റിയാദ്: ഡ്രൈവറില്ലാ വാഹനങ്ങൾ പൊതുജനങ്ങൾക്കായി തുറന്നുകൊടുത്ത് സഊദി ട്രാൻസ്‌പോർട്ട് ജനറൽ അതോറിറ്റി. റിയാദിലെ പ്രധാന ഷോപ്പിങ് കേന്ദ്രങ്ങളായ ഹയാത്ത് മാളിനെയും റിയാദ് ഗാലറിയെയും ബന്ധിപ്പിച്ചാണ് പുതിയ റൂട്ട് ആരംഭിച്ചിരിക്കുന്നത്.

സുരക്ഷിതവും സ്മാർട്ടുമായ യാത്ര

നിലവിൽ നേരിട്ടുള്ള നിയന്ത്രണത്തിലും സാങ്കേതിക മേൽനോട്ടത്തിലുമാണ് ഈ വാഹനങ്ങൾ സർവിസ് നടത്തുന്നത്. സെൻസറുകൾ, ക്യാമറകൾ, എ.ഐ എന്നിവയുടെ കരുത്തിലാണ് വാഹനത്തിന്റെ പ്രവർത്തനം. റോഡിലെ മാറ്റങ്ങൾ കൃത്യമായി നിരീക്ഷിച്ചും ട്രാഫിക് നിയമങ്ങൾ പാലിച്ചും പ്രവർത്തിക്കാൻ ഈ സ്മാർട്ട് സംവിധാനങ്ങൾക്ക് സാധിക്കും. മനുഷ്യസഹജമായ പിഴവുകൾ ഒഴിവാക്കി സുരക്ഷ ഉറപ്പാക്കുന്നു എന്നതാണ് വാഹനങ്ങളുടെ പ്രധാന പ്രത്യേകത. സഊദി വിഷൻ 2030ന്റേയും നാഷനൽ ട്രാൻസ്‌പോർട്ട് ആൻഡ് ലോജിസ്റ്റിക്സ് സ്ട്രാറ്റജിയുടെയും ഭാഗമായാണ് പദ്ധതി നടപ്പിലാക്കിയത്. പരിസ്ഥിതി സൗഹൃദമായ ഗതാഗത സംവിധാനത്തെ പ്രോത്സാഹിപ്പിക്കുകയാണ് ഇതിലൂടെ ലക്ഷ്യമിടുന്നത്. നേരത്തെ നടത്തിയ പരീക്ഷണ ഘട്ടത്തിൽ 30,000 കിലോമീറ്ററിലധികം ദൂരം ഈ വാഹനങ്ങൾ പിന്നിട്ടിരുന്നു.

ALSO READ: യമനിൽ സഊദിയുടെ മൈൻ വേട്ട തുടരുന്നു; ഒരാഴ്ചയ്ക്കിടെ നിർവീര്യമാക്കിയത് ആയിരത്തിലധികം സ്ഫോടകവസ്തുക്കൾ

1,700ലധികം ട്രിപ്പുകളിലൂടെ മൂവായിരത്തോളം യാത്രക്കാർക്ക് സേവനം നൽകിയ ശേഷമാണ് ഇപ്പോൾ പുതിയ റൂട്ട് ഔദ്യോഗികമായി പ്രവർത്തനം ആരംഭിച്ചത്. വരും ദിവസങ്ങളിൽ രാജ്യത്തെ കൂടുതൽ കേന്ദ്രങ്ങളിലേക്ക് ഇത്തരം വാഹനങ്ങൾ വ്യാപിപ്പിക്കാൻ അതോറിറ്റി പദ്ധതിയിട്ടിട്ടുണ്ട്. 

Saudi Arabia's Transport General Authority (TGA) has officially launched a self-driving vehicle route connecting Hayat Mall and Riyadh Gallery. Powered by AI, sensors, and advanced cameras, these autonomous vehicles offer a safe, eco-friendly, and innovative transit experience in line with Saudi Vision 2030.