അബൂദബി: യുഎഇയിലെ സ്വകാര്യ മേഖലയിൽ ജോലി ചെയ്യുന്ന ഇമാറാത്തി പൗരന്മാരുടെ കുറഞ്ഞ പ്രതിമാസ ശമ്പളം 6,000 ദിർഹമായി ഉയർത്തി. മാനവ വിഭവശേഷി സ്വദേശിവൽക്കരണ മന്ത്രാലയമാണ് (MoHRE) ഇത് സംബന്ധിച്ച പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചത്. നിയമം ലംഘിക്കുന്ന കമ്പനികൾക്ക് എമിറേറ്റൈസേഷൻ ക്വാട്ട ക്രെഡിറ്റ് നഷ്ടമാകുമെന്നും പുതിയ വർക്ക് പെർമിറ്റുകൾ നൽകുന്നതിൽ നിയന്ത്രണം വരുത്തുമെന്നും മന്ത്രാലയം മുന്നറിയിപ്പ് നൽകി.

ALSO READ: ഭൂമിയെ ചുറ്റിയത് 29,290 തവണ; 5.5 കോടി യാത്രക്കാർ, 2025-ൽ റെക്കോർഡ് നേട്ടങ്ങളുമായി എമിറേറ്റ്‌സ് 

പുതിയ മിനിമം ശമ്പള നിയമം 2026 ജനുവരി 1 മുതൽ പ്രാബല്യത്തിൽ വരും. ഈ തീയതിക്ക് ശേഷം അനുവദിക്കുന്ന എല്ലാ പുതിയ വർക്ക് പെർമിറ്റുകൾക്കും പുതുക്കുന്ന തൊഴിൽ കരാറുകൾക്കും കുറഞ്ഞത് 6,000 ദിർഹം ശമ്പളം ഉറപ്പാക്കിയിരിക്കണം. നിലവിൽ സ്വദേശി ജീവനക്കാരുള്ള കമ്പനികൾക്ക് ശമ്പളം പുതുക്കുന്നതിനും കരാറുകളിൽ ആവശ്യമായ ഭേദഗതികൾ വരുത്തുന്നതിനുമായി 2026 ജൂൺ 30 വരെയാണ് സമയം അനുവദിച്ചിരിക്കുന്നത്. 

ഈ സമയപരിധിക്കുള്ളിൽ നിയമം നടപ്പിലാക്കാത്ത സ്ഥാപനങ്ങൾക്കെതിരെ 2026 ജൂലൈ 1 മുതൽ കർശനമായ എൻഫോഴ്‌സ്‌മെന്റ് നടപടികൾ സ്വീകരിക്കും. 6,000 ദിർഹത്തിൽ താഴെ ശമ്പളം നൽകുന്ന ജീവനക്കാരെ എമിറേറ്റൈസേഷൻ ലക്ഷ്യങ്ങളുടെ (Emiratisation Targets) കണക്കിൽ ഉൾപ്പെടുത്തില്ല എന്നതാണ് ഇതിൽ പ്രധാനപ്പെട്ട നടപടി. കൂടാതെ, ശമ്പള പരിധി പാലിക്കുന്നത് വരെ പുതിയ വർക്ക് പെർമിറ്റുകൾ നൽകുന്നത് താൽക്കാലികമായി തടയുകയും സ്വദേശിവൽക്കരണവുമായി ബന്ധപ്പെട്ട് കമ്പനികൾക്ക് ലഭിക്കുന്ന വിവിധ ആനുകൂല്യങ്ങൾ റദ്ദാക്കുകയും ചെയ്യും

സ്വദേശി ജീവനക്കാരുടെ വേതനം ക്രമേണ വർദ്ധിപ്പിക്കുന്ന തന്ത്രത്തിന്റെ ഭാഗമായാണ് ഈ നീക്കമെന്ന് ലേബർ മാർക്കറ്റ് അണ്ടർസെക്രട്ടറി ഖലീൽ ഇബ്രാഹിം അൽ ഖൗരി പറഞ്ഞു. നേരത്തെ 4,000 ദിർഹമായിരുന്ന കുറഞ്ഞ ശമ്പളം 5,000 ആയും, ഇപ്പോൾ 6,000 ദിർഹമായും ഉയർത്തുകയാണ് ചെയ്തിരിക്കുന്നത്. വിപണിയിലെ സാഹചര്യങ്ങൾക്കനുസരിച്ച് സ്വദേശികൾക്ക് മാന്യമായ വേതനം ഉറപ്പാക്കാനാണ് സർക്കാർ ലക്ഷ്യമിടുന്നത്.

ALSO READ: ഡ്രൈവർമാർക്ക് സുവർണ്ണാവസരം; ബ്ലാക്ക് പോയിന്റുകളിൽ ഇളവുമായി അബൂദബി പൊലിസ് 

നഫീസ് (Nafis) പോലുള്ള പദ്ധതികളിലൂടെ സ്വകാര്യ മേഖലയിൽ സ്വദേശി പ്രാതിനിധ്യം വർദ്ധിപ്പിക്കാൻ യുഎഇ സർക്കാർ വലിയ പിന്തുണയാണ് നൽകുന്നത്. പുതിയ നിയമം നടപ്പിലാക്കുന്നതിലൂടെ കൂടുതൽ മികച്ച പ്രതിഭകളെ സ്വകാര്യ മേഖലയിലേക്ക് ആകർഷിക്കാൻ സാധിക്കുമെന്നും മന്ത്രാലയം പ്രത്യാശ പ്രകടിപ്പിച്ചു.

uae ministry of national employment announced the minimum salary for citizens has been increased to 6000 dirhams urging private companies to comply with regulations the move aims to support national workforce welfare improve living standards and promote fair employment practices