ഷാർജ: ഷാർജ എമിറേറ്റിലെ പള്ളികളിലെ ഇമാം, മുഅദ്ദിൻ എന്നിവരെ സർക്കാർ ജീവനക്കാരായി പരിഗണിക്കും. യു.എ.ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ്‌ അൽ ഖാസിമിയാണ് ഇതുസംബന്ധിച്ച നിർദേശം നൽകിയത്. ഷാർജ സർക്കാരിന്‍റെ ജനറൽ സ്റ്റാഫ് വിഭാഗത്തിൽ ഉൾപ്പെടുത്തുന്നതോടെ സർക്കാർ ജീവനക്കാരുടെ പദവികളും ശമ്പളവും ആനുകൂല്യങ്ങളും ഇവർക്കും ലഭിക്കുന്നതാണ്. സ്ഥാനക്കയറ്റം, ആരോഗ്യ ഇൻഷുറൻസ്, ജോലിയുടെ സ്വഭാവം എന്നിവ പരിഗണിച്ച് 3,000 ദിർഹമിന്‍റെ അലവൻസും അനുവദിക്കും. നിയമാനുസൃത അവധി ദിനങ്ങൾ ഉപയോഗിച്ചില്ലെങ്കിൽ ഇസ്‌ലാമിക കാര്യ വകുപ്പിന്‍റെ സഹകരണത്തോടെ ലീവ് സറണ്ടർ അനുവദിക്കാനും നിർദേശമുണ്ട്. ദൈവിക ഭവനങ്ങളെ സേവിക്കുന്നതിൽ ഇമാമുമാരും മുഅദ്ദിനുകളും വഹിക്കുന്ന പ്രധാന പങ്കിനെ അംഗീകരിക്കുന്നതാണീ നീക്കമെന്ന് ബന്ധപ്പെട്ട അധികൃതർ അറിയിച്ചു.