മസ്‌കത്ത്: ഒമാനില്‍ രക്തശേഖരം കുറയുന്ന സാഹചര്യത്തില്‍ പൊതുജനങ്ങളോട് അടിയന്തരമായി രക്തദാനം ചെയ്യാന്‍ ആരോഗ്യവകുപ്പ് അഭ്യര്‍ത്ഥിച്ചു. രാജ്യത്തെ വിവിധ ആശുപത്രികളിലും ബ്ലഡ് ബാങ്കുകളിലും ആവശ്യമായ രക്തയൂണിറ്റുകളുടെ ലഭ്യത കുറഞ്ഞതായി റിപ്പോര്‍ട്ടുകള്‍ വന്നതോടെയാണ് ആരോഗ്യവകുപ്പിന്റെ അറിയിപ്പ്.

അപകടങ്ങളില്‍ പരിക്കേറ്റവര്‍, ശസ്ത്രക്രിയയ്ക്ക് വിധേയരാകുന്ന രോഗികള്‍, ഗുരുതര ആരോഗ്യപ്രശ്‌നങ്ങള്‍ നേരിടുന്നവര്‍ എന്നിവര്‍ക്കാണ് അടിയന്തരമായി രക്തം ആവശ്യമാകുന്നത്. എന്നാല്‍ കഴിഞ്ഞ ദിവസങ്ങളിലായി രക്തദാനികളുടെ എണ്ണം കുറഞ്ഞതോടെ ചില ആശുപത്രികളില്‍ രക്തസമ്പത്ത് ആശങ്കാജനകമായ നിലയിലാണെന്ന് അധികൃതര്‍ അറിയിച്ചു.

ആരോഗ്യപ്രശ്‌നങ്ങളില്ലാത്ത 18 മുതല്‍ 65 വയസ്സുവരെ പ്രായമുള്ളവര്‍ക്ക് രക്തദാനം ചെയ്യാമെന്ന് ആരോഗ്യവകുപ്പ് അറിയിച്ചു. രക്തദാനം ചെയ്യാന്‍ തയ്യാറുള്ളവര്‍ അടുത്തുള്ള സര്‍ക്കാര്‍ അല്ലെങ്കില്‍ സ്വകാര്യ ബ്ലഡ് ബാങ്കുകളില്‍ നേരിട്ട് എത്തണമെന്ന് അധികൃതര്‍ പറഞ്ഞു. ചെറിയ ആരോഗ്യപരിശോധനയ്ക്കുശേഷം മാത്രമാണ് രക്തദാനം അനുവദിക്കുക.

പ്രത്യേകിച്ച് 'ഒ' പോസിറ്റ്ീവ്, 'എ' പോസിറ്റീവ്, 'ബി' പോസിറ്റീവ് പോലുള്ള സാധാരണ രക്തഗ്രൂപ്പുകള്‍ക്ക് കൂടുതലായാണ് ആവശ്യകതയെന്ന് ബ്ലഡ് ബാങ്ക് അധികൃതര്‍ അറിയിച്ചു. രക്തദാനം ചെയ്താലത് പലരുടെയും ജീവന്‍ രക്ഷിക്കാന്‍ സഹായകമാകുമെന്ന സന്ദേശവും ആരോഗ്യവകുപ്പ് മുന്നോട്ടുവച്ചു.

ALSO READ: ഉഭയകക്ഷി ബന്ധം ശക്തിപ്പെടുത്താന്‍ ഒരുമിച്ച് ഒമാനും ഹംഗറിയും 

രക്തദാനം സുരക്ഷിതമാണെന്നും, ശരീരത്തിന് ദോഷകരമല്ലെന്നും ആരോഗ്യ വിദഗ്ധര്‍ വ്യക്തമാക്കി. രക്തദാനത്തിനുശേഷം കുറച്ച് സമയം വിശ്രമിക്കണമെന്നും, വെള്ളം കൂടുതല്‍ കുടിക്കണമെന്നും നിര്‍ദേശിച്ചിട്ടുണ്ട്. മുമ്പ് രക്തദാനം ചെയ്തവര്‍ക്ക് വീണ്ടും ദാനം ചെയ്യാന്‍ യോഗ്യതയുണ്ടെങ്കില്‍ മുന്നോട്ടുവരണമെന്നും അധികൃതര്‍ അഭ്യര്‍ത്ഥിച്ചു.

സമൂഹത്തിന്റെ സഹകരണം ഉണ്ടെങ്കില്‍ ഈ പ്രതിസന്ധി മറികടക്കാനാകുമെന്നും, ഓരോ രക്തദാനവും ഒരു ജീവന്‍ രക്ഷിക്കുന്നതിനു തുല്യമാണെന്നും ആരോഗ്യവകുപ്പ് ഓര്‍മിപ്പിച്ചു.

Health authorities in Oman have made an urgent appeal for blood donation as blood stocks at hospitals and blood banks have declined across the coutnry.