സാൻഫ്രാൻസിസ്കോ: വെബ് ഇൻഫ്രാസ്ട്രക്ചർ രംഗത്തെ മുൻനിര കമ്പനിയായ ക്ലൗഡ്‌ഫ്ലെയറിന് (Cloudflare) സംഭവിച്ച സാങ്കേതിക തകരാർ കാരണം വെള്ളിയാഴ്ച ലോകമെമ്പാടുമുള്ള നിരവധി ഓൺലൈൻ പ്ലാറ്റ്‌ഫോമുകളുടെ പ്രവർത്തനം താറുമാറായി. യുഎസ് മുൻ പ്രസിഡന്റ് ഡൊണാൾഡ് ട്രംപിന്റെ ട്രൂത്ത് സോഷ്യൽ (Truth Social), ഗ്രാഫിക് ഡിസൈൻ പ്ലാറ്റ്‌ഫോമായ കാൻവ (Canva) എന്നിവയുൾപ്പെടെ നിരവധി പ്രധാന വെബ്‌സൈറ്റുകളെ ഇത് ബാധിച്ചു.

ALSO READ: വാട്‌സ്ആപ്പ് വെബ് ഇടയ്ക്കിടെ ലോഗ്ഔട്ട് ആയി പോകാറുണ്ടോ?... പിന്നിലെ കാരണം ഇതാണ് 

യുഎഇയിൽ ഉച്ചതിരിഞ്ഞ് പല ഓഫീസുകളുടെയും ദൈനംദിന പ്രവർത്തനങ്ങളെ തടസ്സം സാരമായി ബാധിച്ചു. പല വെബ്‌സൈറ്റുകളിലും കണ്ടന്റ് മാനേജ്‌മെന്റ് സിസ്റ്റങ്ങൾ (CMS) താറുമാറായി. ഇന്ത്യൻ സമയം ഉച്ചയ്ക്ക് 3 മണിക്ക് ട്രൂത്ത് സോഷ്യൽ, കാൻവ പോലുള്ള സൈറ്റുകൾ സന്ദർശിക്കാൻ ശ്രമിച്ചവർക്ക് ക്ലൗഡ്‌ഫ്ലെയറിനെ പരാമർശിച്ചുകൊണ്ടുള്ള ഇറർ സന്ദേശമാണ് (Error Message) ലഭിച്ചത്. ക്ലൗഡ്‌ഫ്ലെയർ ഡാഷ്‌ബോർഡിലെയും അനുബന്ധ API-കളിലെയും പ്രശ്നങ്ങൾ കമ്പനി അന്വേഷിക്കുന്നുണ്ടെന്ന് അധികൃതർ അറിയിച്ചു. 

തടസ്സത്തിന്റെ കാരണം സൈബർ ആക്രമണം അല്ലെന്ന് കമ്പനിയുടെ ചീഫ് ടെക്നോളജി ഓഫീസർ ഡെയ്ൻ നെക്റ്റ് എക്സ് പ്ലാറ്റ്ഫോമിൽ സ്ഥിരീകരിച്ചു. കഴിഞ്ഞ നവംബറിലും സമാനമായ ഒരു പ്രശ്‌നം കാരണം ആയിരക്കണക്കിന് ആളുകൾക്ക് എക്സ്, ചാറ്റ്ജിപിടി എന്നിവയുൾപ്പെടെയുള്ള പ്രധാന ഇന്റർനെറ്റ് പ്ലാറ്റ്‌ഫോമുകൾ ആക്‌സസ് ചെയ്യുന്നതിൽ തടസ്സം നേരിട്ടിരുന്നു.

ALSO READ: ലോകത്തിലെ ആദ്യത്തെ ടെക്‌സ്റ്റ് മെസേജിന് 33 വയസ്സ്; ആ സന്ദേശം എന്തായിരുന്നു എന്നറിയാമോ 

വെള്ളിയാഴ്ച രാവിലെ 6.30 ഓടെ ആരംഭിച്ച തടസ്സത്തിന് കാരണം, സുരക്ഷാ ഭീഷണികൾ കൈകാര്യം ചെയ്യുന്നതിനായി രൂപകൽപ്പന ചെയ്ത ഒരു ഓട്ടോമാറ്റിക് കോൺഫിഗറേഷൻ ഫയലായിരുന്നുവെന്ന് കമ്പനി അറിയിച്ചു. പ്രവർത്തനങ്ങൾ പുനഃസ്ഥാപിക്കാനായി ശ്രമങ്ങൾ നടന്നുകൊണ്ടിരിക്കുന്നതിനിടെ, മറ്റ് സൈറ്റുകളിലേക്ക് കണക്റ്റുചെയ്യുന്നതിൽ പ്രശ്‌നങ്ങളുണ്ടെന്ന് ചൂണ്ടിക്കാട്ടി നിരവധി എക്സ് ഉപയോക്താക്കൾ പരാതികളുമായി രംഗത്തെത്തിയിരുന്നു.

a cloudflare outage causes major service disruptions affecting canva truth social and several other global websites