കാസര്‍കോട്: ജയിലിനുള്ളില്‍ റിമാന്‍ഡ് പ്രതി മരിച്ച നിലയില്‍. ദേളി, കുന്നുപാറയിലെ മുബഷീര്‍ ആണ് മരിച്ചത്. 2016 ലെ പോക്‌സോ കേസുമായി ബന്ധപ്പെട്ട് ഈ മാസമാണ് ഇയാള്‍ അറസ്റ്റിലായത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്യുകയായിരുന്നു. 

ശാരീരിക അസ്വസ്ഥതകളെ തുടര്‍ന്ന് ഇന്ന് രാവിലെയാണ് ഇയാളെ ആശുപത്രിയില്‍ പ്രവേശിപ്പിച്ചത്. ജനറല്‍ ആശുപത്രിയില്‍ എത്തിപ്പോഴേക്കും മരണം സംഭവിച്ചുവെന്നാണ് വിവരം. 

മരണത്തില്‍ ദുരൂഹത ആരോപിച്ച് കുടുംബം രംഗത്തെത്തി. കഴിഞ്ഞ കുറെ വര്‍ഷമായി ഗള്‍ഫിലായിരുന്നു മുബഷീര്‍. നാട്ടിലെത്തിയപ്പോള്‍ പോക്‌സോ കേസ് ഉണ്ടെന്ന് ആരോപിച്ചാണ് പൊലീസ് കസ്റ്റഡിയിലെടുത്തതെന്ന് ബന്ധുക്കള്‍ പറഞ്ഞു. 

കാസര്‍കോട് സബ് ജയിലില്‍ റിമാന്‍ഡില്‍ കഴിയുമ്പോള്‍ മുബഷീറിന്റെ ഉമ്മയും സഹോദരങ്ങളും സന്ദര്‍ശിച്ചപ്പോള്‍  തനിക്ക് ദേഹോപദ്രവം ഏല്‍ക്കുന്നതായും രക്ഷപ്പെടുത്തണമെന്നും മുബഷീര്‍ പറഞ്ഞിരുന്നു. മാത്രമല്ല, യാതൊരു ആരോഗ്യപ്രശ്‌നങ്ങളുമില്ലാത്ത തനിക്ക് മരുന്നുകള്‍ തന്നിരുന്നുവെന്നും മുബഷീര്‍ ബന്ധുക്കളെ അറിയിച്ചിരുന്നു. മാത്രമല്ല, മുബഷിറിന്റെ ശരീരത്തില്‍ മര്‍ദ്ദനമേറ്റ പാടുകളുണ്ടെന്നും ബന്ധുക്കള്‍ ആരോപിക്കുന്നു. 

അന്വേഷണം ആവശ്യപ്പെട്ട് ജില്ലാ പോലീസ് മേധാവിക്ക് പരാതി നല്‍കിയതായി മുബഷിറിന്റെ സഹോദരന്‍ പറഞ്ഞു.