അബൂദബി: യു.എ.ഇയില്‍ വരും ദിവസങ്ങളില്‍ പൊടിക്കാറ്റിനും നേരിയ മഴയ്ക്കും സാധ്യതയെന്ന് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ (എന്‍.സി.എം) മുന്നറിയിപ്പ്. തീരപ്രദേശങ്ങളിലും ദ്വീപുകളിലുമാണ് മഴയ്ക്ക് കൂടുതല്‍ സാധ്യതയുള്ളത്. കാറ്റ് ശക്തമാകുന്നതിനാല്‍ തീരപ്രദേശങ്ങളില്‍ താപനില ഗണ്യമായി കുറയുമെന്നും കാലാവസ്ഥാ വകുപ്പ് അറിയിച്ചു.
ഇന്ന് പൊതുവെ ഭാഗികമായി മേഘാവൃതമായ കാലാവസ്ഥയായിരിക്കുമെങ്കിലും, രാത്രിയോടെ തീരപ്രദേശങ്ങളിലും ദ്വീപുകളിലും മേഘങ്ങള്‍ വര്‍ദ്ധിക്കും. നാളെ മുതല്‍ വ്യാഴാഴ്ച വരെ രാജ്യത്തിന്റെ പല ഭാഗങ്ങളിലും പൊടിക്കാറ്റ് വീശാന്‍ സാധ്യതയുണ്ട്. കിഴക്കന്‍ മേഖലകളിലും തീരപ്രദേശങ്ങളിലും നേരിയ മഴ ലഭിച്ചേക്കാം. പ്രത്യേകിച്ച് പടിഞ്ഞാറന്‍ തീരപ്രദേശങ്ങളില്‍ താപനിലയില്‍ കുറവ് അനുഭവപ്പെടും. 
മണിക്കൂറില്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റ് വീശാന്‍ സാധ്യതയുള്ളതിനാല്‍ ചിലയിടങ്ങളില്‍ ദൂരക്കാഴ്ചയെ ബാധിച്ചേക്കാം. അറേബ്യന്‍ ഗള്‍ഫില്‍ കടല്‍ പ്രക്ഷുബ്ധമാകാന്‍ സാധ്യതയുള്ളതിനാല്‍ ജാഗ്രതാ നിര്‍ദ്ദേശമുണ്ട്. അതേസമയം, ഒമാന്‍ കടലില്‍ മിതമായ രീതിയിലായിരിക്കും തിരമാലകള്‍. വെള്ളിയാഴ്ചയോടെ കാറ്റിന്റെ ശക്തി കുറയുകയും കാലാവസ്ഥ സാധാരണ നിലയിലാകുകയും ചെയ്യുമെന്നും അധികൃതര്‍ വ്യക്തമാക്കി.

Summary: Fair to partly cloudy conditions will give way to a spell of unsettled weather across the UAE this week, with dust, stronger winds and a chance of light rain affecting coastal and island areas, according to the forecast.