മനാമ: ബഹ്‌റൈനും യുകെയും തമ്മിലുള്ള സൈനിക സഹകരണം കൂടുതല്‍ ശക്തമാക്കുന്നതിനുള്ള ചര്‍ച്ചകള്‍ മനാമയില്‍ നടന്നു. ബഹ്‌റൈന്‍ ദേശീയ സുരക്ഷ ഉപദേഷ്ടാവും റോയല്‍ ഗാര്‍ഡ് കമാന്‍ഡറുമായ ഷൈഖ് നാസര്‍ ബിന്‍ ഹമദ് അല്‍ ഖലീഫ, ബ്രിട്ടനിലെ റോയല്‍ മിലിറ്ററി അക്കാദമി സാന്‍ഡ്ഹസ്റ്റ് കമാന്‍ഡന്റായ ബ്രിഗേഡിയര്‍ നിക്കോളസ് വെളൈറ്റ്‌ബോക്കറ്റിനെ സ്വീകരിച്ചാണ് ചര്‍ച്ച നടത്തിയത്.

കൂടിക്കാഴ്ചയില്‍ ഇരുരാജ്യങ്ങളും തമ്മിലുള്ള ദീര്‍ഘകാല സൈനിക ബന്ധം കൂടുതല്‍ വിപുലപ്പെടുത്തുന്നതിനെക്കുറിച്ചാണ് പ്രധാനമായും സംസാരിച്ചത്. പ്രത്യേകിച്ച് സൈനിക പരിശീലനം, നേതൃത്വ വികസനം, പരിചയസമ്പന്നരായ ഓഫീസര്‍മാരുടെ അറിവ് കൈമാറ്റം തുടങ്ങിയ മേഖലകളില്‍ സഹകരണം ശക്തമാക്കാന്‍ ധാരണയായി.

ALSO READ: ബഹ്‌റൈനിൽ വാഹനാപകടം: 23 വയസ്സുകാരന് ദാരുണാന്ത്യം; ഒരാൾക്ക് പരുക്ക്

സാന്‍ഡ്ഹസ്റ്റ് അക്കാദമിയുമായി ബഹ്‌റൈനിന് വര്‍ഷങ്ങളായി നിലനില്‍ക്കുന്ന ബന്ധം രാജ്യത്തിന്റെ സൈനിക പരിശീലന നിലവാരം ഉയര്‍ത്തുന്നതില്‍ നിര്‍ണായക പങ്ക് വഹിക്കുന്നതായി ഷൈഖ് നാസര്‍ വ്യക്തമാക്കി. ബഹ്‌റൈന്‍ സൈനിക ഉദ്യോഗസ്ഥര്‍ക്ക് അന്താരാഷ്ട്ര തലത്തിലുള്ള പരിശീലനം ലഭ്യമാക്കുന്നതില്‍ യുകെ നല്‍കുന്ന പിന്തുണ വിലമതിക്കപ്പെടുന്നതാണെന്നും അദ്ദേഹം വ്യക്തമാക്കി.

ഭാവിയില്‍ സംയുക്ത പരിശീലന പരിപാടികള്‍, വിദഗ്ധ പരിശീലകര്‍ തമ്മിലുള്ള കൈമാറ്റം, വിദ്യാഭ്യാസ സഹകരണം തുടങ്ങിയവ കൂടുതല്‍ വികസിപ്പിക്കാനുളള സാധ്യതകളും ചര്‍ച്ചയില്‍ ഉള്‍പ്പെടുത്തി. ഇത് രണ്ട് രാജ്യങ്ങള്‍ തമ്മിലുള്ള വിശ്വാസവും പങ്കാളിത്തവും കൂടുതല്‍ ശക്തമാക്കുമെന്ന് വിലയിരുത്തുന്നു.

ഗള്‍ഫ് മേഖലയിലെ സുരക്ഷാ സഹകരണത്തിന് ഈ ബന്ധം ഗുണകരമാകുമെന്നും, പ്രാദേശിക സ്ഥിരത ഉറപ്പാക്കുന്നതില്‍ ബഹ്‌റൈന്‍-യുകെ സഹകരണം നിര്‍ണായകമാകുമെന്നും നിരീക്ഷകര്‍ പറയുന്നു.

Bahrain and the UK discussed strengthening military cooperation, focusing on training, leadership development and knowledge exchange during a meeting in Manama.