വാഷിങ്ടൺ: അമേരിക്കയിലെ അറ്റ്‌ലാന്റയിൽ ഭാര്യയെയും മൂന്ന് ബന്ധുക്കളെയും വെടിവെച്ച് കൊന്ന സംഭവത്തിൽ ഇന്ത്യൻ വംശജൻ അറസ്റ്റിലായി. വിജയ് കുമാർ (51) ആണ് പിടിയിലായത്. കുടുംബകലഹത്തെത്തുടർന്നുണ്ടായ തർക്കമാണ് കൂട്ടക്കൊലപാതകത്തിൽ കലാശിച്ചത്.

കൊല്ലപ്പെട്ടവർ

വിജയ് കുമാറിന്റെ ഭാര്യ മീമു ഡോഗ്ര (43), ബന്ധുക്കളായ ഗൗരവ് കുമാർ (33), നിധി ചന്ദർ (37), ഹരീഷ് ചന്ദർ (38) എന്നിവരാണ് കൊല്ലപ്പെട്ടത്. വെള്ളിയാഴ്ച പുലർച്ചെ 2.30-ഓടെയാണ് ബ്രൂക്ക് ഐവി കോർട്ടിലെ വസതിയിൽ വെടിവെപ്പ് നടന്നത്.

കുട്ടികളുടെ രക്ഷപ്പെടൽ

കൃത്യം നടക്കുമ്പോൾ വീട്ടിലുണ്ടായിരുന്ന മൂന്ന് കുട്ടികൾ തലനാരിഴയ്ക്കാണ് രക്ഷപ്പെട്ടത്. വിജയ് കുമാറിന്റെ 12 വയസ്സുള്ള മകനും മറ്റ് രണ്ട് കുട്ടികളുമാണ് (ഏഴും പത്തും വയസ്സ്)  വെടിയുണ്ടകളിൽ നിന്നും രക്ഷപ്പെടാൻ അലമാരയ്ക്കുള്ളിൽ ഒളിച്ചിരുന്നത്. ഇതിൽ വിജയ് കുമാറിന്റെ മകൻ ഉടൻ തന്നെ എമർജൻസി നമ്പറിൽ വിളിച്ച് വിവരം അറിയിച്ചതാണ് പൊലിസിന് വേഗത്തിൽ സ്ഥലത്തെത്താൻ സഹായകമായത്.

ഒളിവിൽ കഴിഞ്ഞ പ്രതിയെ പിടികൂടി

പൊലിസ് എത്തുമ്പോഴേക്കും നാല് പേരും മരണപ്പെട്ടിരുന്നു. കൊലപാതകത്തിന് ശേഷം രക്ഷപ്പെട്ട പ്രതിയെ കണ്ടെത്താൻ പൊലിസ് ഡോഗ് സ്ക്വാഡിനെ നിയോഗിച്ചു. വീടിന് സമീപത്തുള്ള കാടിന് സമാനമായ പ്രദേശത്തെ മരങ്ങൾക്കിടയിൽ ഒളിച്ചിരുന്ന വിജയ് കുമാറിനെ പൊലിസ് നായയുടെ സഹായത്തോടെയാണ് കണ്ടെത്തിയത്.

ഇന്ത്യൻ മിഷന്റെ ഇടപെടൽ

മരിച്ചവരുടെ കുടുംബാംഗങ്ങളുമായി ബന്ധപ്പെട്ടതായും അവർക്ക് ആവശ്യമായ എല്ലാ നിയമസഹായങ്ങളും ഉറപ്പാക്കുമെന്നും അറ്റ്‌ലാന്റയിലെ ഇന്ത്യൻ മിഷൻ അറിയിച്ചു. പ്രതിക്കെതിരെ കൊലപാതകക്കുറ്റം ഉൾപ്പെടെയുള്ള ഗൗരവകരമായ വകുപ്പുകൾ ചുമത്തിയിട്ടുണ്ട്.