ലഡാക്: ലഡാക് ലഫ്റ്റനന്റ് ഗവര്‍ണര്‍ കവിന്ദര്‍ ഗുപ്ത രാജിവെച്ചു. 2025 ജൂലൈ 18നാണ് കവിന്ദര്‍ സ്ഥാനമേറ്റത്. കേവലം 9 മാസം പൂര്‍ത്തിയാകുമ്പോഴാണ് രാജി പ്രഖ്യാപനം. പശ്ചിമ ബംഗാള്‍ ഗവര്‍ണര്‍ ആനന്ദ ബോസിന്റെ അപ്രതീക്ഷിത രാജിക്ക് പിന്നാലെയാണ് കവിന്ദറിന്റെയും രാജി. 

ലഡാകിന്റെ മൂന്നാമത്തെ ലഫ്റ്റനന്റ് ഗവര്‍ണറായിരുന്നു കവിന്ദര്‍. ലഡാകിന്റെ സംസ്ഥാന പദവി, ഭരണഘടന ആറാം ഷെഡ്യുള്‍ പ്രകാരമുള്ള സംരക്ഷണം എന്നിവ ആവശ്യപ്പെട്ട് ലേ അപെക്‌സ് ബോഡി, കാര്‍ഗില്‍ ഡെമോക്രാറ്റിക് അലയന്‍സ് എന്നീ സംഘടനകളുടെ നേതൃത്വത്തില്‍ ഇദ്ദേഹത്തിന്റെ കാലയളവില്‍ വലിയ പ്രതിഷേധങ്ങള്‍ ഉയര്‍ന്നിരുന്നു. ജമ്മു കശ്മീര്‍ സംസ്ഥാനമായിരുന്നപ്പോള്‍ അവിടുത്തെ അവസാനത്തെ ഉപമുഖ്യമന്ത്രിയായും, നിയമസഭാ സ്പീക്കറായും കവീന്ദര്‍ സേവനമനുഷ്ഠിച്ചിട്ടുണ്ട്. 

ALSO READ: ഇന്ത്യയുടെ സുഖോയ് 30 യുദ്ധവിമാനം തകര്‍ന്നുവീണതായി സംശയം; പൈലറ്റിനെ കാണാനില്ല; അന്വേഷണം ആരംഭിച്ച് വ്യോമസേന  

അതേസമയം മൂന്നരവർഷത്തെ സേവനത്തിന് പിന്നാലെയാണ് ബം​ഗാൾ ​ഗവർണർ ആനന്ദബോസിന്റെ അപ്രതീക്ഷിത രാജി. ഡൽഹിയിൽ വെച്ചാണ് അദ്ദേഹം രാജി നൽകിയതെന്ന് രാജ്ഭവൻ ഉദ്യോഗസ്ഥർ സ്ഥിരീകരിച്ചു. ഗവർണർ പദവിയിൽ താൻ മതിയായ സമയം ചെലവഴിച്ചു കഴിഞ്ഞുവെന്നും അതുകൊണ്ടാണ് രാജിവെച്ച് പടിയിറങ്ങുന്നതെന്നും ആനന്ദ ബോസ് വാർത്താ ഏജൻസിയായ പി.ടി.ഐയോട് പ്രതികരിച്ചു. ആനന്ദ ബോസിനു പകരം ആർ.എൻ. രവിയെ ബംഗാളിലെ പുതിയ ഗവർണറായി നിയമിക്കുമെന്നാണു വിവരം. 

ആനന്ദ ബോസിന്റെ രാജി ഞെട്ടിച്ചെന്ന് മുഖ്യമന്ത്രി മമത ബാനർജി എക്സിൽ കുറിച്ചു. രാജിക്ക് പിന്നിലെ കാരണം അറിയില്ലെന്നും നിയമസഭാ തിരഞ്ഞെടുപ്പ് അടുത്ത സാഹചര്യത്തിൽ ചില രാഷ്ട്രീയ ലക്ഷ്യങ്ങൾ നിറവേറ്റുന്നതിനായി കേന്ദ്രത്തിൽ നിന്ന് ഗവർണർക്ക് സമ്മർദം ഉണ്ടായിട്ടുണ്ടെങ്കിൽ അതിൽ അത്ഭുതമില്ലെന്നും മമത എക്സിൽ കുറിച്ചു. ആർ.എൻ. രവിയെ പുതിയ ഗവർണറായി നിയമിച്ചെന്ന് കേന്ദ്ര ആഭ്യന്തരമന്ത്രിയിൽ നിന്ന് അറിയിപ്പ് കിട്ടിയതായും എന്നാൽ ഇക്കാര്യത്തിൽ ഒരു ആലോചനയും നടന്നിട്ടില്ലന്നും മമത എക്സിൽ കുറിച്ചു.

തമിഴ്‌നാട് മുൻ ഗവർണർ ആണ് പുതുതായി നിയമിതനായ ആർ.എൻ. രവി. ഗവർണറെ നിയമിക്കുമ്പോൾ സംസ്ഥാന സർക്കാരുമായി ആലോചിക്കണമെന്ന കീഴ്‌വഴക്കം കേന്ദ്രം ലംഘിച്ചു. ഇത് ഇന്ത്യൻ ഭരണഘടനയുടെ അന്തസത്തയെ തകർക്കുന്നതും ഫെഡറൽ സംവിധാനത്തിന് നേരെയുള്ള കടന്നുകയറ്റവുമാണ് എന്നും മമത ബാനർജി പറഞ്ഞു. 

Kavinder Gupta resigned as the lieutenant governor of Ladakh. he had assumed office on july 18, 2025, and the resignation comes after completing just nine months in the post.