മലപ്പുറം: വെള്ളാപ്പള്ളി നടേശനെതിരെ സി.പി.എം ജനറല്‍ സെക്രട്ടറി എം.എ ബേബി. വെള്ളാപ്പള്ളിയുടെ  ചില നിലപാടുകള്‍ കണ്ടില്ലെന്ന് നടിക്കാനാവില്ലെന്ന് അദ്ദേഹം തുറന്നടിച്ചു. വെള്ളാപ്പള്ളിയുടെ വര്‍ഗീയ പരാമര്‍ശങ്ങളില്‍ മൗനംപാലിക്കുന്നതില്‍ മുഖ്യമന്ത്രി ഉള്‍പെടെയുള്ളവര്‍ക്കെതിരെ വിമര്‍ശനം ഉയരുന്നതിനിടെയാണ് സി.പി.എം ജനറല്‍ സെക്രട്ടറിയുടെ പ്രതികരണം. താന്‍ നടത്തുന്ന ചില പ്രസ്താവനകള്‍ താന്‍ വഹിക്കുന്ന ഉത്തരവാദിത്തത്തിനും ചുമതലക്കും നിരക്കുന്നതാണോ എന്ന് വെള്ളാപ്പള്ളി ചിന്തിക്കണമെന്നും ബേബി ചൂണ്ടിക്കാട്ടി. വെള്ളാപ്പള്ളിയെ മുഖ്യമന്ത്രി വണ്ടിയില്‍ കയറ്റിയത് സ്വജന മര്യാദയുടെ പേരിലാണെന്നും അദ്ദേഹം കൂട്ടിച്ചേര്‍ത്തു.

പേരാമ്പ്രയിലെ അനൗണ്‍സ്‌മെന്റുമായി ബന്ധപ്പെട്ടും അദ്ദേഹം പ്രതികരിച്ചു. അനൗണ്‍സ്‌മെന്റുമായി ബന്ധപ്പെട്ട വിവാദത്തില്‍ ടി.പി രാമകൃഷ്ണന്‍ വിശദീകരണം നല്‍കിയിട്ടുണ്ടെന്നും അദ്ദേഹം വ്യക്തമാക്കി. ഇത് തന്റെ അറിവോടെയല്ലെന്നും ഇടതുമുന്നണിക്ക് വോട്ട് പിടിക്കാന്‍ ഇതിന്റെ ആവശ്യമില്ലെന്നും ടി.പി രാമകൃഷ്ണന്‍ പറഞ്ഞിട്ടുണ്ട്. അന്വേഷണവുമായി സഹകരിക്കുമെന്നും ടി.പി പറഞ്ഞതായി ബേബി കൂട്ടിച്ചേര്‍ത്തു. സിപിഎമ്മും ബി.ജെ.പിയും ഡീല്‍ ഉണ്ടെന്ന് രാഷ്ട്രീയ സാക്ഷരതയുള്ള ആരും പറയില്ലെന്നും എം.എ ബേബി കൂട്ടിച്ചേര്‍ത്തു. 

ALSO READ: പേരാമ്പ്രയിലെ അനൗണ്‍സ്‌മെന്റ് വിവാദത്തില്‍ നോട്ടിസ് കിട്ടിയിട്ടില്ലെന്ന് ടി.പി രാമകൃഷ്ണന്‍; സമാധാനാന്തരീക്ഷം തകര്‍ക്കാനുള്ള ശ്രമം

'മതമാണ് മതമാണ് പ്രശ്‌നം എന്ന് ഒരു ലീഗ് നേതാവ് പ്രസംഗിക്കുന്നത് കേട്ടു. അങ്ങനെയൊക്കെയും ഈ നാട്ടില്‍ നടക്കുന്നുണ്ട്'- ബേബി പറഞ്ഞു.  എസ്.ഡി.പി.ഐയുമായി നീക്കുപോക്ക് നടത്തിയിട്ടില്ല. ബി.ജെ.പി ജയിക്കുന്ന സാഹചര്യം ഉണ്ടാകുമ്പോള്‍ ഏതെങ്കിലും പാര്‍ട്ടി എല്‍.ഡി.എഫ് സ്ഥാനാര്‍ഥിക്ക് വോട്ട് ചെയ്യണം എന്ന് തീരുമാനിച്ചാല്‍ സ്വഭാവ ശുദ്ധിയില്ലാത്ത വോട്ട് സ്വീകരിക്കരുത് എന്ന് പറയുന്നത് ബിജെപിയുമായി ബന്ധമുണ്ടാക്കിയവരാണെന്നും എം.എ ബേബി പറഞ്ഞു.