അബൂദബി: യുഎഇയിൽ സ്വത്തുക്കളും വസ്തുവകകളും വാങ്ങുന്നവർക്ക് കൂടുതൽ സംരക്ഷണം ഉറപ്പാക്കുന്ന പുതിയ 'സിവിൽ ട്രാൻസാക്ഷൻസ് നിയമം' നിലവിൽ വന്നു. ഇന്നലെ മുതലാണ് പരിഷ്കരിച്ച നിയമങ്ങൾ പ്രാബല്യത്തിൽ വന്നത്. കച്ചവട ഇടപാടുകൾ കൂടുതൽ സുതാര്യമാക്കാനും തർക്കങ്ങൾ കുറയ്ക്കാനും ലക്ഷ്യമിട്ടാണ് മാറ്റങ്ങൾ കൊണ്ടുവന്നിരിക്കുന്നത്.

ALSO READ: തീ തുപ്പുന്ന എക്‌സ്‌ഹോസ്റ്റുമായി സൂപ്പർ കാർ; ഡ്രൈവർക്ക് പതിനായിരം ദിർഹം പിഴ ചുമത്തി ദുബൈ പൊലിസ് 

പുതിയ സിവിൽ ട്രാൻസാക്ഷൻസ് നിയമം ഉപഭോക്താക്കളുടെ അവകാശങ്ങളിൽ വലിയ മാറ്റങ്ങളാണ് കൊണ്ടുവന്നിരിക്കുന്നത്. വാങ്ങിയ സ്വത്തുക്കളിലോ വസ്തുവകകളിലോ പിന്നീട് കണ്ടെത്തുന്ന തകരാറുകൾക്കെതിരെ പരാതി നൽകാനുള്ള സമയപരിധി ആറ് മാസത്തിൽ നിന്ന് ഒരു വർഷമായി നിയമം നീട്ടി. 

ഇതിനുപുറമേ ഗുണനിലവാരമില്ലാത്ത വസ്തുവകകളാണ് ലഭിക്കുന്നതെങ്കിൽ അവ നിരസിക്കാനും പണം തിരികെ വാങ്ങാനും അല്ലെങ്കിൽ വില കുറച്ച് അവ കൈവശം വെക്കാനും ഉപഭോക്താക്കൾക്ക് ഇനിമുതൽ അവകാശമുണ്ടാകും. കൂടാതെ, തകരാറുള്ള സാധനത്തിന് പകരം പുതിയത് ആവശ്യപ്പെടാനുള്ള നിയമപരമായ പിന്തുണയും പുതിയ നിയമത്തിൽ ഉറപ്പാക്കുന്നു. റിയൽ എസ്റ്റേറ്റ് ഉൾപ്പെടെയുള്ള വലിയ നിക്ഷേപങ്ങൾ നടത്തുന്നവർക്ക് കൂടുതൽ സുരക്ഷയും വിശ്വാസ്യതയും നൽകുന്നതാണ് പുതിയ നിയമം.

ALSO READ: ഒരു മണിക്കൂറിലേറെ നിലക്കാത്ത വെടിക്കെട്ട്, 6,500 ഡ്രോൺ ഷോ; രാത്രി വൈകിയും കുട്ടികളടക്കം ഉറക്കമൊഴിച്ചു കാത്തിരിപ്പ്; അമ്പരപ്പിച്ച് യു.എ.ഇയുടെ പുതുവത്സരാഘോഷ പരിപാടികൾ

വില്പനക്കാർ അറിഞ്ഞിരിക്കേണ്ടത്

പുതിയ നിയമം വരുന്നതോടെ ബിസിനസ് സ്ഥാപനങ്ങൾ കൂടുതൽ ഉത്തരവാദിത്തം കാണിക്കേണ്ടി വരും. സാധനങ്ങളെക്കുറിച്ചുള്ള കൃത്യമായ വിവരങ്ങൾ വെളിപ്പെടുത്തണം. ഇത് വിപണിയിലെ തർക്കങ്ങൾ കുറയ്ക്കാനും ബിസിനസ് രംഗത്ത് വിശ്വാസം വർദ്ധിപ്പിക്കാനും സഹായിക്കുമെന്ന് നിയമവിദഗ്ധർ ചൂണ്ടിക്കാട്ടുന്നു.

യുഎഇയുടെ പരമ്പരാഗത നിയമങ്ങളെയും ശരീഅത്ത് മൂല്യങ്ങളെയും മാനിച്ചുകൊണ്ട് തന്നെ, ആധുനിക കാലഘട്ടത്തിന് അനുയോജ്യമായ രീതിയിലാണ് നിയമം പരിഷ്കരിച്ചിരിക്കുന്നത്. സാധാരണക്കാർക്കും ബിസിനസുകാർക്കും ഒരുപോലെ ഗുണകരമാകുന്ന മാറ്റമാണിതെന്ന് അധികൃതർ വ്യക്തമാക്കി.

the new uae civil transactions law extends defect claim periods to one year, offering buyers better protection, flexible refund options, and stronger legal security for high-value real estate investments and commercial sales across the emirates starting january 2026.