ഇ.പി മുഹമ്മദ്

കോഴിക്കോട്: നിയമസഭാ തെരഞ്ഞെടുപ്പില്‍ കൂടുതല്‍ വനിതാ സ്ഥാനാര്‍ഥികളെ രംഗത്തിറക്കാന്‍ കോണ്‍ഗ്രസ്. വലിയ ജില്ലകളില്‍ ഒരു സീറ്റിലെങ്കിലും വനിതയെ നിര്‍ത്താനാണ് കോണ്‍ഗ്രസിന്റെ നീക്കം. കഴിഞ്ഞ തെരഞ്ഞെടുപ്പില്‍ 12 വനിതകളാണ് കോണ്‍ഗ്രസിനായി മത്സരിച്ചത്. ഇത്തവണ 15ലേറെ പേര്‍ മത്സരരംഗത്തുണ്ടാകും. കോണ്‍ഗ്രസിന്റെ ഏക സിറ്റിങ് എം.എല്‍.എ ആയ ഉമാ തോമസ് തൃക്കാക്കരയില്‍ വീണ്ടും മത്സരിക്കും.
തിരുവനന്തപുരം ജില്ലയില്‍ വാമനപുരത്ത് രമണി പി. നായരെയും നേമത്ത് വൈഷ്ണ സുരേഷിനെയും കോണ്‍ഗ്രസ് പരിഗണിക്കുന്നുണ്ട്. കൊല്ലം ഡി.സി.സി മുന്‍ പ്രസിഡന്റ് ബിന്ദു കൃഷ്ണയും മത്സരിക്കുമെന്ന് ഉറപ്പായി. കഴിഞ്ഞതവണ മത്സരിച്ച കൊല്ലം സീറ്റില്‍ തന്നെയാകും ബിന്ദു കൃഷ്ണ ജനവിധി തേടുക.
സി.പി.എമ്മില്‍നിന്ന് കോണ്‍ഗ്രസിലെത്തിയ മുന്‍ കൊട്ടാരക്കര എം.എല്‍.എ അയിഷാ പോറ്റിയെ മത്സരിപ്പിക്കാന്‍ പാര്‍ട്ടി തീരുമാനിച്ചിട്ടുണ്ട്. ആലപ്പുഴ ജില്ലയില്‍ ഇത്തവണയും രണ്ടുപേര്‍ മത്സരിക്കും. മുന്‍ എം.എല്‍.എ ഷാനിമോള്‍ ഉസ്മാന്‍ ഇത്തവണയും അരൂരില്‍ സ്ഥാനാര്‍ഥിയാകും. യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് അരിത ബാബുവും കോണ്‍ഗ്രസിന്റെ പരിഗണനാ പട്ടികയില്‍ ഉണ്ട്. കഴിഞ്ഞതവണ കായംകുളത്താണ് അരിത മത്സരിച്ചത്. മുന്‍ എം.പിയും കെ.പി.സി.സി വൈസ് പ്രസിഡന്റുമായ രമ്യ ഹരിദാസിനെ അടൂരിലേക്കാണ് പരിഗണിക്കുന്നത്.
മാധ്യമപ്രവര്‍ത്തക നിഷ പുരുഷോത്തമനെ ഉടുമ്പഞ്ചോലയില്‍ സ്ഥാനാര്‍ഥിയാക്കാന്‍ കോണ്‍ഗ്രസില്‍ ആലോചനയുണ്ട്. കാഞ്ഞിരപ്പള്ളി സീറ്റില്‍ മറിയം ഉമ്മന്റെ പേരും പറഞ്ഞുകേള്‍ക്കുന്നുണ്ടെങ്കിലും മത്സരിക്കുന്ന കാര്യത്തില്‍ അവര്‍ സമ്മതം മൂളിയിട്ടില്ല. കെ.പി.സി.സി ജനറല്‍ സെക്രട്ടറി ദീപ്തി മേരി വര്‍ഗീസ്, മുന്‍ മേയര്‍ സൗമിനി ജയന്‍ എന്നിവര്‍ എറണാകുളം ജില്ലയിലെ പ്രാഥമിക പട്ടികയില്‍ ഉണ്ട്. മേയര്‍ സ്ഥാനത്തുനിന്ന് അവസാനനിമിഷം ഒഴിവാക്കപ്പെട്ട ദീപ്തിക്ക് നിയമസഭാ സീറ്റ് നല്‍കുമെന്ന് നേതൃത്വം ഉറപ്പുനല്‍കിയിരുന്നു. കെ.പി.സി.സി ജനറല്‍ സെക്രട്ടറി സോണിയ ഗിരിയാണ് തൃശൂരില്‍നിന്ന് പരിഗണിക്കപ്പെടുന്ന വനിതാ നേതാവ്.
യുവമുഖങ്ങളായ ആന്‍ സെബാസ്റ്റ്യന്‍, സോയ ജോസഫ് എന്നിവരും പരിഗണനയിലുണ്ട്. ചേലക്കരയില്‍ കെ.പി.സി.സി ജനറല്‍ സെക്രട്ടറി കെ.എ തുളസിയുടെ പേരിനാണ് മുന്‍തൂക്കം. പാലക്കാട് എം.പി വി.കെ ശ്രീകണ്ഠന്റെ ഭാര്യയാണ് തുളസി. കോഴിക്കോട് ജില്ലയിലെ എലത്തൂരില്‍ കെ.പി.സി.സി ജനറല്‍ സെക്രട്ടറി വിദ്യ ബാലകൃഷ്ണന്‍ മത്സരിക്കുമെന്ന് ഉറപ്പായി. യൂത്ത് കോണ്‍ഗ്രസ് നേതാവും മുന്‍ മന്ത്രി എന്‍. രാമകൃഷ്ണന്റെ മകളുമായ അമൃത രാമകൃഷ്ണന്‍ കണ്ണൂരിലെ ഏതെങ്കിലും സീറ്റില്‍ സ്ഥാനാര്‍ഥിയാകാന്‍ സാധ്യതയേറി. എ.ഐ.സി.സി വക്താവ് ഷമ മുഹമ്മദും സീറ്റിനായി രംഗത്തുണ്ടെങ്കിലും നേതൃത്വം അനുകൂല മറുപടി നല്‍കിയിട്ടില്ല.

English summary

The Congress party is planning to increase women's representation in the upcoming Assembly elections by fielding more female candidates. A key strategy in this move is to ensure that at least one woman candidate is fielded in every major district.

• Candidate Increase: Compared to the 12 women who contested for Congress in the previous election, the party aims to field over 15 candidates this time.

• Sitting MLA: Uma Thomas, the party's sole sitting woman MLA, is set to contest again from the Thrikkakara constituency.

• Strategic Shift: The move is part of the party's broader effort to ensure better gender representation across the state.