പെടുത്തുക എന്ന ഉദ്ദേശ്യത്തോടെ ചില ഓണ്‍ലൈന്‍ പ്ലാറ്റ്‌ഫോമുകള്‍ അടിസ്ഥാനരഹിതവും തെറ്റിദ്ധരിപ്പിക്കുന്നതുമായ വാര്‍ത്തകള്‍ പ്രചരിപ്പിക്കുന്നത് ആശങ്കാജനകമാണ്. ചില പ്ലാറ്റ്‌ഫോമുകള്‍ ആരോപിക്കുന്ന അത്തരം രാസവസ്തുക്കളോ പദാര്‍ത്ഥങ്ങളോ സര്‍വകലാശാല പരിസരത്ത് ഉപയോഗിക്കുകയോ സംഭരിക്കുകയോ കൈകാര്യം ചെയ്യുകയോ ചെയ്യുന്നില്ലന്നെും പ്രസ്താവന വ്യക്തമാക്കി.