കോഴിക്കോട്: തടവുകാർ രക്ഷപ്പെടുന്നത് തടയാൻ സുരക്ഷ ശക്തിപ്പെടുത്തുന്നതിൻ്റെ ഭാഗമായി സംസ്ഥാനത്തെ ഒൻപത് ജയിലുകളിൽ കൂടി  വൈദ്യുതിവേലി സ്ഥാപിക്കുന്നു.  തവനൂർ സെൻട്രൽ ജയിലുൾപ്പെടെ ചെറുതും വലുതുമായ 12 ജയിലുകളിലാണ് സുരക്ഷാ സംവിധാനങ്ങൾ ശക്തിപ്പെടുത്താൻ തീരുമാനിച്ചത്. 

ജയിലുകളുടെ സുരക്ഷാ മതിലുകൾക്ക് മുകളിൽ പവർ ഫെൻസിങ് (വൈദ്യുത വേലി) സംവിധാനം സ്ഥാപിക്കുന്ന പദ്ധതി  4.79 കോടി രൂപാ ചെലവിലാണ് നടപ്പാക്കുന്നത്. ഒൻപത് ജയിലുകളിൽ പുതുതായാണ് വൈദ്യുതി വേലി സ്ഥാപിക്കുന്നത്. മറ്റു ജയിലുകളിൽ നേരത്തെ സ്ഥാപിച്ചവ അറ്റകുറ്റപ്പണി നടത്തി പുനഃസ്ഥാപിക്കാനും വാർഷിക പരിപാലന കരാർ പുതുക്കാനും തീരുമാനിച്ചിട്ടുണ്ട്. ജയിലുകളുടെ സുരക്ഷക്കായി 24.81 കോടി രൂപയുടെ പദ്ധതി നടപ്പാക്കണമെന്നാവശ്യപ്പെട്ട് ജയിൽ മേധാവി ബൽറാംകുമാർ ഉപാധ്യായ സർക്കാരിന് റിപ്പോർട്ട് സമർപ്പിച്ചിരുന്നു. തുടർന്നാണ് വൈദ്യുതി വേലിനിർമിക്കാൻ അനുമതി നൽകിയത്. പൊതുമരാമത്ത് വകുപ്പ് വിവിധ ജില്ലകളിലായുള്ള ജയിലുകളിലെ സുരക്ഷാ ഭിത്തി പരിശോധിച്ച ശേഷമാണ് 4.79കോടി രൂപയുടെ പ്രത്യേക എസ്റ്റിമേറ്റ് തയാറാക്കി ജയിൽവകുപ്പിന് സമർപ്പിച്ചത്. 

ALSO READ: ഒരു ബിരിയാണി തല്ലു കേസ്: ബിരിയാണി കഴിക്കാൻ പണം നൽകിയില്ല; അന്യസംസ്ഥാന തൊഴിലാളിയുടെ തല അടിച്ചുപൊട്ടിച്ച് മലയാളി യുവാവ്

തവനൂർ സെൻട്രൽ ജയിൽ, മാനന്തവാടി ജില്ലാ ജയിൽ, കൊല്ലം ജില്ലാ ജയിൽ, കണ്ണൂർ ജില്ലാ ജയിൽ, കണ്ണൂർ വനിതാ ജയിൽ, കൂത്തുപറമ്പ് സ്‌പെഷൽ സബ് ജയിൽ, കാസർകോട് സ്‌പെഷൽ സബ് ജയിൽ, പൊന്നാനി സബ് ജയിൽ, വിയ്യൂർ സബ് ജയിൽ എന്നിവിടങ്ങളിലാണ് പുതിയ പവർ ഫെൻസിങ് സംവിധാനങ്ങൾ സ്ഥാപിക്കുന്നത്. കണ്ണൂർ സെൻട്രൽ ജയിൽ, വിയ്യൂർ ജില്ലാ ജയിൽ എന്നിവിടങ്ങളിൽ നിലവിലുള്ള പവർ ഫെൻസിങ്  അറ്റകുറ്റപ്പണി നടത്തി പുനഃസ്ഥാപിക്കും. 

വിയ്യൂർ അതിസുരക്ഷാ ജയിലിൽ നേരത്തെ സ്ഥാപിച്ച പവർ ഫെൻസിങ് സംവിധാനത്തിന്റെ വാർഷിക പരിപാലന കരാർ   പുതുക്കാനും അനുമതി നൽകി. സൗമ്യവധക്കേസ് പ്രതി ഗോവിന്ദച്ചാമി കഴിഞ്ഞ വർഷം കണ്ണൂർ സെൻട്രൽ ജയിലിൽ നിന്ന് രക്ഷപ്പെട്ടത് ഏറെ വിവാദമായിരുന്നു. സംസ്ഥാനത്തെ ജയിലുകളിലെ സുരക്ഷ സംബന്ധിച്ച് വിമർശനവും ഉയർന്നിരുന്നു. ഇത്തരം സാഹചര്യങ്ങൾ ഒഴിവാക്കുകയെന്ന ലക്ഷ്യത്തോടെയാണ് കൂടുതൽ ജയിലുകളിൽ വൈദ്യുതി വേലി സ്ഥാപിക്കാൻ സർക്കാർ തീരുമാനിച്ചത്.

To prevent prisoner escapes, Kerala is installing electric fencing in 9 prisons, including the Tavanoor Central Jail, as part of a larger security upgrade plan for 12 jails across the state [1].