കൊളംബോ: മുന്‍ നായകന്‍ തിലകരത്‌നെ ദില്‍ഷനെ വിജയത്തോടെ യാത്രയാക്കാന്‍ ശ്രീലങ്കക്ക് സാധിച്ചില്ല. രണ്ടാം മത്സരവും വിജയിച്ച് ശ്രീലങ്കക്കെതിരായ ടി20 പരമ്പര ആസ്‌ത്രേലിയ സ്വന്തമാക്കി. വെറ്ററന്‍ ശ്രീലങ്കന്‍ താരം തിലകരത്‌നെ ദില്‍ഷന്‍ തന്റെ അവസാന ടി20 മത്സരം കളിച്ച് കരിയറിനോടു വിട പറഞ്ഞു. അവസാന അന്താരാഷ്ട്ര മത്സരത്തില്‍ ഒരു റണ്‍സ് മാത്രമാണ് ദില്‍ഷനു നേടാന്‍ സാധിച്ചത്.
നാലു വിക്കറ്റിന്റെ വിജയം നേടിയാണ് രണ്ടു മത്സരങ്ങളടങ്ങിയ പരമ്പര ആസ്‌ത്രേലിയ തൂത്തുവാരിയത്. ആദ്യം ബാറ്റു ചെയ്ത ശ്രീലങ്ക 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 129 റണ്‍സെടുത്തപ്പോള്‍ ഓസീസ് 17.5 ഓവറില്‍ ആറു വിക്കറ്റ് നഷ്ടത്തില്‍ 130 റണ്‍സെടുത്തു വിജയം പിടിച്ചു. 29 പന്തില്‍ 66 റണ്‍സെടുത്ത് മാക്‌സ്‌വെല്‍ ഓസീസിനായി വീണ്ടും തിളങ്ങി.