കക്കട്ടില്‍: ഒഞ്ചിയം ചോറോട് കുടിവെള്ള വിതരണ പൈപ്പ് പൊട്ടിയത് ദുരിതമാകുന്നു. കുറ്റ്യാടിയില്‍ നിന്ന് ശുദ്ധജലമെത്തിക്കുന്ന പൈപ്പ് സംസ്ഥാന പാതയില്‍ സ്വകാര്യ ടെലിഫോണ്‍ കേബിള്‍ കുഴിയെടുക്കുന്നതിനിടെയാണ് പൊട്ടിയത്. തൊഴിലാളികളുടെ അശ്രദ്ധയാണ് പൈപ്പ് പൊട്ടാന്‍ ഇടയാക്കിയതെന്ന് ആക്ഷേപമുണ്ട്. കുറ്റ്യാടി വാട്ടര്‍ ട്രീറ്റ്‌മെന്റ് പ്ലാന്റിന്റെ അറ്റകുറ്റപ്പണി നടക്കുന്നതിനാല്‍ കഴിഞ്ഞ നാലു ദിവസങ്ങളിലായി ജലവിതരണം നിലച്ചിരിക്കുകയാണ്.
ശനിയാഴ്ച വിതരണം പുനഃസ്ഥാപിച്ചുവെങ്കിലും നാദാപുരം, തുണേരി പഞ്ചായത്തുകളില്‍ ശനിയാഴ്ചയും ഞായറാഴ്ചയും വെള്ളം വരുന്നതിനിടെയാണ് പൈപ്പ് പൊട്ടിയത്. ഇതോടെ ഈ പ്രദേശങ്ങള്‍ക്കൊപ്പം ഒഞ്ചിയം ഭാഗങ്ങളിലും ശുദ്ധജല വിതരണം നിലച്ചു. ജലവിതരണം നിലച്ചത് ഓണം-പെരുന്നാള്‍ ആഘോഷങ്ങളെ ബാധിക്കുമെന്ന ഭീതിയിലാണ് പ്രദേശത്തുകാര്‍.