കൊച്ചി: 'ഡോക്ടർ' എന്ന പദവി മെഡിക്കൽ ബിരുദധാരികൾക്ക് (എംബിബിഎസ്) മാത്രമായി നിയമപരമായി നീക്കിവെച്ചിട്ടില്ലെന്ന് ഹൈക്കോടതിയുടെ സുപ്രധാന ഉത്തരവ്. ഫിസിയോതെറാപ്പിസ്റ്റുകൾക്കും ഒക്യുപേഷണൽ തെറാപ്പിസ്റ്റുകൾക്കും തങ്ങളുടെ പേരിനൊപ്പം 'ഡോക്ടർ' എന്ന് ചേർക്കാമെന്ന് കോടതി വ്യക്തമാക്കി. ഈ പദവി എംബിബിഎസ് ബിരുദമുള്ളവർക്ക് മാത്രമുള്ളതാണെന്ന് ചൂണ്ടിക്കാട്ടി ഇന്ത്യൻ മെഡിക്കൽ അസോസിയേഷൻ (ഐഎംഎ) സമർപ്പിച്ച ഹരജി തള്ളിക്കൊണ്ടാണ് ജസ്റ്റിസ് പി.വി. കുഞ്ഞികൃഷ്ണൻ്റെ ഉത്തരവ്.

ALSO READ: യുവാവിന്റെ ആത്മഹത്യ: ഷിംജിതയുടെ ജാമ്യാപേക്ഷയിൽ വിധി ചൊവ്വാഴ്ച; പൊലിസിന്റെ റിമാൻഡ് റിപ്പോർട്ടിൽ ഗുരുതര പരാമർശങ്ങൾ

കോടതിയുടെ നിരീക്ഷണങ്ങൾ

'ഡോക്ടർ' എന്ന പദവി ഉപയോഗിക്കുന്നതിൽ മെഡിക്കൽ ബിരുദധാരികൾക്ക് മാത്രമായി നിയമപരമായ പ്രത്യേക അവകാശമില്ല.

ഫിസിയോതെറാപ്പിസ്റ്റുകൾ ഡോക്ടർമാരുടെ വെറും സഹായികൾ മാത്രമാണെന്ന വാദം കോടതി തള്ളി. സ്വതന്ത്രമായി രോഗനിർണയം നടത്താനും ചികിത്സ നൽകാനും ഇവർക്ക് അധികാരമുണ്ട്.

ആരോഗ്യരംഗത്തെ വിവിധ വിഭാഗങ്ങളിൽ വൈദഗ്ധ്യം നേടുന്നവർക്കും ഈ പദവി ഉപയോഗിക്കാവുന്നതാണെന്ന് കോടതി നിരീക്ഷിച്ചു.

ഫിസിയോതെറാപ്പിസ്റ്റുകളും ഒക്യുപേഷണൽ തെറാപ്പിസ്റ്റുകളും ആരോഗ്യ മേഖലയിൽ നിർണായക പങ്ക് വഹിക്കുന്നവരാണ്. അതുകൊണ്ടുതന്നെ തങ്ങളുടെ പ്രൊഫഷനൽ പദവിയുടെ ഭാഗമായി 'ഡോക്ടർ' എന്ന് ഉപയോഗിക്കുന്നതിൽ തെറ്റില്ല എന്നും  കോടതി വ്യക്തമാക്കി.

ആരോഗ്യരംഗത്ത് പ്രവർത്തിക്കുന്ന വിവിധ പാരാമെഡിക്കൽ പ്രൊഫഷണലുകൾക്ക് വലിയ ആശ്വാസം നൽകുന്നതാണ് ഈ വിധി. മെഡിക്കൽ കൗൺസിലിൻ്റെ നിബന്ധനകൾക്കപ്പുറം പദവികളുടെ ഉപയോഗത്തിൽ കൂടുതൽ വ്യക്തത വരുത്തുന്നതാണ് ഹൈക്കോടതിയുടെ ഈ ഇടപെടൽ. 

The Kerala High Court has ruled that the title 'Doctor' is not legally reserved exclusively for medical graduates (MBBS). Dismissing a petition by the Indian Medical Association (IMA), the court stated that physiotherapists and occupational therapists are also entitled to use the prefix.