ആലപ്പുഴ: കായംകുളം എം.എല്‍.എയും എല്‍.ഡി.എഫ് സ്ഥാനാര്‍ഥിയുമായ യു പ്രതിഭയ്‌ക്കെതിരെ സ്ത്രീവിരുദ്ധ പരാമര്‍ശം നടത്തിയ യുഡിഎഫ് മണ്ഡലം മുന്‍ കണ്‍വീനര്‍ ഇര്‍ഷാദ് ചക്കാലശ്ശേരിയെ പൊലിസ് അറസ്റ്റ് ചെയ്തു. പ്രതിഭ നല്‍കിയ പരാതിയുടെ അടിസ്ഥാനത്തില്‍ കായംകുളം പൊലിസാണ് നടപടിയെടുത്തത്. അറസ്റ്റ് രേഖപ്പെടുത്തിയ ശേഷം പ്രതിയെ ജാമ്യത്തില്‍ വിട്ടയച്ചു.

സ്ത്രീത്വത്തെ അപമാനിക്കല്‍, നവമാധ്യമങ്ങളിലൂടെ അശ്ലീല ഉള്ളടക്കം പ്രചരിപ്പിക്കല്‍ തുടങ്ങിയ കുറ്റങ്ങള്‍ക്കൊപ്പം ഐ.ടി നിയമപ്രകാരമുള്ള വകുപ്പുകളും ഇര്‍ഷാദിനെതിരെ ചുമത്തിയിട്ടുണ്ട്. വ്യക്തിഹത്യ നടത്തുന്നവര്‍ക്ക് കൃത്യമായ മുന്നറിയിപ്പ് നല്‍കേണ്ടതുണ്ടെന്നും സൈബര്‍ അധിക്ഷേപങ്ങള്‍ വച്ചുപൊറുപ്പിക്കില്ലെന്നും പരാതി നല്‍കിക്കൊണ്ട് യു പ്രതിഭ വ്യക്തമാക്കി.

വിവാദ പരാമര്‍ശം പുറത്തുവന്നതിന് പിന്നാലെ രാഷ്ട്രീയ മുന്നണികളും ഇര്‍ഷാദിനെതിരെ കര്‍ശന നടപടി സ്വീകരിച്ചു.
യുഡിഎഫ് കായംകുളം നിയോജക മണ്ഡലം ചെയര്‍മാന്‍ സ്ഥാനത്തുനിന്ന് ഇര്‍ഷാദിനെ നീക്കി. എച്ച്. ബഷീര്‍ കുട്ടിക്കാണ് പകരം ചുമതല.
മുസ്്‌ലിം ലീഗ് അന്വേഷണ വിധേയമായി പാര്‍ട്ടിയുടെ പ്രാഥമിക അംഗത്വത്തില്‍ നിന്ന് ഇര്‍ഷാദിനെ സസ്‌പെന്‍ഡ് ചെയ്തതായി സംസ്ഥാന കമ്മിറ്റി അറിയിച്ചു.

വികസന പ്രവര്‍ത്തനങ്ങളെക്കുറിച്ച് പറയാതെ 'ശരീര അഴക്' മുന്‍നിര്‍ത്തിയാണ് പ്രതിഭ വോട്ട് ചോദിക്കുന്നത് എന്ന ഇര്‍ഷാദിന്റെ പ്രസ്താവനയാണ് വിവാദമായത്. സംഭവം ചര്‍ച്ചയായതോടെ തന്റെ വാക്കുകള്‍ സ്ത്രീവിരുദ്ധമായി വ്യാഖ്യാനിക്കേണ്ടതില്ലെന്നും ആര്‍ക്കെങ്കിലും വിഷമമുണ്ടായെങ്കില്‍ ക്ഷമ ചോദിക്കുന്നുവെന്നും ഇര്‍ഷാദ് പ്രതികരിച്ചിരുന്നു. എന്നാല്‍, ഒരു സ്ത്രീക്കെതിരെയും ഇത്തരം അധിക്ഷേപങ്ങള്‍ നടത്തുന്നത് ശരിയല്ലെന്ന ഉറച്ച നിലപാടിലാണ് എം.എല്‍.എയും ഇടതുപക്ഷവും.

Following a misogynistic remark against Kayamkulam MLA U. Pratibha, UDF leader Irshad Chakkalassery was arrested by the police and subsequently suspended from both the Muslim League and his UDF positions.