പത്തനംതിട്ട: ബലാത്സംഗക്കേസില്‍ റിമാന്‍ഡിലായി ജയിലില്‍ കഴിയുന്ന രാഹുല്‍ മാങ്കൂട്ടത്തിലിനെ 
കോടതിയില്‍ ഹാജരാക്കി. കസ്റ്റഡി അപേക്ഷയുമായി ബന്ധപ്പെട്ടാണ് കോടതിയില്‍ ഹാജരാക്കിയത്. രാഹുലിനെ ഹാജരാക്കാന്‍ ഉത്തരവിട്ട് തിരുവല്ല ജുഡിഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതി പ്രൊഡക്ഷന്‍ വാറന്‍ഡ് പുറപ്പെടുവിച്ചിരുന്നു. രാഹുലിനെ ഇന്ന് നേരിട്ട് ഹാജരാക്കാനാണ് പൊലിസിന് നല്‍കിയ നിര്‍ദേശം.

അതേസമയം, കോടതിക്ക് പുറത്ത് പ്രതിഷേധം കനക്കുകയാണ്. പ്രതിഷേധക്കാര്‍ രാഹുലിനെതിരെ ചീമുട്ടയെറിഞ്ഞു.  

കേസുമായി ബന്ധപ്പെട്ട് കൂടുതല്‍ തെളിവെടുപ്പിനായി പ്രതിയെ 7 ദിവസം കസ്റ്റഡിയില്‍ വേണമെന്ന് പ്രോസിക്യൂഷന്‍ കോടതിയില്‍ ആവശ്യപ്പെട്ടു. എന്നാല്‍, രാഹുലിന് ജാമ്യം അനുവദിക്കണമെന്നാണ് പ്രതിഭാഗത്തിന്റെ വാദം. കേസില്‍ കുറ്റം നിലനില്‍ക്കില്ല എന്ന് പ്രതിഭാഗം വാദിച്ചു. അന്വേഷണ ഉദ്യോഗസ്ഥന്റെ റിപ്പോര്‍ട്ട് കിട്ടാതെ എങ്ങനെ ജാമ്യാപേക്ഷ പരിഗണിക്കുമെന്ന് മജിസ്‌ട്രേറ്റ് ചോദിച്ചു. കസ്റ്റഡി അപേക്ഷയിലും ജാമ്യാപേക്ഷയിലും പ്രതിയെ ഹാജരാക്കിയ ശേഷം കോടതി അന്തിമ തീരുമാനം എടുക്കും. കസ്റ്റഡി അപേക്ഷയില്‍ അന്തിമ തീരുമാനമായതിനുശേഷമായിരിക്കും ഇനി പ്രതിഭാഗം ജാമ്യാപേക്ഷയില്‍ വാദം തുടരുക. മജിസ്‌ട്രേറ്റ് കോടതി രാഹുലിന് ജാമ്യം കൊടുക്കാനുള്ള സാധ്യത കുറവാണെന്നാണ് റിപ്പോര്‍ട്ട്. മാവേലിക്കര സബ് ജയിലിലുള്ള രാഹുലിനെ വൈദ്യപരിശോധന നടത്തിയശേഷമാണ് കോടതിയില്‍ എത്തിച്ചത്.

ALSO READ: ബലാത്സം​ഗക്കേസ്; രാഹുൽ മാങ്കൂട്ടത്തിലിനെ ഇന്ന് കോടതിയിൽ ഹാജരാക്കും

അതിനിടെ, രാഹുലിനെതിരെ പരാതി നല്‍കിയ യുവതിക്ക് നേരെ നടന്ന സൈബര്‍ ആക്രമണത്തില്‍ കേസെടുക്കാന്‍ ഡി.ജി.പി നിര്‍ദ്ദേശിച്ചു.

rahul mankootathil, currently in remand in a rape case, was produced before the thiruvalla judicial first class magistrate court as protests erupted outside and custody plea was heard.